ދިއްދޫއަށް އެރި ކޮޅިގަނޑެއްގައި 4 ގެއަކަށް ބޮޑެތި ގެއްލުންތަކެއް

ރާއްޖެއަށް މިހާރުކުރަމުންދާ ވިއްސާރައިގައި ރޭ ދަންވަރު ހއ. ދިއްދޫއަށް އެރި ކޮޅިގަނޑެއްގައި އެރަށުގެ 4 ގެއެއްގެ ފުރާޅު އެއްލާލައި ބޮޑެތި ގެއްލުންތަކެއް ވެފައިވާކަމަށް ރަށު ކައުންސިލުން ވިދާޅުވެއްޖެއެވެ.

ދިއްދޫ ކައުންސިލުން ވިދާޅުވީ، ރޭ ގާތްގަނޑަކަށް 3:30 އާއި 4:00 އާއި ދެމެދު އައި ކޮޅިގަނޑެއްގައި ދިއްދޫގެ ބައެއް ފްލެޓްތަކަކަށް ގެއްލުން ލިބިފައިވާކަމަށެވެ.

ރޭގެ ކޮޅިގަނޑުގައި ވައިގަދަވެ އެރަށުގެ ޖުމްލަ 7 ފްލެޓަކަށް ވަނީ ގެއްލުން ވެފައެވެ. މީގެތެރެއިން 4 ފްލެޓެއްގެ ފުރާޅު އެއްކޮށް އެއްލާލައި ހިފާގެންގުޅޭ ހުރިހައި ސާމާނެއް ހަލާކުވެ މީހުންނަށް ނޫޅެވޭވަރު ވަނީ ވެފައެވެ. އަދި އަނެއް 3 ފްލެޓްގެ ފުރާޅަށްވެސް އެކި ވަރުގެ ގެއްލުން ލިބިފައިވާކަމަށް ދިއްދޫ ކައުންސިލުން ވަނީ ވިދާޅުވެފައެވެ.

ކައުންސިލުން ވިދާޅުވީ، ގެއްލުން ލިބުނު ގޭގޭގައި ދިރިއުޅޭ މީހުން އެހެން ގެތަކަށް ބަދަލުކުރުމުގެ މަސައްކަތް ކުރަމުންދާކަމަށެވެ. އަދި ގެއްލުން ލިބުނު ގެތަކުގެ ފުރާޅު މަރާމާތުކުރުމުގެ މަސައްކަތް ކައުންސިލާއި، ފުލުހުންނާއި އަދި އާންމު ރައްޔިތުން ގުޅިގެން ކުރަމުން އަންނަކަމަށެވެ.

މި ދުވަސްވަރަކީ މުޅި ރާއްޖެއަށްވެސް ވިއްސާރަ ދުވަސްވަރެކެވެ. އެގޮތުން ވިއްސާރަވެ ގޭގެއަށް ފެންވަރު ބައެއް ރަށްރަށުގެ ގަސްތައްވެސް ވެއްޓި އެކި ވަރުގެ ގެއްލުން ދަނީ ވަމުންނެވެ. އެހެންކަމުން މިކަމަށް އާންމު ރައްޔިތުން ސަމާލުކަން ދިނުމަށް ކަމާގުޅުންހުރި އިދާރާތަކުން އިލްތިމާސްކުރެއެވެ.