ކޮލެޖު ހިންގާތާ 15 އަހަރުވުމުން ޔުނިވަރސިޓީއެއްގެ ދަރަޖަ ލިބޭގޮތަށް ޤާނޫނަށް އިސްލާހެއް

ރާއްޖޭގައި ކޮލެޖު ހިންގާތާ 15 އަހަރުވުމުން ޔުނިވަރސިޓީއެއްގެ ދަރަޖަ އެކޮލެޖަކަށް ލިބޭގޮތަށް ޤާނޫނަށް އިސްލާހު ހުށަހަޅައިފިއެވެ.

ދިވެހިރާއްޖޭގެ މަތީ ތަޢުލީމާއި ތަމްރީނުގެ ޤާނޫނަށް އިސްލާހު ހުށަހެޅުމުގެ ބިލު ރައްޔިތުންގެ މަޖިލީހަށް ހުށަހެޅުއްވީ މާފަންނު ދެކުނު ދާއިރާގެ މެންބަރު އަބްދުﷲ ރިފާޢުއެވެ.

ޤާނޫނަށް އިސްލާހު ހުށަހެޅުއްވި ސަބަބެއް ކަމަށް މާފަންނު ދެކުނު ދާއިރާގެ މެންބަރު އަބްދުﷲ ރިފާޢު ވިދާޅުވެފައިވަނީ މަތީ ތަޢުލީމުގެ ދޮރު މިހާރަށްވުރެ ބޮޑަށް ހުޅުވާލައި ވާސީލަތްތަކާއި ޤާބިލުކަން ހުރިފަރާތްތަކަށް ރާއްޖޭގައި ޔުނިވަރސިޓީ ތަޢުލީމު ފޯރުކޮށްދިނުމުގެ ފުރުސަތު ފަހިކޮށްދިނުން ކަމަށެވެ. މިހާރު ރާއްޖޭގައި ޔުނިވަރސިޓީގެ ގޮތުގައި ހިންގަމުންދަނީ ޤާއުމީ ޔުނިވަރސިޓީ އާއި އިސްލާމިކް ޔުނިވަރސިޓީ އޮފް މޯލްޑިވްސް، އައިޔޫއެމްއެވެ.

ޤާނޫނުގައި މިހާރު އޮތްގޮތުން ރާއްޖޭގައި ޔުނިވަރސިޓީއެއްގެ ގޮތުގައި ރަޖިސްޓްރީކުރެވޭނީ ކޮލެޖެއްގެ ގޮތުގައި ރާއްޖޭގައި މެދުކެނޑުމެއްނެތި ހިންގަމުން އަންނަތާ މަދުވެގެން 20 އަހަރުވެފައިވާ ތަންތަނެވެ. ރާއްޖޭން ބޭރު ޤައުމެއްގައި އެ ޤައުމުގެ ސަރުކާރުން ބަލައިގަންނަ ޔުނިވަރސިޓީއެއްގެ ގޮތުގައި ރަޖިސްޓްރީވެ ހިންގަމުން އަންނަތާ 10 އަހަރުވެފައިވާ ތަންތަނަށްވެސް މި ޤާނޫނުގެ ދަށުން ޔުނިވަރސިޓީގެ ގޮތުގައި ރަޖިސްޓްރީކުރެވެއެވެ. ޤާނޫނަށް ހުށަހަޅާފައިވާ އިސްލާހުގައި ވަނީ 20 އަހަރުގެ މުއްދަތު 15 އަހަރަށް ދަށް ކުރުމަށެވެ.

މީގެ އިތުރުން ޔުނިވަރސިޓީއެއްގެ ގޮތުގައި ކަނޑައެޅުމަށް ޤާނޫނުގައި މިނިސްޓްރީން ކަނޑައަޅާ މިންގަނޑުތަކަށް ފެތޭ، ޔުނިވަރސިޓީއެއް ހިންގުމަށް އެކަށީގެންވާ ވަސީލަތްތައް ޤާއިމުކުރެވިފައިވުންކަމަށް ބަޔާންކޮށްފައިވާ މާއްދާވެސް އިސްލާހު ކުރުމަށް ވަނީ ހުށަހަޅުއްވާފައެވެ. އެގޮތުން، ކޮލެޖެއް ޔުނިވަރސިޓީއަކަށް ބަދަލުކުރުމަށް އެދޭއިރު އެ ކޮލެޖެއްގައި ހުންނަ ޖެހޭ ޝަރުތުތައް ތަފްސީލުކޮށް މި އިސްލާހުގައި ވަނީ ބަޔާންކޮށްފައެވެ.

