ރައީސުލްޖުމްހޫރިއްޔާ ޤައުމުގެ ތަރައްޤީއަށް ކުރައްވާ މަސައްކަތްޕުޅަށް އުނދަގޫކޮށް، ޤައުމުގެ ތަރައްޤީއަށް ހުރަސްއެޅުމަކީ އެންމެ ބޮޑު ކުށުގެ ކުށެއްކަމަށް އިޤްތިޞާދީ ތަރައްޤީއާބެހޭ ވަޒީރު މުޙައްމަދު ސަޢީދު ސިފަކުރައްވައިފިއެވެ.
ވަޒީރު މިހެން ވިދާޅުވީ، ދިވެހިންގެ އެއަރޕޯޓުގެ ރަންޔޫބީލް ފާހަގަކުރުމަށް ބޭއްވެވި ރަސްމިއްޔާތުގައި ވާހަކަފުޅު ދައްކަވަމުންނެވެ.
އިބްރާހީމް ނާޞިރު އިންޓަރނޭޝަނަލް އެއަރޕޯޓަށް ދުނިޔޭގެ 38 އެއަރލައިނަކުން ޝެޑިއުލް ދަތުރުތައްކުރެއެވެ. އޭގެތެރޭގައި ދުނިޔޭގެ އެންމެ ފަޚުރުވެރި މަރުކާގެ ބޯޓުތައްވެސް ހިމެނެއެވެ.
އިބްރާހީމް ނާޞިރު އިންޓަރނޭޝަނަލް އެއަރޕޯޓް ހިންގާ އެމްއޭސީއެލްގައި 2500 މުވައްޒަފުން މަސައްކަތްކުރެއެވެ. މީގެތެރެއިން 98 އިންސައްތައަކީ ދިވެހިންނެވެ. މިއީއެންމެ ގިނަ ޢަދަދެއްގެ މީހުން ވަޒީފާ އަދާކުރަމުން އަންނަ، ސަރުކާރުގެ ކުންފުންޏެވެ. އަދި މިއީ ދައުލަތަށް އެންމެ މަތީ ޓެކްސްއާއި އެންމެ ބޮޑު ފައިދާ ލިބެމުން އަންނަ ކުންފުނިވެސްމެއެވެ.
އެއަރޕޯޓަށް ބައިޤަރުނު ފުރުން ފާހަގަކުރުމަށް ދަރުބާރުގޭގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން އިޤްތިޞާދީ ތަރައްޤީއާބެހޭ ވަޒީރު މުޙައްމަދު ސަޢީދު ވަނީ މި ދިގު ތާރީޚުގައި މިހާތަނަށް ދިވެހިން ނުދެކޭފަދަ ބޮޑު ތަރައްޤީއެއް ގެނައުމަށް އަދުގެ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ފަށްޓަވާފައިވާ މަޝްރޫޢުގެ އުންމީދުތައް ފާހަގަކުރައްވައި ވާހަކަފުޅު ދައްކަވާފައެވެ. ވަޒީރު ސިފަކުރެއްވީ، ރައީސުލްޖުމްހޫރިއްޔާ ޢަބްދުﷲ ޔާމީން އެއަރޕޯޓަށާއި، ޤައުމަށް ގެންނަވަން މަސައްކަތްކުރައްވާ ތަރައްޤީއަށް އުނދަގޫކޮށް ހުރަސްއެޅުމަކީ ޤައުމީ ބޮޑު ކުށެއް ކަމަށެވެ. ރާއްޖޭގެ ކުރީގެ ވެރިއެއްނަމަވެސް، ނުވަތަ އެއްވެސް ދުވަސްވަރެއްގައި ވެރިކަން ކުރެއްވި ބޭފުޅެއްނަމަވެސް އެފަދަ ޢަމަލެއް ކުރައްވައިފިނަމަ އެއީ ގޯސް ޢަމަލެއްކަމަށް ވަޒީރު ވިދާޅުވިއެވެ.
މިނިސްޓަރ މުޙައްމަދު ސަޢީދު ވަނީ، ތަރައްޤީގެ މަސައްކަތަށް ހުރަސް އެޅުއްވުމުގެ ބަދަލުގައި "ކިޔަވާ ވިދާޅުވުމަށް" އެފަދަ ފަރާތްތަކަށް ގޮވާލައްވާފައެވެ. އަދި ރާއްޖެ ތަރައްޤީއަށް ކުރާ ހަލުވި ދަތުރުގެ މާލިމީއަކަށް މިއަދު ހުންނެވީ ދުރުވިސްނިވަޑައިގަންނަވާ، އަދި ރާއްޖެއަށް ހަލަބޮލި މޫސުމެއް ކުރިމަތީގައި އޮތްކަން އެނގިވަޑައިގެން ހުންނެވި އަދި ބޭރުންނާއި އެންމެ އެތެރެއިންވެސް ގޮންޖެހުންތައް އެބަ އޮތްކަން ދެނެވަޑައިގެން ހުންނެވި ހުޝިޔާރު ސިޔާސީ ލީޑަރެއްކަމަށްވެސް މިނިސްޓަރ ސައީދު ވިދާޅުވިއެވެ.
މިރަސްމިއްޔާތުގައި އެއަރޕޯޓް ހިންގާ، އެމްއޭސީއެލްގެ މެނޭޖިންގ ޑިރެކްޓަރ ޢާދިލް މޫސާ ވިދާޅުވީ، ދިވެހިންގެ އެއަރޕޯޓަށް ބައިގަރުނަ ފުރިފައިވާއިރު، މިއީ ބައިނަލްއަޤްވާމީ ދުނިޔެއަށްވެސް ރާއްޖެ ހުޅުވުނުތާ ބައިޤަރުނަ ފުރުންކަމަށެވެ. އަދި މިއީ ވިޔަފާރިއަށާއި، ޞިއްޙަތާއި، ތަޢުލީމް އަދި އިޖްތިމާޢީ ތަރައްޤީ ހޯދުމުގެ ދަތުރުގައި ރާއްޖެ އުދުހެން ފެށިތާ ފަންސާސް އަހަރު ފުރުންކަމުގައި ވިދާޅުވިއެވެ. އެމްއޭސީއެލްގެ މެނޭޖިންގ ޑިރެކްޓަރގެ ވާހަކާގައި، ދުނިޔޭގެ އެންމެ މަޤްބޫލް އެވޯޑުތައް މި އެއަރޕޯޓް ޙާޞިލްކުރަމުން ގެންދާކަން ފާހަގަކުރެއްވިއެވެ.