ބަންކަރިންގެ ޚިދުމަތް އަންނަމަހު 20ގައި ފަށަނީ، 400 މިލިޔަން ޑޮލަރުގެ އައުު ސިނާޢަތެއް

އިންޓަނޭޝަނަލް ބަންކަރިންގެ ޚިދުމަތް އަންނަ މަހުގެ 20 ވަނަ ދުވަހު ރާއްޖޭގައި ދޭންފެށޭނެކަމަށް އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ. ވަޒީރު މިހެން ވިދާޅުވީ، ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުންނެވެ.

އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވީ، އިންޓަނޭޝަނަލް ބަންކަރިންގެ ޚިދުމަތް ރާއްޖޭގައި ފެށިއްޖެނަމަ އެއިން ބޮޑު ފައިދާއެއް ރާއްޖެއަށް ކުރާނެކަމަށެވެ.

ރާއްޖޭގެ ޖީޑީޕީއަކީ މިހާރު 6.5 ބިލިއަން އެމެރިކާ ޑޮލަރުކަމަށާއި، ބަންކަރިންގެ ޚިދުމަތް ފެށުމުން އޭގެ ތެރެއަށް މުޅިން އަލަށް 400 މިލިއަން ޑޮލަރު ވަދެގެންދާނެކަމަށް ވަޒީރު ވިދާޅުވިއެވެ. މިއާއެކު ހަ ބިލިއަން ދިވެހި ރުފިޔާ މުޅިން އައު ސިނާއަތެއް އުފެދުނީކަމަށް ވަޒީރު ވިދާޅުވިއެވެ.

"އަޅުގަނޑުމެން އިރާދަކުރެއްވިއްޔާ އަންނަ މަހު 20 ގައި އިންޓަނޭޝަނަލް ބަންކަރިންއަށް މިވަންނަނީ އުތުރުގައި. އިންޓަނޭޝަނަލް ބަންކަރިންއަށް ވަންނައިރުގައި 300 އާއި 450 އާއި ދެމެދުގެ އަދަދަކަށް އުތުރުން ދަތުރު އެބަކުރޭ ކޮމާޝިއަލް ބޯޓުފަހަރު. އަޅުގަނޑުމެންނަށް މީގެއިން އެންމެ ޕަސެންޓޭޖެއް ނުވަތަ 2 ޕަސެންޓޭޖް މަސައްކަތާއިއެއްކޮށް ލިބުނަސް މިކަމުގައި އެސްޓީއޯ ރާއްޖޭގެ ފަރާތުން މި ނެރެނީ. އެސްޓީއޯއާއި ޕާޓްނަރ މިކުރަނީ ވިޓޯލް." ވަޒީރު ވިދާޅުވިއެވެ.

މިނިވަން ދުވަހުގެ ރަސްމީ ޖަލްސާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވަނީ އިޤްތިޞާދު ފުޅާކުރުމަށްޓަކައި، ޑައިވައިސިފައި ނުވަތަ ސިންދަފާތު ކުރުމަށްޓަކައި ވަރަށް ގިނަ މަސައްކަތްތަކެއް ކުރެވެމުން އަންނަކަމަށެވެ. އެގޮތުން ފުރަތަމަ ފަހަރަށް އިންޓަރނޭޝަނަލް ބަންކަރިންގ ސަރވިސްގެ ވިޔަފާރި ފެށުމައް ތައްޔާރުވެފައިވާކަމަށާއި، އޮގަސްޓުމަހު ޢަމަލީގޮތުން އެ މަސައްކަތް ރާއްޖޭގައި ފެށޭނެކަމަށް ރައީސް ވިދާޅުވިއެވެ.

