ޓެކްސްދައްކާ ފަރާތްތަކާ ގުޅުން ބަދަހިކުރަން "ގުޅިގެން މީރާ" އިނިޝިއޭޓިވް އިފްތިތާހުކޮށްފި
-
މިއިނީޝިއޭޓިވް އިފްތިތާހުކޮށްދެއްވީ މާލީ ވަޒީރު
-
މަޤްސަދަކީ ޓެކްސް ދައްކާ ފަރާތްތަކުގެ އިތުބާރު އިތުރުކުރުން
-
އަދި ސްޓޭކްހޯލްޑަރުންނާއި ގުޅުން ބަދަހިކުރުން
މޯލްޑިވްސް އިންލަންޑް ރެވެނިއު އޮތޯރިޓީ، މީރާއިން "ގުޅިގެން މީރާ" ގެ ނަމުގައި އިނިޝިއޭޓިވްއެއް އިފްތިތާހުކޮށްފިއެވެ. މި އިނިޝިއޭޓިވް އިފްތިތާހުކޮށްފައިވަނީ މީރާގެ 14 ވަނަ އަހަރީދުވަހުގެ މުނާސަބަތުގައެވެ.
މިއިނިޝިއޭޓިވް އިފްތިތާހުކޮށްދެއްވީ މާލީ ވަޒީރު ޑރ. މުހައްމަދު ޝަފީޤްއެވެ.
"ގުޅިގެން މީރާ" އަކީ މީރާ އާއި ޓެކްސްދައްކާ ފަރާތްތަކާއި ދެމެދު އޮންނަ ގުޅުން އިތުރަށް ވަރުގަދަކުރުމަށާއި، ޓެކްސްދައްކާ ފަރާތްތަކުން މީރާއަށް ކުރާ އިތުބާރު އިތުރުކުރުމާއި، މީރާގެ ސްޓޭކްހޯލްޑަރުންނާ އޮންނަ ގުޅުން ވަރުގަދަކޮށް، ވޮލަންޓަރީ ކޮމްޕްލަޔަންސް އިތުރުކުރުމަށްޓަކައި މީރާއިން ކުރިއަށްގެންދާ އިނިޝިއޭޓިވްއެއްކަމަށް މީރާއިން މައުލޫމާތުދެއެވެ. މިއިނީޝިއޭޓިވްގެ ދަށުން މީރާއިން ދެމުންއަންނަ ޚިދުމަތްތައް އިތުރަށް ފަހިކޮށްދިނުމަކީ މީރާގެ އަމާޒެއްކަމަށް މީރާއިން ވަނީ ބުނެފައެވެ.
މި އިނީޝިއޭޓިވްގެ ދަށުން މީރާގެ މުވައްޒަފުންގެ މެދުގައިވެސް ހަރަކާތްތަކެއް ރާވައިފައިވާކަން އެ އިދާރާއިން ފާހަގަކުރެއެވެ.
"ގުޅިގެން މީރާ" އިފްތިތާހްކުރުމުގެ މިއިވެންޓްގައި މީރާގެ ކޮމިޝަނަރ ޖެނެރަލް ހަސަން ޒަރީރާއި، ޑެޕިއުޓީ ކޮމިޝަނަރ އަސްމާ ޝަފީއު، މީރާގެ ކުރީގެ ކޮމިޝަނަރ ޖެނެރަލް ފަތުހުﷲ ޖަމީލާއި މީރާގެ ކުރީގެ އަދި މިހާރުގެ އިސްބޭފުޅުންނާއި، ބޯޑު މެންބަރުންނާއި އަދި މީރާގެ މުވައްޒަފުން ބައިވެރިވިއެވެ.