ކޮލެޖަކަށް ޔުނިވަރިސޓީއެއްގެ ދަރަޖަދެވޭ ޝަރުތުތަކުގެ ތެރޭގައި އަރޓް އެންޑް ހިއުމަނިޓީޒް އާއި އިންޖިނިއަރިން އެންޑް ޓެކްނޮލޮޖޫ އާއި ލައިފް ސައިންސަ އެންޑް މެޑިސިން އާއި ނެޗުރަލް ސައިނަށާއި ސޯޝަލް ސައިންސްފަދަ ދާއިރާތަކުގެ ތެރެއިން މޯލްޑިވްސް ނޭޝަނަލް ކޮލިފިކޭޝަން ފްރޭމްވަރކްގެ ލެވެލް 7 އަދި ލެވެލް 9 ގެ މަދުވެގެން 3 ދާއިރާއަކުން ޕްރޮގްރާމްތައް ހިންގާ ކޮލެޖަކަށްވާން ޖެހޭނެކަމަށް ވަނީ ބަޔާންކޮށްފައެވެ. އަދި ލެވެލް 7ން ފެށިގެން މަތީގެ ކޯސްތަކުގައި ކިޔަވަމުންދާ ދަރިވަރުންގެ އަދަދު 1000 އަށްވުރެ ގިނަވާންޖެހޭނެކަންވެސް ވަނީ ބަޔާންކޮށްފައެވެ.

ބައިނަލްއަގުވާމީ ޔުނިވަރސިޓީ ރޭޓިން ނުވަތަ ރޭންކިންއެއްގައި ބައިވެރިވެ، ރޭޓުކުރެވި ނުވަތަ ރޭންކު ކޮށްފައިވާ ކޮލެޖަކަށްވުން ނުވަތަ އެފަދަ ރޭޓިންއެއްގައި ދަރަޖަ ކުރެވިފައިވާ ޔުނިވަރސިޓީއެއްގެ ޕްރޮގްރާމް ހިންގާތާ މަދުވެގެން ފަސް އަހަރު ދުވަހުގެ ތަޖުރިބާ ލިބިފައިވާ ކޮލެޖަކަށްވާން ޖެހޭނެކަމަށްވެސް ޤާނޫނަށް ހުށަހެޅި އިސްލާހުގައި ވަނީ ބަޔާންކޮށްފައެވެ. އަދި ބައިނަލްއަގުވާމީ ޔުނިވަރސިޓީތައް ބައިވެރިވާ ޖަމާއަތެއްގެ މެންބަރެއްގެ ގޮތުގައާއި ބައިނަލްއަގުވާމީ ކޮލިޓީ އެޝޫރެންސް ޖަމާއަތެއްގެ މެންބަރެއްގެ ގޮތުގައި މަދުވެގެން ފަސް އަހަރު ހޭދަކޮށްފައިވާ ކޮލެޖުތަކާއި ބައިނަލްއަގުވާމީ ފެންވަރުގެ ރިސަރޗް މަސައްކަތްތަކާއި ބޭރުގެ ޔުނިވަރސިޓީތަކާއި ކޮލެޖު ހިންގުމުގެ ތަޖުރިބާ ލިބިފައިވާ ކޮލެޖުތަކަށްވެސް ޔުނިވަރސިޓީގެ ދަރަޖަ ލިބޭނެ ކަމަށް ވަނީ ކަނޑައަޅާފައެވެ.

މީގެ އިތުރުން ކޮލެޖުގެ އެކެޑެމިކް ޕްރޮގްރާމުތަކުގައި ކިޔަވައިދޭ މުވައްޒަފުންގެ މަދުވެގެން 10 އިންސައްތައަކީ ޕީއެޗްޑީ ހާސިލްކޮށްފައިވާ މުވައްޒަފުންކަމަށް ވާންޖެހޭނެ ކަމަށާއި ކޮލެޖުގައި މިނިސްޓްރީން ކަނޑައަޅާ މިންގަނޑުތަކަށް ފެތޭ ވަސީލަތްތައް ގާއިމުކޮށްފައިވާ ކޮލެޖަކަށްވާން ޖެހޭނެ ކަމަށްވެސް ޤާނޫނަށް ހުށަހަޅުއްވާފައިވާ އިސްލާހުގައި ވަނީ ބަޔާންކޮށްފައެވެ.