މަސްވެރި އުޅަނދުތައް އިޔާދަކުރަނިވި ހަކަތައިން އޮޕަރޭޓް ކުރުމަކީ އަމާޒެއް: ވަޒީރު
-
ފަރުދީ ހައިސިއްޔަތުން ކޮންމެ މީހެއްވެސް ފަރުތަކާއި ވެށި ހިމާޔަތް މަސައްކަތް ކުރަން ޖެހޭ
-
ފަރުތަކާއި ކަނޑުގެ ދިރުންތަކުގެ އިތުރުން ވެށި ހިމާޔަތް ކުރަން އަޒުމް ކަނޑައަޅަން ޖެހޭ
-
މި ހަރަކާތުގައި 50އަށް ވުރެއް ގިނަ ކުދިން ވަނީ ބައިވެރިވެފައި
މަސްވެރިކަމުގައ ބޭނުން ކުރާ އުޅަނދުތަކަކީ އިޔާދަ ކުރަނިވި ހަކަތައިން އޮޕަރޭޓް ކުރާ އުޅަނދުތަކަކަށް ހެދުމަކީ މި ސަރުކާރުގެ އަމާޒެއްކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
ޝިޔާމް މިހެން ވިދާޅުވީ ދުނިޔޭގެ ކަނޑުގެ ދުވަސް ފާހަގަކުރުމުގެ ގޮތުން ކުޑަކުދިން ވައިފުޅި އަޅައިގެން ފީނުން ތަޖުރިބާ ކުރުމަށް ވިލިމާލޭގައި ކުރިއަތް ގެންދިޔަ ހަރަކާތުގައި ވާހަކަ ދައްކަމުންނެއެވެ. މި ހަރަކާތުގައި މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤް އިބްރާހީމްއާއި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވަނީ ބައިވެރިވެފައެވެ.
މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވީ ރާއްޖޭގެ 99 އިންސަތަ އަކީ ކަޑުގެ ސަރަހައްދުކަމަށްވާއިރު، އަޅުގަނޑުމެންގެ މި ކުޑަ ޤައުމަކީ ކަނޑަށް ބަރޯސާވާ މިންވަރު ބޮޑު ގައުމެއްކަމަށެވެ.
ވަޒީރު ވިދާޅުވީ ކަނޑުން ހޯދާ ނަފާ އިތުރުކުރުމައްޓަކާ ވަރަށް ގިނަ މަސައްކައްތަކެއް ކުރަން ޖެހޭކަމަށެވެ. އެގޮތުން ކަނޑުން އެނަފާ ހޯދުމަށް ކުރަމުންދާ މަސައްކަތަކީވެސް ދެމެހެއްޓެނިވި ގޮތެއްގައި ކުރެވޭ މަސައްކަތަކަށް ހެދުމަކީ މުހިންމު ކަމެއްކަމަށް ވަޒީރު ވިދާޅުވިއެވެ. ވަޒީރު ޝިޔާމް ވިދާޅުވީ މަސްވެރިކަމުގަައި ހަރަކާތްތެރިވާ މަސްވެރި އުޅަނދުތަކަކީ އިޔާދަކުރަނިވި ހަކަތައާއެކު އޮޕަރޭޓް ކުރެވޭ އުޅަނދުތަކަކަަށް ހެދުމަކީ މި ސަރުކާރުގެ އަމާޒެއްކަމަށެވެ.
