ޢަލީ ޙާޝިމް ގަވަރުނަރުކަމުގެ މަޤާމުން ވަކިކުރުމުގެ މައްސަލަ ދިރާސާކުރަން ކޮމިޓީއަށް

އިޤްތިޞާދީ ކާރިސާއިން ޤައުމު ސަލާމަތްކުރުމަށް މަރުކަޒީ ބޭންކުގެ ގަވަރުނަރުގެ ހައިސިއްޔަތުން މަސައްކަތްކޮށްފައިނުވާކަމަށް ބުނެ، ގަވަރުނަރުގެ މަޤާމުން ޢަލީ ޙާޝިމް ވަކިކުރެއްވުމާ ގުޅޭ މައްސަލަ ދިރާސާކުރަން ކޮމިޓީއަށް ފޮނުވައިފިއެވެ.

މަރުކަޒީ ބޭންކުގެ ގަވަރުނަރު ޢަލީ ޙާޝިމް މަޤާމުން ވަކިކުރުމަށް ރައީސުލްޖުމްހޫރިއްޔާއަށް ލަފާދެއްވާ މާލިއްޔަތު ކޮމިޓީން ފޮނުވި ސިޓީ ވަނީ މަޖިލީހުގެ ތަޅުމަށް އިއްވާފައެވެ. އަދި އެ މައްސަލަ ދިރާސާކުރަން ވަނީ މާލިއްޔަތު ކޮމިޓީއަށް ފޮނުއްވާފައެވެ.

މާލިއްޔަތު ކޮމިޓީން މަޖިލީހުގެ ރައީސަށް ފޮނުއްވި ސިޓީގައި ވަނީ އެމްއެމްއޭގެ މަސްޢޫލިއްޔަތުތަކުގެ ތެރޭގައި ދެމެހެއްޓެނިވި އިޤްތީޞާދީ ކުރިއެރުމަށް މަގުފަހިވާގޮތަށް ޕްރައިސް ސްޓެބިލިޓީ ދެމެހެއްޓުމާއި، ފައިނޭޝަން ސްޓެބިލިޓީ ދެމެހެއްޓުމާއި، ރާއްޖޭގެ އިޤްތިޞާދީ ހަމަޖެހުމާއި ކުރިއެރުމަށް ސަރުކާރަށް އެހީވުން ހިމެނޭކަމަށް ބަޔާންކޮށްފައެވެ. އަދި ޤައުމުގެ އިޤްތިޞާދު ކުރިއަށް ގެންދިއުމުގައި އޮތް ދެ އަސާސަކީ ފިސްކަލް ޕޮލިސީއާއި މަނިޓަރީ ޕޮލިސީކަމަށް ވީހިނދު ފިސްކަލް ޕޮލިސީއަކީ ސަރުކާރުގެ ޚަރަދުތައް ބައްޓަންކުރާނެގޮތާއި، އެކިއެކި ކަންކަމުގައި ޓެކްސްގެ މިންގަނޑުތައް ކަނޑައެޅުންފަދަ އިޤްތިޞާދީ ކަންކަމުގައި ސަރުކާރުން ޢަމަލުކުރާނެ އުސޫލުތައްކަމަށް ސިޓީގައިވެއެވެ. އަދި މަނިޓަރީ ޕޮލިސީއަކީ އިޤްތިޞާދުގެތެރޭގައި ދައުރުވާ ފައިސާ ކަނޑައެޅުމާއި، ބޭންކިން އުސޫލުގެ ތެރެއިން އިންޓްރެސްޓް ރޭޓް ކަނޑައެޅުންފަދަ ސީދާގޮތެއްގައި އިޤްތިޞާދީގޮތުން ކަނޑައެޅުންކަމަށްވެސް އެ ސިޓީގައި ބަޔާންކޮށްފައިވެއެވެ.

އިޤްތިޞާދީ މި ދެ އަސާސަކީ ޤައުމުގެ އިޤްތިޞާދާ ކުރިއރުމަށް މުހިންމު ދެ އަސާސްކަމަށްވާއިރު، ޤައުމުގެ އިޤްތިޞާދު ހީނަރުވެ އިއާދަކުރަން އުދަނގޫ ހިސާބަކަށް ދިޔައިރު އެމްއެމްއޭގެ ޤާނޫނުގައި ބުނާ މަޤްޞަދު ހާސިލްކުރެވިފައި ނެތްކަމަށް ބުނެފައިވެއެވެ. އަދޮ މަނިޓަރީ ޕޮލިސީ ރަނގަޅަށް ހިނގާތަން ފެންނަން ނެތްކަނވެސް ފާހަގަކޮށްފައިވެއެވެ.

