ޢީދުގެ ފޯރީގެ ތެރެއިންވެސް ކުޑަހުވަދުއިން ދައްކުވައިދިނީ ފަލަސްޠީނާއެކު ތިބިކަން!

އަޟުޙާ ޢީދު ފާހަގަކުރުމަށް ދ. ކުޑަހުވަދޫގައި ކުރިއަށްގެންދާ ހަރަކާތްތަކުގެ ތެރެއިން "ކުޑަހުވަދޫ ފަލަސްޠީނާއެކު" ނަމުގައި ޚާއްސަ ހިނގާލުމެއް ބާއްވައިފިއެވެ.

ކުޑަހުވަދޫއަކީ މިއަހަރު އަޟުޙާ ޢީދު ޤައުމީ ފެންވަރުގައި ފާހަގަކުރުމަށް ސަރުކާރުން ނިންމެވި 3 ރަށުގެ ތެރެއިން ރަށެކެވެ. ޢީދު ކުލަގަދަކޮށް ފާހަގަކުރުމަށްޓަކާ އެރަށުގައި ތަފާތު ގިނަ ހަރަކާތްތަކެއް ކުރިއަށްގެންގޮސްފައިވާއިރު، މި ހަރަކާތްތަކުގައި ދިވެހިބަހާއި ސަގާފަތާއި ތަރިކައާއި ބެހޭ ވަޒީރު އާދަމް ނަޞީރު އިބްރާހީމް ވަނީ ބައިވެރިވެވަޑައިގެންފައެވެ.

ކުޑަހުވަދޫގައި ޢީދުގެ ހަރަކާތްތަކުގެ ތެރެއިން 3 ވަނަ ދުވަހު މިވަނީ "ކުޑަހުވަދޫ ފަލަސްޠީނާއެކު" މި ނަމުގައި ބޮޑު ހިނގާލުމެއް ބާއްވާފައެވެ. މިއީ ކުޑަހުވަދޫ ކައުންސިލުން އިންތިޒާމްކޮށްގެން ކުރިއަށް ގެންދިޔަ ހިނގާލުމެކެވެ.

މި ހިނގާލުމުގައި ދިވެހި ބަހާއި ސަގާފަތާއި ތަރިކައާއި ބެހޭ ވަޒީރު އާދަމް ނަޞީރު އިބްރާހީމާއި އެ ވުޒާރާގެ އިސްބޭފުޅުންގެ އިތުރުން ކުޑަހުވަދޫ ކައުންސިލްގެ ބޭފުޅުން ވަނީ ބައިވެރިވެވަޑައިގެންފައެވެ.

މީގެ އިތުރުން ކުޑަހުވަދޫގެ ކުދި ބޮޑު އެންމެން ވަނީ މި ހިނގާލުމުގައި ބައިވެރިވެފައެވެ. މި ހިނގާލުން ކުރިއަށްދިޔައިރު ފަލަސްޠީނު ދިދައާއި، ކުޑަހުވަދޫގެ ރައްޔިތުންވެސް ފަލަސްޠީނުގެ ރައްޔިތުންނާއެކު ތިބިކަން ހާމަކޮށްދޭ ތަފާތު ޝުޢޫރުތައް ހިމެނޭ ބެނާތައް ވަނީ ބޭނުންކޮށްފައެވެ.

މި ހިނގާލުމުގެ އިތުރުން ފަލަސްޠީނަށް އެހީވުމުގެ ގޮތުން ކުޑަހުވަދޫގައި ޢީދު ފާހަގަކުރުމަށް ކުރިއަށްގެންދިޔަ ހަރަކާތްތަކުގެ ތެރޭގައި ފަންޑު ފޮށްޓެއް ބަހައްޓާފައިވެއެވެ. އަދި ޢީދު ނަމާދަށްފަހު ފަލަސްޠީނުގެ ރައްޔިތުންގެ ޙައްޤުގައި ޚާއްސަ ދުޢާއެއްވެސް ކޮށްފައިވެއެވެ.

ހައްދު ފަހަނައަޅައިފައިވާ ޔަހޫދީން ޣައްޒާއަށް ދެމުންގެންދާ ލާސިންސާނީ އުދުވާންތަކުގެ ސަބަބުން ޙާލުގައި ޖެހިފައިވާ ފަލަސްޠީނުގެ ރައްޔިތުންނަށް އެހީތެރިވުމުގެ ގޮތުން ރާއްޖޭގެ އެކި ކަންކޮޅުތަކުން އެކި އެކި ހަރާކާތްތައް ދަނީ ކުރިއަށް ގެންދަމުންނެއެވެ. މީގެ އިތުރުން ޤައުމީ ފެންވަރުގައި ސަރުކާރުންވެސް ދަނީ ބޮޑެތި ހަރަކާތްތައް އިންތިޒާމުކޮށް ބާއްވަމުންނެއެވެ.

އެގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އެދިވަޑައިގަތުމަށް މި މަހުގެ 12 ގައި ޕަބްލިކް ސާރވިސް މީޑިއާއިން އިސްނަގައިގެން އަމިއްލަ ބައެއް މީޑީއާތަކާ ގުޅިގެން ވަނީ ޚާއްސަ ޓެލެތޯނެއްވެސް ބާއްވާފައެވެ.