އަލަށް އަޅާ އައިސްޕްލާންޓްތަކާއެކު ކެޕޭސިޓީ 1880 ޓަނަށް އިތުރުވާނެ: ވަޒީރު ޝިޔާމް
-
އަލަށް އަޅަނީ 11 އައިސްޕްލާންޓް
-
ބައެއް އައިސްޕްލާންޓް މިއަހަރު ހުޅުވާނެ
މިސަރުކާރުން ޤާއިމްކުރާ އައިސްޕްލާންޓްތަކާއެކު އައިސް އުފެއްދުމުގެ ކެޕޭސިޓީ 1880 ޓަނަށް އިތުރުވާނެކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ. ވަޒީރު މިހެން ވިދާޅުވީ، އެ ވުޒާރާގެ މަސައްކަތްތަކާއި ބެހޭގޮތުން މައުލޫމާތުދެއްވަމުންނެވެ.
ރާއްޖޭގެ އެކި ސަރަހައްދުގައި އައިސްޕްލާންޓްތައް ޤާއިމްކޮށް އައިސް އުފެއްދޭ ކެޕޭސިޓީ އިތުރުކުރުމަށް ސަރުކާރުން ދަނީ މަސައްކަތްކުރައްވަމުންނެވެ. އެގޮތުން މަސް ވީހާވެސް ތާޒާކަމާއެކު ރައްކާތެރިކޮށް ގެންގުޅުމުގައި ގެންނަންޖެހޭ ބަދަލުތަކެއް ހުރިކަން ފާހަގަވެފައިވާކަމަށް ވަޒީރު ޝިޔާމް ވިދާޅުވިއެވެ.
މި ސަރުކާރުންމިހާރުވަނީ 11 އައިސްޕްލާންޓެއް ޤާއިމްކުރުމުގެ މަސައްކަތް މިފްކޯއާއި ހަވާލުކުރައްވާފައެވެ. ނޫސްވެރިންގެ ބައްދަލުވުމުގައި ޕީއެސްއެމް ނިއުސްއިން ކުރި ސުވާލަކަށް ޖަވާބުދެއްވަމުން ވަޒީރު ވިދާޅުވީ، މި ސަރުކާރުން އަލަށް ޤާއިމްކުރާ 11 އައިސްޕްލާންޓާއެކު އައިސް އުފެއްދޭ މިންވަރު 1880 ޓަނަށް އިތުރުވެގެންދާނެކަމަށެވެ.
މިހާރު އުފެއްދެނީ 1550 ޓަނުގެ އައިސްއެވެ. ނަމަވެސް މި ސަރުކާރުން ޤާއިމްކުރާ 11 އައިސްޕްލާންޓާއެކު 330 ޓަނުގެ އައިސް އިތުރަށް އުފެއްދޭނެކަމަށް މަސްވެރިކަމާއި ބެހޭ ވުޒާރާއިން މައުލޫމާތުދެއްވައެވެ.
" އައިސް ކެޕޭސިޓީ އިތުރުކުރުމަށް ރައީސްގެ މެނިފެސްޓޯގައިވެސް އެބައޮތް. އަޅުގަނޑުމެން މިދަނީ އެ މަސައްކަތްތައްވެސް ކުރަމުން. އޭގެތެރޭގައި އަޅުގަނޑުމެން ވެރިކަމާއި ހަވާލުވިފަހުން 11 އައިސްޕްލާންޓެއް މިހާރު ވާނީ މިފްކޯއާ ހަވާލުކުރެވިފައި. އެމަސައްކަތްތައް މިހާރު އެވަނީ ޓެންޑަރިން މަރުހަލާގައި. އިރާދަކުރެއްވިއްޔާ އަޅުގަނޑުމެންގެ އުންމީދަނީ ލޭންޑް ބޭސްޑް އައިސްޕްލާންޓްތައް މިއަހަރުގެ ފަހުކޮޅު އަދި އަންނަ އަހަރުގެ ކުރީކޮޅު މި އައިސްޕްލާންޓްތައް ޤާއިމްކުރެވި އައިސްޕްލާންޓްތަކުގެ ޚިދުމަތް އަޅުގަނޑުމެންނަށް ފެށޭނެކަމަށް އަޅުގަނޑުމެން މި އުންމީދުކުރަނީ." ވަޒީރު ވިދާޅުވިއެވެ.
ވަޒީރު ވިދާޅުވީ، މީގެތެރެއިން ބައެއް އައިސްޕްލާންޓްތައް އަންނަ މަސްވެރިންގެ ދުވަހު ހުޅުވައި ޚިދުމަތްދޭން ފެށޭވަރުވާނެކަމަށެވެ. މިމަޝްރޫއުގެ ދަށުން ހއ.ދިއްދޫ، ހދ.ކުޅުދުއްފުށި، ށ.ފުނަދޫ، ށ.ކޮމަންޑޫ، ޅ.ނައިފަރު، އއ.ރަސްދޫ، މ.ވޭވަށް، ދ.ބަނޑިދޫ، ދ.މީދޫ އަދި ގދ.ރަތަފަންދޫގައި އައިސް ޕްލާންޓު ގާއިމްކުރުމަށް ވަނީ ހަމަޖެހިފައެވެ. މީގެތެރެއިން 5 އައިސް ޕްލާންޓަކަށް ފަންޑު ހަަމަޖެހިފައިވަނީ ސައުދީ ފަންޑު ފޮރ ޑިވެލޮޕްމަންޓުންނެވެ. އަދި ބާކީ 6 ޕްލާންޓް ޤާއިމުކުރުމަށް ހަމަޖެހިފައިވަނީ ސަރުކާރުގެ ޚަރަދުގައެވެ.