ދިވެހިރާއްޖެ އާއި އީރާނާއި އެކު އޮތް ޑިޕްލޮމެޓިކް ގުޅުން ކަނޑާލަން ދިވެހި ސަރުކާރުން މިއަދު ނިންމަވައިފިއެވެ.
ދިވެހި ސަރުކާރުން މިގޮތަށް ނިންމެވީ، ޢަރަބި ގަލްފު ސަރަޙައްދުގެ ހަމަޖެހުމާއި ސުލްޙަ ދެމެހެއްޓުމަކީ، ރާއްޖޭގެ ސަލާމަތާއި ހަމަޖެހުމާއިވެސް ގުޅިފައިވާ ކަމަކަށްވާތީ އާއި ނަމަވެސް، އެސަރަޙައްދުގެ ސުލްޙައަށް އީރާނުން ހުރަސްއަޅަމުން ގެންދާ ދިއުމަކީ ރާއްޖެއިން އެކަން ކުށްވެރިކުރާ ކަމެއް ކަމަށްވާތީ ކަމަށް ދިވެހި ޚާރިޖިއްޔާއިން ވިދާޅުވެއެވެ.
މިދިޔަ އެޕްރީލް މަހު ތުރުކީގައި ބޭއްވި އިސްލާމިކް ސަމިޓުގައި، އިސްލާމީ ޤައުމުތަކުން ވަނީ “އެހެން ޤައުމުތަކުގެ ދާޚިލީ ކަންކަމަށް ނުފޫޒު ނުފޯރުވައި، ޤައުމުތަކުގެ މިނިވަންކަމާއި އިސްތިޤްލާލަށް އިޙްތިރާމް ކުރުމަށާއި ދެބަސްވުމާއި ޙިޔާލުތަފާތުވުންތައް ނައްތާލުމުގައި އޯ.އައި.ސީ އާއިި އދ.ގެ ޗާޓަރާއި އެއްގޮތަށް ސުލްޙަވެރި ގޮތްތައް އިޙްތިޔާރު ކުރުމަށް" އިރާނަށް ގޮވާލާފައެވެ.
ރާއްޖެއިން އަބަދުވެސް ދެކެން ބޭނުންވަނީ އޯ.އައި.ސީއިން ގޮވާލާފައިވާ ކަންތައްތައް ފުރިހަމައަށް، އަދި ނަތީޖާ ނެރެވޭނެ ގޮތަކަށް، އީރާނުން ތަންފީޒުކުރުން ކަމަށްވެސް ދިވެހި ޚާރިޖިއްޔާއިން ވިދާޅުވެފައިވެއެވެ.
ރާއްޖެއިން އިރާނާއެކު ޑިޕްލޮމެޓިކް ގުޅުން ގާއިމުކުރީ 2 ޖޫން 1975 ގައެވެ.