ފުރަތަމަ 4 މަސްދުވަހު ރާއްޖެއަށް ދަތުރުކުރި ބައިނަލްއަޤްވާމީ އެއަރލައިންތަކުގެ އަދަދު އިތުރު

މިއަހަރުގެ ފުރަތަމަ 4 މަސްދުވަހު ރާއްޖެއަށް ދަތުރުކުރި ބައިނަލްއަޤްވާމީ އެއަރލައިންތަކުގެ އަދަދު އިތުރުވެފައިވާކަމަށް މޯލްޑިވްސް މަނިޓަރީ އޮތޯރިޓީ، އެމްއެމްއޭގެ ރިޕޯޓަކުން ދައްކައިފިއެވެ. މިގޮތަށް ދައްކާފައިވަނީ އެމްއެމްއޭއިން އާންމުކޮށްފައިވާ މަންތްލީ ސްޓެޓިސްޓިކް ރިޕޯޓްގައެވެ.

އެމްއެމްއޭގެ ރިޕޯޓުން ދައްކާގޮތުން މިދިޔަ އަހަރުގެ ފުރަތަމަ 4 މަސްދުވަހާ އަޅާބަލާއިރު މިއަހަރުގެ ފުރަތަމަ 4 މަސްދުވަހު ރާއްޖެއަށް ދަތުރުކުރި ބައިނަލްއަޤްވާމީ އެއަރލައިންތަކުގެ އަދަދު ވަނީ އިތުރުވެފައެވެ. އެގޮތުން މިއަހަރުގެ ފުރަތަމަ 4 މަސްދުވަހު ޝެޑިއުލްކޮށްގެން ވެލާނާ އިންޓަރނޭޝަނަލް އެއަރޕޯޓަށް ކޮށްފައިވަނީ 5982 ދަތުރެވެ. ނަމަވެސް މިދިޔަ އަހަރުގެ މި މުއްދަތުގައި ޝެޑިއުލް ފްލައިޓް މޫމަންޓްސް އުޅުނީ 5841 ގައިކަމަށް ރިޕޯޓުން ދައްކައެވެ.

މިއަހަރުގެ މި މުއްދަތުގައި ޖެނެރަލް ފްލައިޓް މޫމަންޓްސް ހުރީ 604 ގައެވެ.

އެމްއެމްއޭގެ ރިޕޯޓުން ދައްކާގޮތުން މިއަހަރުގެ ފުރަތަމަ 4 މަސްދުވަހު ރާއްޖެއަށް އައި ފަތުރުވެރިންގެ އަދަދުވެސް ވަނީ މިދިޔަ އަހަރުގެ މި މުއްދަތާއި އަޅާބަލާއިރު އިތުރުވެފައެވެ. މިއަހަރުގެ މި މުއްދަތުގައި ރާއްޖެއަށް 7 ލައްކައަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ. އަދި ބެޑްނައިޓްސް އުޅުނީ 5449 ގައެވެ.

މިމުއްދަތުގައި ރާއްޖޭގައި އޮޕަރޭޓްކުރި ރިސޯޓްތަކުގެ އަދަދު ހުރީ 175 ގައެވެ. އަދި އޮކިއުޕަންސީ ރޭޓް ހުރީ 72.7 އިންސައްތައިގައެވެ. މިދިޔަ އަހަރު މި އަދަދު ހުރީ 69.5 އިންސައްތައިގަކަމަށް އެމްއެމްއޭގެ ރިޕޯޓުން ދައްކައެވެ.