"އަބަދު ދައްކާ ވާހަކައެއްގެ ގޮތުގައި އެކަން ނޯވެ، މި އަންނަ މަހު އިރާދަކުރެއްވިއްޔާ ފެށޭނެ. ފެށުނީމަ މިވަނީ ކޮން ކަމެއްތޯ؟ ފެށުނީމަ މިވާގޮތަކީ، ފުރަތަމަ އަހަރު ނިމޭއިރުވެސް، ފުރަތަމަ 12 މަސް ނިމޭއިރުގައިވެސް ޖީ.ޑީ.ޕީ. އަށް އިތުރުކޮށްދޭނެ އިރާދަކުރެއްވިއްޔާ، އިތުރަށް 400 މިލިއަން ޑޮލަރު، އެއް އަހަރުގެ ތެރޭގައި، އެއް އަހަރުގެ ތެރޭގައި. އޭރުން ދަރަނި އެބަ ކުޑަވެގެންދޭ. ޑެބްޓް ޖީ.ޑީ.ޕީ. ދަށްވޭ އެބަ. ދަރަނި ދަށްވޭ އެބަ. އޭގެއިތުރަށްވެސް ގިނަ ފައިދާތައް އެބަ ކުރޭ. ބިޒްނަސް ޕްރޮފިޓް ޓެކްސް، ބީ.ޕީ.ޓީ. އިން ލިބޭ ފައިދާ އެބަ ލިބޭ. ވަޒީފާތައް އެބަ އުފެދޭ. އުތުރުގައި، މިކަން ކުރާ ސަރަޙައްދުގައި ޚާއްޞަކޮށް އުފެދޭނެ. އަދި އެމް.ޕީ.އެލް. އިން ބޭނުންވާނަމަ، ހަމަ ކޮންމެ ސަރަޙައްދަކުންވެސް ރައްޔިތުންނަށް ވަޒީފާ ދެވޭނެ." ރައީސުލްޖުމްހޫރިއްޔާ ވިދާޅުވެފައިވެއެވެ.

އިހަވަންދިއްޕޮޅުގައި ޤާއިމުކުރާ ތެޔޮ ފޯރުކޮށްދޭ އިންޓަރނޭޝަނަލް ބަންކަރިން ޕްރޮޖެކްޓުގެ ޓާރމް ޝީޓުގައި ސްޓޭޓް ޓްރޭޑިން އޯގަނައިޒޭޝަން، އެސް.ޓީ.އޯއިން މަލްޓިނޭޝަނަލް އެނަރޖީ އެންޑް ކޮމިޑިޓީ ޓްރޭޑިންގ ކޮމްޕެނީ ވިޓޯލްއާއެކު މާރިޗުމަހުގެ 13 ގައި ވަނީ ސޮއިކޮށްފައެވެ.

ދުނިޔޭގެ މަޤުބޫލު ބަންކަރިންގެ ޚިދުމަތް ފޯރުކޮށްދޭ ވިޓޯލް ބަންކާސްގެ މެޕުގައި ދިވެހިރާއްޖެ ވަނީ މިހަރު ހިމަނާފައެވެ.

ބަންކަރިން ޚިދުމަތަކީ ކަނޑު ބޯޓުތަކާއި އުޅަނދުތަކަށް ތެޔޮ ފޯރުކޮށްދިނުމެވެ. ބޯޓް ފަހަރު އާއްމުކޮށް ދަތުރުކުރާ ސަރަޙައްދުތަކުގައި އެފަދަ ޚިދުމަތެއް ފެށިއްޖެނަމަ ބޯޓް ފަހަރު އެތަންތަނަށް މަޑުކޮށް ތެޔޮ އަޅައިހަދައެވެ. މިގޮތަށް ތެޔޮ ވިއްކުމަކީ ރަނގަޅު ފައިދާއެއް ލިބޭ ޚިދުމަތެއްކަމުން މިއީ ރާއްޖޭގެ އިޤްތިޞާދު ފުޅާކުރުމަށް މުހިންމު ސިނާޢަތަކަށްވާނެކަމަށް ސަރުކާރުން ވިދާޅުވެއެވެ.

އިހަވަންދިއްޕޮޅުގައި ބަންކަރިންގެ ޚިދުމަތް ފަށަން ތައްޔާރުވެފައިވާއިރު، ސަރުކާރުން ވަނީ ލ. ގާދޫގައިވެސް ބަންކަރިންގެ ޚިދުމަތާއެކު ކޮމާޝަލް ޕޯޓާއި ލޮޖިސްޓިކްސް ހިމެނޭ ގޮތަށް ކޮމާޝަލް ހާބަރެއް ހެދުމަށް ނިންމާފައެވެ. އެކަމަށްޓަކައި ހިންގާ ލ. އިންޓަގްރޭޓެޑް މެރިޓައިމް ހަބް މަޝްރޫޢު ތަރައްޤީކުރުމުގެ އެއްބަސްވުމުގައި ސަރުކާރުން މިހާރު ވަނީ ޗައިނާގެ ކުންފުންޏަކާއެކު ސޮއިކޮށްފައެވެ.