މޯލްޑިވިއަނުން ބަންގްލަދޭޝަށް ކުރަމުން އައި ދަތުރުތައް މެދުކަނޑާލައިފި

ޤައުމީ އެއަރލައިން މޯލްޑިވިއަނުން ބަންގްލަދޭޝްގެ ޑާކާއަށް ކުރަމުން އައި ދަތުރުތައް ވަގުތީގޮތުން މެދުކަނޑާލައިފިއެވެ.

މޯލްޑިވިއަނުން ބުނީ 6 އޮގަސްޓުން ފެށިގެން ޑާކާ ދަތުރުތައް ވަގުތީގޮތުން މެދުކަނޑާލާފައިވާކަމަށާއި، އަލުން މި ދަތުރުތައް ފަށާނެ ތާރީޚެއް ފަހުން ޢާންމުކުރާނެކަމަށެވެ.

ބަންގްލަދޭޝްއަށް މޯލްޑިވިއަނުން ކުރަމުންއައި ދަތުރުތައް މެދުކަނޑާލީ އެޤައުމުގައި ހިނގަމުންދާ ހަމަނުޖެހުންތަކާއި ގުޅިގެން ހާލަތު ގޯސްވުމުންނެވެ. އެގައުމުގައި ކުރަމުންދާ މުޒާހަރާތަކާއި ހަމަނުޖެހުންތައް ބޮޑުވެ ބަންގްލަދޭޝްގެ ބޮޑުވަޒީރު ޝައިޚް ޙަސީނާ އިސްތިޢުފާ ދެއްވައި އެޤައުމު ދޫކުރައްވައި ވަނީ ވަޑައިގެންފައެވެ.

ބަންގްލަދޭޝްއަކީ މޯލްޑިވިއަނުން ދަތުރުކުރަމުންދާ ބައިނަލްއަޤްވާމީ މަދު މަންޒިލްތަކުގެ ތެރެއިން މަންޒިލެކެވެ. އެގޮތުން ކޮންމެ ހަފްތާއަކުވެސް މޯލްޑިވިއަންގެ ދަތުރުތައް ބަންގްލަދޭޝްގެ ޑާކާއަށް ބާއްވައެވެ.

މޯލްޑިވިއަނުން ބައިނަލްއަޤްވާމީ ދަތުރުތައް މިހާރު ކުރަމުންދަނީ ބަންގްލަދޭޝްގެ އިތުރުން އިންޑިއާގެ ޓްރިވެންޑްރަމާއި، ކޮޗިން އަދި ބެންގަލޫރަށެވެ.