ހުޅުމާލޭގައި ހިނގި ނުރައްކާތެރި އެކްސިޑެންޓާ ގުޅިގެން 3 މީހަކު ހައްޔަރުކޮށްފި

ހުޅުމާލޭ ފޭސް 2 ގައި ހިނގި ނުރައްކާތެރި އެކްސިޑެންޓާ ގުޅިގެން 3 މީހަކު ހައްޔަރުކޮށްފިއެވެ. މި މައްސަލައިގައި ހައްޔަރުކުރި 3 މީހުންނަކީވެސް ދިވެހި 3 ފިރިހެނުންނެވެ.

ދިވެހި ފުލުހުންގެ ޚިދުމަތުން ވަނީ މި މައްސަލައިގައި ހައްޔަރުކުރި 3 މީހުންގެ ފޮޓޯއާއި ވަނަވަރު ހާމަކޮށްފައެވެ. މި މައްސަލައިގައި ހައްޔަރުކޮށްފައިވަނީ މާލެއަށް ނިސްބަތްވާ 2 މީހަކާއި، ގއ. ކަނޑުހުޅުދޫއަށް ނިސްބަތްވާ މީހެކެވެ.

މި މައްސަލައިގައި ހައްޔަރުކޮށްފައިވަނީ:

އިކްރާމުއްރަހްމާން / ހ. ނޫރަަންމާގެއާގެ، ކ. މާލެ
އިބްރާހީމް އިކްރާމް / މ. ލޭންޑްއޮފްގާރޑްން، ކ.މާލެ
ޖިނާހް އިސްމާޢީލް / އާޒާދުގެ، ގއ. ކަނޑުހުޅުދޫ

ހުޅުމާލެ ދެވަނަ ފިޔަވަހީގައި ވިނަރެސް ފްލެޓްތައް ކައިރީގައި ކާރަކުން ސައިކަލެއްގައި ޖެހި ހިނގި މި އެކްސިޑެންޓުގެ ރިޕޯޓު ލިބިފައިވަނީ ބުދަ ދުވަހުގެ މެންދުރުގެ ވަގުތެއްގައެވެ.

މި އެކްސިޑެންޑް ހިނގާފައިވަނީ ބާރު ސްޕީޑުގައި ދުއްވާފައި ދިޔަ ކާރެއް ކޮންޓްރޯލް ނުވެ ގޮސް މަގުގެ އެއް ފަރާތުގައި މީހަކު އިށީދެއިން ސައިކަލެއްގައި ޖެހިގެންކަމަށް ފުލުހުން ވިދާޅުވިއެވެ.

މި ޙާދިސާގައި ސައިކަލުމަތީގައި އިން މީހާއަށް އެކިވަރުގެ ޒަޚަމްތަކެއް ލިބިފައިވާއިރު، ހުޅުމާލޭ ހޮސްޕިޓަލުގައި ފަރުވާ ދިނުމަށްފަހު އޭނާ އިތުރު ފަރުވާއަށް އައިޖީއެމްއެޗްއަށް މިހާރު ވަނީ ބަދަލުކޮށްފައެވެ. ޒަޚަމްވެފައިވަނީ އުމުރުން 31 އަހަރުގެ ދިވެހި ފިރިހެނެކެވެ. އޭނާގެ ޙާލަތު ސްޓޭބަލްކަމަށް ޑޮކްޓަރުންނާއި ޙަވާލާދެއްވާ އައިޖީއެމްއެޗްއިން ވިދާޅުވެއެވެ.

މިއެކްސިޑެންޓްގައި ހިމެނޭ ކާރު ދުއްވި މީހާ އެކްސިޑެންޓްވުމާއެކު އެންމެ ފުރަތަމަ ވަނީ އެ ސަރަޙައްދު ދޫކޮށް ފިލާފައެވެ. ނަމަވެސް ހައްޔަރުކުރި 3 މީހުންގެ ތެރޭގައި ކާރު ދުއްވަން އިން މީހާވެސް ހިމެނޭކަމަށް ފުލުހުން ވިދާޅުވިއެވެ.