ގަވަރުނަރަކަށް މުނައްވަރު އައްޔަންކުރަން މަޖިލީހުން ފާސްކޮށްފި

މަރުކަޒީ ބޭންކް، އެމްއެމްއޭގެ ގަވަރުނަރަކަށް ކުރީގެ މާލީ ވަޒީރު އަޙްމަދު މުނައްވަރު އައްޔަން ކުރެއްވުމަށް ރައީސުލްޖުމްހޫރިއްޔާއަށް ލަފާއެރުވުމަށް ރައްޔިތުންގެ މަޖިލީހުން ފާސްކޮށްފިއެވެ.

މިއަދު ކުރިއަށްދިޔަ މަޖިލީހުގެ ޖަލްސާގައި ރައީސަށް ލަފާ އެރުވުމަށް ފާސްކޮށްފައިވަނީ މެންބަރުންގެ އިއްތިފާޤުންނެވެ. އެގޮތުން މުނައްވަރު އެމަޤާމަށް އައްޔަންކުރަން ފެންނަކަމަށް 78 މެންބަރުން ވޯޓު ދެއްވިއެވެ.

މުނައްވަރު އެމަޤާމަށް އައްޔަންކުރަން ފާސްކުރީ މަޖިލީހުގެ މާލިއްޔަތު ކޮމިޓީން އިންޓަވިއު ކުރުމަށްފަހު އެމަގާމަށް ޝަރުތުހަމަވާކަށް ނިންމުމާއި ގުޅިގެންނެވެ.

ގަވަރުނަރުގެ މަގާމަށް ކުރީގެ މާލީ ވަޒީރު އަޙްމަދު މުނައްވަރު އައްޔަން ކުރައްވަން ރައީސުލްޖުމްހޫރިއްޔާ ނިންމެވީ ރައްޔިތުންގެ މަޖިލީހުގެ ލަފާފުޅާއެކު އެ މަގާމުގައި ކުރިން ހުންނެވި ޢަލީ ހާޝިމް އެ މަގާމުން ވަކިކުރެއްވުމަށްފަހުއެވެ. އޭނާ މަގާމުން ވަކިކޮށްފައިވަނީ މަގާމުގެ މަސްއޫލިއްޔަތު އަދާނުކުރެވޭ ކަމަށްބުނެ މާލިއްޔަތު ކޮމިޓީއަށް ހުށަހެޅި މައްސަލައަކާ ގުޅިގެންނެވެ.

އެމްއެމްއޭގެ ޤާނޫނު ބަޔާންކުރާގޮތުގައި ގަވަރުނަރުގެ މަގާމަށް ބޭފުޅަކު އައްޔަން ކުރައްވާނީ އަދި އެ މަގާމުން ބޭފުޅަކު ވަކިކުރައްވާނީ މަޖިލީހުގެ ލަފާގެ މަތިން ރައީސުލްޖުމްހޫރިއްޔާއެވެ.

އެމްއެމްއޭގެ ގަވަރުނަރަކަށް މުނައްވަރު އައްޔަންކުރެއްވުމަށް ރުހުންދެއްވި މުނައްވަރު މިހާތަނަށް ހުންނެވީ މާލީ ވަޒީރުގެ އެޑްވައިޒަރުގެ މަގާމުގައެވެ. އޭނާވަނީ 22 ޖޫން 2016އިން 16 ނޮވެމްބަރު 2018 އަށް ރާއްޖޭގެ މާލީ ވަޒީރުގެ މަގާމު އަދާކުރައްވާފައެވެ. އޭގެ ކުރިން 2014ވަނަ އަހަރުން ފެށިގެން 2016 ވަނަ އަހަރާ ހަމައަށް ހުންނެވީ މާލީ ވުޒާރާގެ ސްޓޭޓް މިނިސްޓަރުގެ މަގާމުގައެވެ.

މުނައްވަރަކީ މާލީ ދާއިރާގައި ރާއްޖޭގައި ފާހަގަކޮށްލެވޭ ތަޖުރިބާކާރު ބޭފުޅެކެވެ. މުނައްވަރު ވަނީ މެލޭޝިއާގެ އިސްލާމިކް ޔުނިވަރސިޓީން ބެޗެލަރ އޮފް އިކޮނޮމިކްސް (އޮނަރސް) ހާސިލްކުރައްވާފައެވެ. އަދި އިކޮނޮމިކްސްގެ ދާއިރާއިން މާސްޓަރސް ހާސިލް ކުރެއްވީ އޮސްޓްރޭލިއާގެ މެކުއަރީ ޔުނިވަރސިޓީންނެވެ.

މުނައްވަރުވަނީ 1999ވަނަ އަހަރުން ފެށިގެން 2013ވަނަ އަހަރާ ހަމައަށް އެމްއެމްއޭގައިވެސް ޚިދުމަތް ކުރައްވާފައެވެ. އެގޮތުން، އެ އިދާރާގައި ޚިދުމަތް ކުރެއްވި 14 އަހަރުގެ ތެރޭގައި އިގްތިސާދީ ރިސާރޗްގެ ދާއިރާއިން އެކި މަގާމުތަކުގައި ވަނީ މަސައްކަތްކުރައްވާފައެވެ.

މާލިއްޔަތު ކޮމިޓީގައި މައުލޫމާތު ދެއްވަމުން މުނައްވަރު ވިދާޅުވީ ރާއްޖޭގެ މާލީ ދާއިރާއަކީ ރާއްޖޭގެ އިގްތިސާދު އެންމެ ބޮޑަށް ސިންދަފާތު ކުރެވޭނެ އެއް ދާއިރާ ކަމަށާއި، އޭނާގެ ގަވަރުނަރުކަމުގައި ކުރިއަށް އޮތް ފަސް އަހަރު ދުވަހުގެ ތެރޭގައި އެ ދާއިރާއަކީ މި ސަރަހައްދުގެ އެއްވަނަ ދާއިރާއަށް ހެދުމުގެ އަމާޒު ގެންގުޅުއްވާ ކަމަށެވެ. އަދި އުފެއްދުންތެރިކަމުގެ ނިސްބަތުން ރާއްޖޭގެ މާލީ ދާއިރާއަކީ 6 އިންސައްތަކަމަށާއި ފަސް އަހަރުތެރޭ އެ އަދަދު ދެގުނަ ކުރުމަކީ އަމާޒެއް ކަމަށް މުނައްވަރު ވިދާޅުވިއެވެ.

އެމްއެމްއޭގެ ގަވަރުނަރަކަށް ވުމުން ރައްޔިތުންނަށް ފައިދާހުރި ކަމެއްގައި ސަރުކާރަށް ހުރަސް ނޭޅިނަމަވެސް ރައްޔިތުންނަށް އަދި ޤައުމަށް ގެއްލުންވާ ކަންކަމުގައި ދެކޮޅު ހައްދަވާނެ ކަމަށްވެސް މުނައްވަރު ވިދާޅުވިއެވެ. އަދި އިސްތިއުފާ ދޭންޖެހިއްޖެ ހާލަތެއްގައި އިސްތިއުފާވެސް ދެއްވާނެ ކަމަށްވެސް މުނައްވަރު ވިދާޅުވިއެވެ.