މިއަހަރުތެރޭ ޒަކާތު ފަންޑަށް 100 މިލިޔަން ރުފިޔާ ހޯދުމަކީ އަމާޒެއް: ވަޒީރު ޑރ. ޝަހީމް

މިއަހަރުގެ ތެރޭ ޒަކާތު ފަންޑަށް 100 މިލިޔަން ރުފިޔާ ހޯދުމަކީ އަމާޒެއްކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ. ވަޒީރު މިހެން ވިދާޅުވީ، ޕީ.އެސް.އެމް ނިއުސްގެ ރާއްޖެމިއަދު ޕްރޮގްރާމުގައެވެ.

ޒަކާތު ފަންޑު ތަރައްޤީކޮށް، ޒަކާތުން ބައެއް ޝަރީޢާ ހުއްދަކުރާ ދާއިރާތަކުން އިންވެސްޓްކޮށް، ޒަކާތު ފަންޑު އިތުރުކޮށް، އޭގެ ނަފާ ބެހެނިވެރިންނަށް ފުޅާ ދާއިރާއެއްގައި ލިބޭނެގޮތް ހެދުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ.

މިގޮތުން ކުރެވޭ މަސައްކަތްތަކުގެ ތެރެއިން "ދިވެހިރާއްޖޭގެ ޒަކާތު ހައުސް"ގެ ނަމުގައި ސަރުކާރުގެ ޚާއްސަ އިދާރާއެއް ޤާއިމުކުރެއްވީ 18 ޑިސެމްބަރު 2023 ގައެވެ. މި އިދާރާ ރަސްމީކޮށް އިފްތިތާޙްކޮށްފައިވަނީ 2 ޖެނުއަރީ 2024 ގައެވެ. މި އިދާރާ ހިންގަނީ އިސްލާމީ ކަންތައްތަކާ ބެހޭ ވުޒާރާގެ ދަށުންނެވެ.

ޕީ.އެސް.އެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަފުޅުދައްކަވަމުން ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ، ޒަކާތާބެހޭ ކަންކަމަށް ޚާއްސަކޮށްގެން ވަކި އިދާރާއެއް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވެރިކަމުގެ އެންމެ ކުރީކޮޅު ވުޖޫދަށް ގެންނެވުމަކީ ރާއްޖޭގެ ޒަކާތުގެ ނިޒާމު އިތުރަށް ފުޅާކޮށް ފުރިހަމަކުރެއްވުމަށް އެމަނިކުފާނު ގެންގުޅުއްވާ ތަޞައްވުރު ރަމްޒުކޮށްދޭ ކަމެއްކަމަށެވެ.

ޒަކާތު ހައުސްގެ މަސައްކަތްތައް ވަރަށް ތަރުތީބުކޮށް ކުރިއަށްދާކަމަށާއި، މިހާތަނަށް އައިއިރުވެސް ޒަކާތުގެ ކަންކަމަށް އާންމުން ހޭލުންތެރިކުރުމުގެ ތަފާތު މަސައްކަތްތައް ކުރިއަށްގެންގޮސްފައިވާކަމަށް ވަޒީރު ވިދާޅުވިއެވެ.

ވަޒީރު ޑރ. ޝަހީމް ވިދާޅުވީ، މިއަހަރުގެ ފުރަތަމަ 6 މަސް ދުވަހުގެ ތެރޭގައި ޒަކާތު ފަންޑަށް 50 މިލިޔަނަށްވުރެ ގިނަ ރުފިޔާ ޖަމާވެފައިވާކަމަށާއި، މިއަހަރު ނިމޭއިރު މި ޢަދަދު ދެގުނަވުމަކީ އަމާޒެއްކަމަށެވެ.

"މިދިޔަ ހައެއްކަ މަސް ތެރޭގައި 50 މިލިޔަނަށްވުރެ ގިނަ ރުފިޔާ ވަނީ ޒަކާތު ފަންޑަށް ޖަމާވެފައި. އަޅުގަނޑުމެންގެ އަމާޒަކީ އަހަރު ނިމިގެންދާއިރުގައި 100 މިލިޔަނާ ގާތްކުރުން. އެއީ ތާރީޚީ ކަމަކަށްވެގެންދާނެ، އެ އަދަދަށް އަޅުގަނޑުމެންނަށް ވާސިލުވެވިއްޖެކަމަށްވާނަމަ" ވަޒީރު ޑރ. ޝަހީމް ވިދާޅުވިއެވެ.

އިސްލާމީ ކަންތައްތަކާ ބެހޭ ވަޒީރު ވިދާޅުވީ، ޒަކާތު ހައުސްއަކީ ދިވެހިން ފަޚުރުވެރިވާފަދަ މުއައްސަސާއަކަށް ވެގެންދާނެކަމަށް ޤަބޫލުކުރައްވާކަމަށެވެ. އަދި މިކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ފަރާތްޕުޅު ލިބިވަޑައިގަންނަވާ އެހީތެރިކަމާއި އެއްބާރުލުން ވަޒީރު ވަނީ ފާހަގަކުރައްވާފައެވެ.

ދިވެހިރާއްޖޭގެ ޒަކާތު ހައުސްގެ މައިގަނޑު މަސައްކަތްތަކުގެ ތެރޭގައި ޒަކާތް ބަލައިގަތުމުގެ އިންތިޒާމު ހަމަޖެއްސުމާއި، ޒަކާތް ޙައްޤުވާ ފަރާތްތަކަށް ޒަކާތް ދޫކުރުމުގެ އިންތިޒާމުތައް ހަމަޖެއްސުމާއި، ކަމާބެހޭ އިދާރާތަކާ ގުޅިގެން، ފަޤީރުންނާއި މިސްކީނުންގެ ދަފުތަރު އެކުލަވައިލައި އަދާހަމަކޮށް ބެލެހެއްޓުން ހިމެނެއެވެ. ހަމައެހެންމެ ރާއްޖޭގެ ޒަކާތު ފަންޑުގެ މަންފާ ދެމެހެއްޓެނިވި ގޮތެއްގައި ލިބިދިނުމަށްޓަކައި، އެ ފަންޑު ތަރައްޤީކޮށް ކުރިއެރުވުމަށް މަސައްކަތްކުރުންވެސް ހިމެނެއެވެ.