މި އަހަރުގެ މަސްވެރިންގެ ދުވަސް ފާހަގަކުރުމަށް ކަނޑައަޅާފައިވާ ގއ. ގެމަނަފުށީގައި، މަސްވެރިންގެ ދުވަހާ ގުޅުވައިގެން ކުރައްވަން ހުރި ބައެއް ކަންތައްތަކާ ބެހޭގޮތުން، ފިޝަރީޒް މިނިސްޓްރީގެ ޓީމެއް ގެމަނަފުށި ކައުންސިލާ ބައްދަލުކޮށް މަޝްވަރާކޮށްފިއެވެ.
ތިރީސް ހަވަނަ މަސްވެރިންގެ ދުވަހުގެ ރަސްމިއްޔާތު ހުވަދުއަތޮޅު އުތުރުބުރީ ގެމަނަފުށީގައި ބޭއްވުމަށް ސަރުކާރުން ނިންމަވައި، އެކަން އިޢުލާންކުރެއްވީ މިދިޔަމަހު ރައީސުލްޖުމްހޫރިއްޔާ އެރަށަށް ކުރެއްވި ދަތުރުފުޅުގައެވެ. ގެމަނަފުށީ ކައުންސިލާއި ފިޝަރީޒް މިނިސްޓްރީންގެ ޓީމުގެ މެދުގައި ގެމަނަފުށީގައި ބޭއްވެވި ބައްދަލުވުމުގައި މަސްވެރިންގެ ދުވަހާ ގުޅުވައިގެން މިނިސްޓްރީގެ ފަރާތުން އިސްނަންގަވައިގެން ކުރައްވާނޭ ކަންތައްތަކުގެ މަޢުލޫމާތާއި، ދުވަހާ ގުޅުވައިގެން ރަށުގައި ބާއްވާނޭ މުހިންމު އިވެންޓްތަކާ ގުޅޭ މަޢުލޫމާތު ޙިއްޞާކޮށްފައިވެއެވެ. އަދި އެމުނާޞަބަތާ ގުޅުވައިގެން ރަށުގެ ފަރާތުން ކުރަންޖެހޭ ކަންތައްތަކާ ގުޅޭގޮތުންވެސް މަޝްވަރާކުރެއްވިއެވެ. މީގެއިތުރުން މިދަތުރުގައި ގެމަނަފުށީގައި މަސްވެރިންގެ ދުވަސް ފާހަގަކުރުމަށްޓަކައި މުހިންމު އިވެންޓްތައް ބާއްވާނޭ ތަންތަން ބަލައި، ފާއިތުވި ހަފްތާގެ ތެރޭގައި ގެމަނަފުށީ ކައުންސިލާއި ރައްޔިތުންނާއި ބައްދަލުކޮށް، ދުވަހާ ގުޅޭގޮތުން މަޢުލޫމާތު ޙިއްޞާކޮށް، ރަށުގައި ބާއްވާނެ ކުޅިވަރު ޕްރޮގްރާމްތަކާ ގުޅޭގޮތުން މަޝްވަރާކޮށްފައިވާ ކަމަށްވެސް ފިޝަރީޒް މިނިސްޓްރީން ވިދާޅުވެއެވެ. އަދި މަސްވެރިންގެ ދުވަހާ ގުޅޭގޮތުން މިނިސްޓްރީއާއެކު މަސައްކަތް ކުރާނެ ޓާސްކްފޯސްއެއް އެކުލަވާލުމުގެ މަސައްކަތްވެސް ކުރިއަށް ގެންދަވާފައިވާ ކަމަށް ފިޝަރީޒް މިނިސްޓްރީން ވިދާޅުވިއެވެ.