ކޮމިޓީން ފާހަގަކުރި ކަންކަން

1- ރާއްޖޭގައި ހިންގާ ބޭންކުތަކާއި ފައިނޭންޝަލް އިންސްޓިޓިއުޝަންތަކުން އާންމުންނަށް ލޯނު ދޫކުރާ މިންވަރު ނުސީދާކޮށް އެމްއެމްއޭއިން ހިފަހައްޓައި ބޭންކުތަކުގެ ނިޒާމު އެއްމިނެއްގައި ހިފެހެއްޓުމަށް ގަވަރުނަރު ބާރު އަޅުއްވާފައިވުން. މީގެ ސަބަބުން އިގްތިޞާދުގެ ތެރޭގައި ދައުރުވާން ހުރި ފައިސާ މަދުވެ، އިގްތިސާދީ މަސައްކަތްތައް ހުއްޓި، އިގްތިސާދީ ދުވެލި މަޑުޖެހިފައިވުން.

2-ސަރުކާރުން ފައިސާ ހޯދަމުންދަނީ ޑޮމެސްޓިކް މާކެޓުންކަންވާއިރު، އެމާކެޓް ރަނގަޅަށް ރެގިއުލޭޓް ކުރުމުގެ މުހިންމުކަން ބޮޑުވެފައިވާ ދަނޑިވަޅެއްގައި އެކަން ކުރަމުންދާތަން ނުފެނުން.

3- ދާޚިލީ ސަލާމަތާއި ފަންނިއްޔާތާބެހޭ ވުޒާރާއާއި ފުލުހުންގެ ފަރާތުން މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީއާ ހިއްސާކޮށްފައިވާ މައުލޫމާތްތަކުގައި ކުށްކުރުމަށް ހުރި ގޮންޖެހުންތަކުގެ ތެރޭގައި އެމްއެމްއޭގެ ގަވާއިދުތައް އަދާހަމަކުރެވިފައިނުވާ މައްސަލަ.

4- އެމްއެމްއޭގެ ޤާނޫނުގައި ޞަރީޙަ އިބާރާތުން ބަޔާންކޮށްފައިވާ މައިގަނޑު މަގުސަތުތައް ހާސިލްކުރުމަށް 17 ނޮވެމްބަރުން ފެށިގެން މިހާތަނަށް ސަރުކާރަށް ލަފާ ދިނުމާއި އެ މަގުސަދު ހާސިލްކުރުމަށް އަމަލީގޮތުން ހަރުދަނާ މަސައްކަތްތަކެއް ކޮށްފައިނުވުން.

5- ޤައުމުގެ އިގްތިސާދު ހީނަރުވެ، ޤައުމު ބޮޑު އިގްތިސާދީ ކާރިސާއަކުން ސަލާމަތްކުރުމަށް އެމްއެމްއޭއަކީ މުހިންމު މަސައްކަތްތަކެއް ކުރަންޖެހޭ މުއައްސަސާއަކަށްވާއިރު އެމްއެމްއޭގެ އިސްވެރިޔާގެ ހައިސިއްޔަތުން ގަވަރަނަރުގެ މަސްއޫލިއްޔަތުތައް އެންމެ ފުރިހަމަގޮތުގައި އަދާކޮށްފައިނުވުން.

6- މިދަނޑިވަޅަކީ އެމްއެމްއޭއިން މަނިޓަރީ ޕޮލިސީގެ މިސްރާބު ބަދަލުކުރަންޖެހޭނަމަ އެކަން ކުރަންޖެހޭ ވަގުތުކަމުން މަރުކަޒީ ބޭންކަށް އައު ލީޑަރޝިޕެއް ބޭނުންވާކަން ފާހަގަކޮށްފައިވުން.

އެހެންކަމުން ގަވަރުނަރު ޢަލީ ޙާޝިމް މަޤާމުން ވަކިކުރުމަށް ލަފާކުރަން ފެންނަކަމަށް އެ ސިޓީގައިވެއެވެ.

މިއާއެކު މަޖިލީހުގެ ރިޔާސަތުންވަނީ ޢަލީ ޙާޝިމް ގަވަރުނަރުގެ މަޤާމުން ވަކިކުރުމުގެ މައްސަލަ ދިރާސާކުރުމަށް މާލިއްޔަތު ކޮމިޓީއަށް ފޮނުއްވާފައެވެ. ޢަލީ ޙާޝިމް ގަވަރުނަރުގެ މަޤާމަށް އައްޔަންކޮށްފައިވަނީ 2019 ވަނަ އަހަރުގެ ސެޕްޓެމްބަރު މަހުގެ 8 ވަނަ ދުވަހުއެވެ.