ޕީއެސްއެމް ނިއުސްގެ އަހަރީ ދުވަހު ޓީވީ ފަޅު ފިލުވާލަދިނީ ކުރީގެ މޫނުތައް

ޕަބްލިކް ސަރވިސް މީޑިއާގެ ދަށުން ޚަބަރާއި ކަރަންޓް އެފެއާޒްއަށް ޚާއްސަކޮށްގެން ވަކި ޗެނަލްއެއްގެ ގޮތުގައި "ޕީއެސްއެމް ނިއުސް" އުފެދުނުތާ 7 އަހަރު ފުރުން މިއަދު ފާހަގަކުރިއިރު، މިއަހަރުގެ އަހަރީ ދުވަހާ ގުޅުވާ، ޚާއްސަ ޕްރޮގްރާމްތަކެއް ވަނީ ގެނެސްދީފައެވެ. އެހެންނަމަވެސް އަހަރީ ދުވަހުގެ ހަރަކާތްތަކަށް އިތުރު ފުރިހަމަކަމެއް ގެނެސްދިނީ ޕީއެސްއެމް ނިއުސްގެ ޚަބަރު ގަޑިތައް މިއަދު ހުށަހަޅައިދިން ޕްރެޒެންޓަރުންނެވެ.

ރާއްޖޭގެ ބްރޯޑްކާސްޓިންގ ދާއިރާގެ ހަޔާތުގައި ދައުލަތުގެ މީޑިއާއަކީ ޓީވީ ޕްރެޒެންޓިންގގެ ދާއިރާއަށް ހުނަރުވެރި ކުޅަދާނަ އެތައް މޫނުތަކެއް ތަޢާރަފުކޮށްދިން ތަނެކެވެ. ޚަބަރު ކިޔުމާއި، ތަފާތު އެކި ޕްރޮގްރާމްތައް ހުށަހަޅައިދޭ އެންމެ މަޤުބޫލު ޕްރެޒެންޓަރުންގެ ތެރޭގައި ދައުލަތުގެ މީޑިއާއަށް އެކިގޮތްގޮތުން ޚިދުމަތްކޮށްދިން ޕްރެޒެންޓަރުން އެބަތިއްބެވެ.

މީގެތެރެއިން ބައެއް މޫނުތައް މިއަދު ޚިދުމަތުން ދުރުގައި ތިއްބަސް، މިއީ އެތައް ބައެއްގެ ލޯތްބާއި އިޙްތިރާމް ހޯދާފައިވާ ބައެކެވެ. މިއިން ކޮންމެ މޫނެއް ޓީވީ ސްކްރީނުން މިއަދު ފެނުނަސް އެތައް ހަނދާންތަކެއް އައު ކޮށްދެއެވެ. ނިއުސް ޗެނަލްއިން މިއަދު މި އައުކޮށްދިނީ މިފަދަ ފޮނި ހަނދާންތަކެކެވެ.

ޕީއެސްއެމް ނިއުސް ޗެނަލްގެ އަހަރީ ދުވަހުގެ އުފަލުގައި ބައިވެރިވެ، މިއަދު ޚަބަރުތައް ހުށަހަޅައިދިން ބޭފުޅުންނަކީ ޚަބަރާއި މަޢުލޫމާތު ފެތުރުމުގެ ދާއިރާގައި ގިނަ ދުވަސްތަކެއް ވަންދެން މަސައްކަތްކުރައްވާފައިވާ ތަޖުރިބާކާރު ބޭފުޅުންތަކެކެވެ.

މިއީ ނިއުސް ޗެނަލް ވުޖޫދުނުވާއިރުވެސް އެކި ދުވަސްވަރުމަތިން ޓީވީއެމްގެ ޚަބަރު ހުށަހަޅައިދިން މަޤުބޫލު ޕްރެޒެންޓަރުންތަކެކެވެ. ގިނަ ބަޔަކު އަދިވެސް އެބައެއްގެ އަޑު އަހާލާ ޓީވީ ސްކްރީނުން ފެނިލަން ބޭނުންވާ މޫނުތަކެކެވެ.

މިއަދުގެ ހެނދުނު 10:00 ގެ ޚަބަރު ހުށަހަޅައިދިނީ މަޝްހޫރު ނޫސްވެރިޔާ ޢަލީ ސުލައިމާންއެވެ. ދައުލަތުގެ މީޑިއާގެ ޗެނަލަކުން ޚަބަރާއެކު ސުލައިމާން ބެލުންތެރިންނާއި މި ބައްދަލުކުރީ 17 އަހަރަށް ފަހުގައެވެ.

މެންދުރު 13:00 ގެ އިނގިރޭސި ޚަބަރު ހުށަހަޅައިދިނީ ކުޑަކުދިންގެ މެދުގައިވެސް ބޮޑު މަޤުބޫލުކަމެއް ހޯދާފައިވާ ކުރީގެ ