ޓެކްސް ނުދައްކާ ފަރާތްތަކަށް ތަންފީޒީ މަރުހަލާގެ ތެރެއިން އިތުރު ފިޔަވަޅުތަކެއް އަޅަނީ

އެކި ގޮތްގޮތުން ދައުލަށް ލިބެންޖެހޭ ފައިސާ ހޯދުމަށްޓަކާ ތަންފީޒީ މަރުހަލާގެ ތެރެއިން އިތުރު ފިޔަވަޅުތަކެއް އެޅުމަށް ކަމާބެހޭ ފަރާތްތަކާއެކު މަޝްވަރާކުރަމުންދާކަމަށް ކޮމިޝަނަރ ޖެނެރަލް އޮފް ޓެކްސޭޝަން ޙަސަން ޒަރީރު ވިދާޅުވެއްޖެއެވެ.

އެކި ގޮތްގޮތުން ދައުލަތަށް ލިބެންޖެހޭ އެހެންނަމަވެސް ނުލިބިވާ ފައިސާގެ އަދަދު 15 ބިލިޔަން ރުފިޔާއަށް އަރާއިރު، މި ފައިސާ ހޯދަން ކުރަންޖެހޭ މަސައްކަތްތައް ކުރައްވާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ދެއްވާފައެވެ.

ޕީ.އެސް.އެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަދައްކަވަމުން ކޮމިޝަނަރ ޖެނެރަލް އޮފް ޓެކްސޭޝަން ޙަސަން ޒަރީރު ވަނީ ޓެކުހާއި، ނޮން-ޓެކްސްގެ ގޮތުގައި މީރާއަށް ދައްކަންޖެހޭ އެހެންނަމަވެސް މިހާތަނަށް ނުލިބިވާ ފައިސާގެ ބައެއް ތަފްޞީލުތަކާއި، އެ ފައިސާ ހޯދުމަށް ކުރަމުންދާ މަސައްކަތްތަކުގެ ތަފްޞީލު ހިއްސާކުރައްވާފައެވެ.

ޙަސަން ޒަރީރު ވިދާޅުވީ، އެކިގޮތްގޮތުން މީރާއަށް ދައްކަންޖެހޭ ފައިސާގެ ތެރޭގައި ޖޫރިމަނާތައްވެސް ހިމެނޭހެން ޓެކުހުގެ ގޮތުގައި އެކަނިވެސް 7.7 ބިލިޔަން ރުފިޔާ ނުލިބިވާކަމަށެވެ. އަދި ނޮން-ޓެކްސްގެ ގޮތުގައި އިމާރާތާއި ބިމު ކުލީގެގޮތުގައިވެސް 7.8 ބިލިޔަން ރުފިޔާ ނުލިބިވާކަމަށް ޒަރީރު ވިދާޅުވިއެވެ.

"އެންމެ ބޮޑެތި އަދަދުތަކެއް އެކިއުމަލޭޓްވެފައި ވަނީ ކޯވިޑްގެ ތެރޭގައި. ގާތްގަނޑަކަށް 5 އަހަރަށްވުރެ ގިނަ ދުވަސްވެފައިވާ 800 މިލިޔަން ރުފިޔާ އެބައުޅޭ. 2 އަހަރާއި 5 އަހަރާއި ދެމެދުގައިވެސް 90 މިލިޔަނެއްހާ ރުފިޔާގެ ޑިއުސް އުޅޭ. ޓެކްސްގެ ޑިއުސްގެ ތެރެއިން ގާތްގަނޑަކަށް 4 ބިލިޔަނެއްހާ ރުފިޔާގެ ޑިއުސް މިއުޅެނީ ވޭތުވެދިޔަ 2 އަހަރުގެ ތެރޭގައި އެކިއުމަލޭޓްވެފައި. ޖުމްލަ ގާތްގަނޑަކަށް 5.7 ބިލިޔަން ރުފިޔާއަކީ ޓެކްސް، ބާކީ ޖޫރިމަނާގޮތަށް މި ބެލެވެނީ." ޒަރީރު ވިދާޅުވިއެވެ.

ޒަރީރު ވިދާޅުވީ، މިގޮތަށް ނުލިބި ހުރި ފައިސާތަކުގެ ތެރޭގައި ދައުލަތުގެ ބައެއް ކުންފުނިތަކާއި، ގުޅުންހުރި އިދާރާތަކުން ދައްކަންޖެހޭ ފައިސާވެސް އެބަހުރިކަމަށެވެ. އަދި މިގޮތަށް ފައިސާ ނުދައްކާ ހުރި ފަރާތްތަކާމެދު އެއް އުޞޫލަކުން ޢަމަލުކުރެވޭނެ ގޮތްތަކެއް މާލީ ވުޒާރާއާގުޅިގެން ޤާއިމުކުރުމުގެ މަސައްކަތްކުރަމުންދާކަމަށެވެ.

މީރާއަށް މިހާތަނަށް ނުދައްކާހުރި ފައިސާ ހޯދުމަށް ކުރާ މަސައްކަތުގެ ތެރެއިން ބޮޑެތި ޢަދަދުތަކުން ފައިސާ ދައްކަންޖެހޭ ފަރާތްތަކާ މިހާރު ވަކިވަކިން ބައްދަލުކޮށް، މިކަމުގައި ކުރިއަށްދެވޭނެ ގޮތްތަކެއް ހޯދުމުގެ މަސައްކަތް ކުރަމުންދާކަމަށް ޒަރީރު ވިދާޅުވިއެވެ. މިގޮތަށް ކުރެވުނު މަސައްކަތުން ޓެކުހުގެ ގޮތުގައި މިދިޔަމަހު މީރާއަށް ބަލައިގަތް އަދަދުވެސް އިތުރުވެފައިވާކަން ޒަރީރު ފާހަގަކުރެއްވިއެވެ.

"އަޅުގަނޑުމެން މިދަނީ ބޮޑެތި ޑިއުސްތައް ހުރި ހުރިހާ ޓެކްސް ދައްކާ ފަރާތްތަކާ ބައްދަލުކުރަމުން. ބައްދަލުކޮށް އެ ފަރާތްތައް އަޅުގަނޑުމެންގެ ސިސްޓަމް ތެރެއަށް ގެނެސް، ޓެކްސް ދެއްކުމުގެ ޕްލޭނަކަށްވަދެ، އަދި ކުރިއަށްހުރި ޓެކްސްތައް ގަވާއިދުން ދައްކާނެކަމުގެ ކޮމިޓްމަންޓް، އެޝުއަރެންސް އަޅުގަނޑުމެން މި ހޯދަނީ އެތަންތަނުގެ އެންމެ އިސްވެރިން ގެނެސްގެން. މިއާއެކު އަޅުގަނޑުމެންނަށް ވަރަށް ޕޮޒިޓިވްކޮށް މިދިޔަ މަހު މީރާގެ ކަލެކްޝަންވެސް ފެނިގެންދިޔައީ." ޒަރީރު ވިދާޅުވިއެވެ.

ގަވާއިދުން ޓެކްސް ނުދައްކާނަމަ ބައެއް ޚިދުމަތްތައް ހިފެހެއްޓުމުގެ ވިސްނުން!

ކޮމިޝަނަރ ޖެނެރަލް އޮފް ޓެކްސޭޝަން ޙަސަން ޒަރީރު ވިދާޅުވީ، މިހާ ބޮޑު އަދަދެއް މީރާއަށް ނުލިބިއޮތް މައިގަނޑު ސަބަބަކީ ކޯވިޑް-19އާއެކު މާލީގޮތުން ވިޔަފާރިތަކަށް ކުރިމަތިވި ގޮންޖެހުންތައްކަމަށެވެ. އަދި އޭރު ޢަމަލުކުރަމުންދިޔަ ބައެއް އެންފޯސްމަންޓް ފިޔަވަޅުތައް މަޑުޖައްސާލި ޖައްސާލުންކަމަށެވެ.

އެގޮތުން 2019 ގެ ކުރިން އަމަލުކުރަމުންދިޔަ "އެކްޝަން ޕޮލިސީ" އަށް ޢަމަލުކުރުން ހުއްޓާލި ހުއްޓާލުން ކޮމިޝަނަރ ފާހަގަކުރެއްވިއެވެ. މި އެކްޝަން ޕޮލިސީގެ ތެރެއިން އެހެން އިދާރާތަކުން ޚިދުމަތެއްދޭއިރު ޓެކުހެއް ދައްކަން އޮތްތޯ ބަލައި، ޓެކުހެއް ދައްކަން އޮތްނަމަ އެ ޚިދުމަތެއް ވަގުތީގޮތުން ހިފެހެއްޓުމުގެ ބާރު ލިބިގެންދެއެވެ.

މިއީ އޭރު ކުރެވުނު ވަރަށް ރަނގަޅު މަސައްކަތެއްކަމަށާއި، މި ޕޮލިސީގެ ސަބަބުން ޓެކްސް ދައްކަން އޭރު ވަރަށް ބޮޑަށް ބާރުއެޅިގެންދިޔަކަން ކޮމިޝަނަރ ފާހަގަކުރެއްވިއެވެ. އެހެންކަމުން މި ޕޮލިސީއަށް އަލުން ޢަމަލުކުރަން ފެށުމާމެދު މާލީ ވުޒާރާއާއެކު މަޝްވަރާތައް ކުރައްވަމުންދާކަމަށް ޒަރީރު ވިދާޅުވިއެވެ.

"އަޅުގަނޑުމެން މިހާރު މި މަސައްކަތް ކުރަނީ ފިނޭންސް މިނިސްޓްރީއާއެކު ވާހަކަދައްކައިގެން، ބޮޑަށް ފިނޭންސްގެ ސަރކިއުލަރއަކުން އެ އެކްޝަން ޕޮލިސީއަށް ޢަމަލުކުރަން އަންގަވަނީ. އެހެންވީމަ ވަރަށް އަވަހަށް މި މަސައްކަތް ކުރަނީ އެ ޕޮލިސީއަށް އަލުން ޢަމަލުކުރަން އެންގުމަށް. އޭރަށް ޓެކްސް ނުދައްކާ ފަރާތްތަކަށް އެ ޕޮލިސީ ތެރެއިން ވަގުތީގޮތުން ބައެއް ކަންތައްތައް ހުއްޓިގެންދާނެ." ޒަރީރު ވިދާޅުވިއެވެ.

މީރާގެ ޓެކްސް ކަލެކްޝަންގެ އުޞޫލުތަކަށް މި ގެނެވޭ ބަދަލުތަކާއެކުވެސް ވިސްނުން ބޮޑަށްހުރީ މިގޮތަށް ފައިސާ ނުދައްކާތިބި ފަރާތްތަކާމެދު ހަރުކަށި ފިޔަވަޅުތަކެއް އެޅުމަށްވުރެ، ކަނޑައެޅިފައިވާ އުޞޫލުތަކުގެ ތެރެއިން އެފަރާތްތަކަށް ދެވެންހުރި ލުއިތައް ދީ އެފަރާތްތަކާ ގުޅިގެން މި ފައިސާ ހޯދުންކަމަށް ކޮމިޝަނަރ ޖެނެރަލް އޮފް ޓެކްސޭޝަން ޙަސަން ޒަރީރު ވަނީ ވިދާޅުވެފައެވެ. އަދި މިހާތަނަށް ކުރެވުނު މަސައްކަތްތަކުންވެސް މިއީ ކުރެވިދާނެކަމެއްކަމާއި، ހެޔޮބަދަލުތަކެއް ފެންނަން ފަށާފައިވާކަން ޒަރީރު ފާހަގަކުރެއްވިއެވެ.