އައްޑޫއަށް ވެވަޑައިގެންނެވި ވަޢުދުތައް ރައީސުލްޖުމްހޫރިއްޔާ ފުއްދަވާނެ: ޝާހިދު

އައްޑޫ ސިޓީގެ ތަރައްގީއަށް ރައީސުލްޖުމްހޫރިއްޔާ ވެވަޑައިގެންނެވި ވައުދުތައް ފުއްދަވާނެކަމުގެ ޔަގީންކަން އެބައޮތްކަމަށް ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު މުޙައްމަދު ޝާހިދު ވިދާޅުވެއްޖެއެވެ.

ޝާހިދު މިހެން ވިދާޅުވީ ޕީއެންސީގެ ހަރުގެ، ޕީއެންސީ ހައުސް ހުޅުވުމަށް ރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

ޝާހިދު ވިދާޅުވީ އައްޑުއަށްޓަކައި ރައީސް ވެވަޑައިގެންނެވި ވައުދުތަކަކީ އެ މަނިކުފާނު ދެއްކެވި ހުވަފެންތަކެއް ނޫން ކަމަށެވެ. އަދި އެ ވައުދުތައް ފޮތެއްގެ ޝާޢިއުކުރައްވާފައި އޮތުމަކީވެސް ވައުދުތައް ފުއްދަވާނެކަން ހާމަވާކަމެއްކަމަށްވެސް ޝާހިދު ވިދާޅުވިއެވެ. އަދި އައްޑޫގެ ރައްޔިތުންގެ އެންމެ ބޮޑު އުއްމީދެއް ގުޅިފައިވަނީ ހިތަދުއާއި މީދޫ ގުޅާލާ ބްރިޖާއި ކަމަށާއި މިއަހަރު ތެރޭގައި އެ މަސައްކަތްވެސް ފެށުމަށް ސަރުކާރުން މަސައްކަތް ކުރަމުން އަންނަ ކަމަށްވެސް ޝާހިދު ވިދާޅުވިއެވެ.

އައްޑޫގެ އިގްތިސާދު ކުރިއެރުވުމަށް ޝަންގްރިއްލާއަކީ މުހިންމު ރިސޯޓެއްކަން ފާހަގަކުރައްވައި ޝާހިދު ވިދާޅުވީ އެ ރިސޯޓު ހިންގަމުން ދިޔަ ފަރާތްތަކާއި ގުޅިގެން އަލުން ރިސޯޓު ހުޅުވުމަށް އެންމެ ފަހުގެ މަޝްވަރާތައް ސަރުކާރުން ކުރަމުން އަންނަ ކަމަށެވެ. އަދި އެ ރިސޯޓުވެސް މާ ގިނަ ދުވަހެއްނުވެ ހުޅުވިގެންދާނެކަމަށްވެސް ޝާހިދު ވިދާޅުވިއެވެ.

އައްޑޫގެ ފިޝަރީޒް ކޮމްޕްލެކްސްގައި މިދިޔަ ބުރާސްފަތި ދުވަހުން ފެށިގެން ކުރަމުން އަންނަ އިހުތިޖާޖުތަކަށް އިޝާރާތް ކުރައްވައި ޝާހިދު ވިދާޅުވީ މަސްވެރިންނަށް ޖެހިފައިވާ ތަކުލީފާއި ނިކަމެތިކަމަކީ މިއަދު ދިމާވެގެން އުޅޭ ކަމެއް ނޫން ކަމަށެވެ. އަދި ނިމިދިޔަ ސަރުކާރުން ރިޔާސީ އިންތިޚާބުގެ ދެވަނަ ބުރާ ދިމާކޮށް މަސް ކިލޯއެއްގެ އަގު 25 ރުފިޔާއަށް ބޮޑުކޮށްފައިވަނީ މި ސަރުކާރަށް ބުރަބޮޑު ކުރަން ކަމަށާއި، ނަމަވެސް ބޮޑު ދަރަންޏަކާއެކުވެސް މި ސަރުކާރުން މަސްވެރިންނަށް ދޭން ޖެހޭ ފައިސާ ދެމުން އަންނަކަން ޝާހިދު ފާހަގަކުރެއްވިއެވެ.

"މި އީދު ބަންދު އައުމުގެ ކުރީގައިވެސް އައްޑޫގެ މަސްވެރިންނަށާއި މުޅި ރާއްޖޭގެ މަސްވެރިންނަށް މިފްކޯއިން މިވަނީ ފައިސާ ދޫކޮށްފައި. ފައިސާ ދޫކުރަންޖެހޭ އަދަދަށް ބަލާއިރު މިހާރު މިއިނީ ވަރަށް ކުޑަ އަދަދެއް. ސަރުކާރުން މިދަނީ އީދު ބަންދު އައުމުގެ ކުރީގައިވެސް އަދި މިހާރުވެސް މަސްވެރިންނަށް ފައިސާ ދޫކުރާނެ ގޮތްތައް ހަމަޖައްސަމުން،" ޝާހިދު ވިދާޅުވިއެވެ.

އައްޑޫ ފިޝަރީޒް ކޮމްޕްލެކްސްގައި ކުރަމުން އަންނަ އިހުތިޖާޖުގައި އެތަނުގެ ކަރަންޓު ކަނޑާލައި، މުދަލަށް ގެއްލުން ދީފައިވާކަން ފާހަގަކުރައްވައި ޝާހިދު ވަނީ އެއީ ބަޔަކު އަޑީގައި ތިބެގެން ކުރުވާކަމެއް ކަމަށް ތުހުމަތު ކުރައްވާފައެވެ.