ސައިބަރ ޑިފެންސްގެ ދާއިރާއިން އެހީތެރިކަން ފޯރުކޮށްދިނުމާ ގުޅޭގޮތުން އެމެރިކާއާއެކު މަޝްވަރާކޮށްފި

ސައިބަރ ސެކިއުރިޓީގެ ދާއިރާއިން އެހީތެރިކަން ފޯރުކޮށްދިނުމާ ގުޅޭގޮތުން ދިވެހިރާއްޖެއިން އެމެރިކާއާއެކު މަޝްވަރާކުރައްވައިފިއެވެ.

މި މަޝްވަރާތައް ކުރައްވާފައިވަނީ ދިފާޢީ ވުޒާރާގެ ޑެޕިއުޓީ މިނިސްޓަރ ފާޠިމަތު މިޒުނާ ޢަލީއާއެކު އެމެރިކާގެ ސެކްރެޓަރީ ބިއުރޯ އޮފް ސައިބަރ ސްޕޭސް އެންޑް ޑިޖިޓަލް ޕޮލިސީގެ ޕްރިންސިޕަލް ޑެޕިއުޓީ އެސިސްޓެންޓް ޖެނިފާ ބަޗުސް ބޭއްވެވި ބައްދަލުކުރެއްވުމުގައެވެ.

ދިފާޢީ ވުޒާރާގައި ކުރިއަށްދިޔަ މި ބައްދަލުކުރެއްވުމުގައި ރާއްޖޭގައި ސައިބަރ ޑިފެންސް ސެކްޓަރ އިތުރަށް ހަރުދަނާކުރުމަށް ބޭނުންވާ ވަޞީލަތްތައް ތަރައްޤީކުރުމާގުޅޭގޮތުން ވަނީ މަޝްވަރާކުރައްވާފައެވެ.

Deputy Minister of Defence @mizualee met with Ms Jennifer Bachus from US Department of State, Principal Deputy Assistant Secretary Bureau of Cyber Space and Digital Policy, accompanied by Mr Hugo Yon, the Ambassador of US for Maldives.

Meeting was focused on the capacity… pic.twitter.com/Q7JtK9QzCZ

— Ministry of Defence (@MoDmv) July 29, 2024

ހަމައެހެންމެ މި ދާއިރާއިން ޤައުމީ ފެންވަރުގައި ހެދިފައި ހުރި ސިޔާސަތުތައް އިތުރަށް ހަރުދަނާކުރުމަށާއި، މި ދާއިރާގެ ކުރިއެރުމަށް ދެ ޤައުމު ގުޅިގެން ކުރެވިދާނެ މުހިންމު މަސައްކަތްތަކާ ގުޅޭގޮތުންވެސް ވަނީ މަޝްވަރާކުރައްވާފައެވެ.

މީގެ އިތުރުން ސައިބަރ ސެކިއުރިޓީގެ ދާއިރާގައި އަންހެނުންގެ ބައިވެރިވުން އޮތް މިންވަރާއި، މިދާއިރާގައި އަންހެނުންނަށް ހުރި ފުރުޞަތުތައް އިތުރުކުރުމާ ގުޅޭގޮތުންވެސް މަޝްވަރާކުރައްވާފައިވާކަމަށް ދިފާޢީ ވުޒާރާއިން ވިދާޅުވިއެވެ.

މި ބައްދަލުކުރެއްވުމުގައި އެމެރިކާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ހޫގޯ ޔޮންވެސް ބައިވެރިވެވަޑައިގެންނެވިއެވެ.