ގަވާއިދާ ޚިލާފަށް މީހުން އަރުވައިގެން އެއަރޕޯޓަށް ދަތުރުކުރި އުޅަނދެއް ޓޯކޮށްފި
-
އުޅަނދު ރަޖިސްޓްރީކޮށްފައިވަނީ "ބީ" ކެޓަގަރީގައި
-
އެ އުޅަނދު ފުލުހުން ވަނީ މިހާރު ޓޯ ކޮށްފައި
ގަވާއިދާ ޚިލާފަށް މީހުން އަރުވައިގެން ވެލާނާ އިންޓަރނޭޝަނަލް އެއަރޕޯޓަށް ދަތުރުކުރަމުންދިޔަ އުޅަނދެއް ޓޯކޮށްފިއެވެ.
ދިވެހި ފުލުހުންގެ ޚިދުމަތުން ވިދާޅުވި ގޮތުގައި ހުއްދަނެތި، ގަވާއިދާ ޚިލާފަށް މީހުން އަރުވައިގެން މާލެއިން އެއަރޕޯޓަށް ދަތުރުކުރި އުޅަނދެއް ބަލައި ޗެކް ކުރިއިރު އެ އުޅަނދަކީ "ބީ" ޒޯންގައި ރަޖިސްޓްރީކޮށްފައިވާ އުޅަނދެއް ކަމަށެވެ. އެ އުޅަނދު "އޭ" ޒޯންގައި ދުއްވާއިރު އުޅަނދުގެ އަހަރީ ފީވެސް ހަމަވެފައިވާކަމަށް ފުލުހުން ވިދާޅުވިއެވެ.
އެ އުޅަނދު ފުލުހުން ވަނީ މިހާރު ޓޯ ކޮށްފައެވެ. މިދިޔަ ހަފުތާގައިވެސް ގަވާއިދާ ޚިލާފަށް މީހުން އަރުވައިގެން ދަތުރުކުރަމުންދިޔަ ދެ ޕިކަޕެއް ފުލުހުން ވަނީ ހުއްޓުވައި ޗެކްކޮށްފައެވެ.
އެ ވެހިކަލްތައް ދުއްވި ޑްރައިވަރުންގެ ލައިސަންސް އަތުލަގެންފައިވާ ކަމަށާއި އެތަނުން އެއް ޕިކަޕް ފުލުހުންގެ ބެލުމުގެ ދަށަށް ގެންދިޔަކަމަށް އެސިސްޓެންޓް ކޮމިޝަނަރ އޮފް ޕޮލިސް އަހުމަދު ޝިފާން ކުރެއްވި ޕޯސްޓެއްގައިވަނީ ވިދާޅުވެފައެވެ.
ގިނަ އަދަދެއްގެ ބިދޭސީ މަސައްކަތްތެރިން އަރުވައިގެން އުޅަނދުތަކުގައި ދަތުރުކުރާކަމުގެ މައްސަލަ ސޯޝަލް މީޑިއާގައި ވަނީ ފެންމަތިވެފައެވެ. މިއީ ގަވާއިދާ ޚިލާފު ކަމެއްކަމަށާއި އެފަދަ ކަންކަން އިތުރަށް ބަލައި ފިޔަވަޅު އަޅާނެ ކަމަށް ޝިފާން ކުރެއްވި ޕޯސްޓެއްގައި ވަނީ ވިދާޅުވެފައެވެ.