"އަޅުގަނޑުމެން ކަނޑު ރޯދިން ހޯދަމުންދާ ނަފާ އިތުރުކުރުމަށް ގިނަ މަސައްކަތެއް ކުރަން އެބަޖެހޭ. އަޅުގަނޑުމެން ކަނޑު ރޯދިން މި ހޯދާ ނަފާ ހޯދަމުން މި ކުރަމުންދާ މަސައްކަތަކީވެސް ދެމެހެއްޓެނިވި ގޮތެއްގައި ކުރެވޭ މަސައްކަތަކަށް ހަދަން ޖެހޭ މި ކަންވެސް މެންޑޭޓްގައި ހިމެނޭ. އިތުރަށް އަޅުގަނޑުމެންގެ ވިސްނުމުގައި އެބަހުރި އަޅުގަނޑުމެން މަސްވެރިކަމުގައި ހަރަކާތްތެރިވާއިރު ހާއްސަކޮށް މަސް ޕްރޮސެސް ކުރާ މަސްވެރިކަން ކުރާ އުޅަނދުތަކަކީ އިޔާދަ ކުރަނިވި ހަކަތަޔާއެކީގައި އޮޕަރޭޓް ކުރެވޭ އުޅަނދު ފަހަރަށް މިދެންނެވޭހެން ޕޮރޮސެސިން ފެސިލިޓީއަށް ހެދުމަކީވެސް ވަރަށް ބޮޑު އަމާޒެއް" ޝިޔާމް ވިދާޅުވިއެވެ.
މި ހަރަކާތުގައި ވާހަކަ ދައްކަމުން މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް އިތުރަށް ވިދާޅުވީ ފަރުދީ ހައިސިއްޔަތުން ކޮންމެ މީހެއްވެސް ފަރުތަކާއި ވެށި ހިމާޔަތް ކުރަން މަސައްކަތް ކުރަން ޖެހޭކަމަށެވެ. ކޮންމެ ކުއްޖެއްވެސް ފަރުތަކާއި ކަނޑުގެ ދިރުންތަކުގެ އިތުރުން ވެށި ހިމާޔަތް ކުރަން އަޒުމް ކަނޑައަޅަން ޖެހޭކަން ފާހަގަކުރައްވާ ވަޒީރު ވިދާޅުވީ ފަރުތަކާއި ވެށި ހިމާޔަތްކޮށް އަންނަން އޮތް ޖީލަށް ފޯރުކޮށްދިނުމަކީ ކޮންމެ ކުއްޖެއްގެވެސް ޒިންމާއެއްކަމަށެވެ.
" ޑިސްކަވަރ ޑައިވް"ގެ ނަމުގައި ކުރިއަތް މި ގެންދިޔަ ހަރަކާތަކީ ދުނިޔޭގެ ކަނޑުތަކުގެ ދުވަސް ފާހަގަކުރުމުގެ ގޮތުން ވައިފުޅި އަޅައިގެން ފީނުން ނުވަތަ ސްކޫބާ ޑައިވިންގެ ތަޖުރިބާ ފުރަތަމަ ފަހަރަށް ކުރުމުގެ ފުރުސަތު ކުދިންނަށް ފަހިކޮށްދިނުމައްޓަކައި މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން އިންތިޒާމްކޮށްގެން ކުރިއަތް ގެންދިޔަ ހަރަކާތެކެވެ.
" ޑިސްކަވަރ ޑައިވް"ގެ މި ހަރަކާތުގައި 50އަށް ވުރެއް ގިނަ ކުދިން ވަނީ ބައިވެރިވެ ކަނޑުގެ ރީތިކަމާއި އެތަނުގެ ރީތިކަން ވަނީ ބަލާލާފައެވެ. ޑައިވް ކުރުމަށް ފަހު މީގެ ތެރެއިން ބައެއް ކުދިން ވަނީ އެ ކުދިންގެ ތަޖުރިބާ ޕީއެސްއެމް ނިއުސްއާއި ހިއްސާކޮށްފައެވެ.
" ވަރަށް އުފާވެސްޖެ އަސްލު ޑައިވް ކުރަން ލިބުނީމައި. ވަރަށް ރީތި މުރަތައް ފެނުން . ވަރަށް ބައިވަރު އެކި ކުލަ ކުލައިގެ މަސްތަކާއި އެއްޗިސް ފެނުން . ވަރަށް ތަފާތު ތަޖުރިބާއެއްމީ" އެ ކުދިން ބުންޏެވެ.
މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ވިދާޅުވީ މި ހަރަކާތުގެ މައިގަނޑު މަޤްސަދަކީ ކަނޑުފަޅުގެ މާހައުލާއި އެ މާހައުލުގެ ދިރުންތަކާއި މެދު ކުދިންގެ ހިތްތަކުގައި ލޯތްބާއި ޝައުގު އުފެއްދުންކަމަށެވެ.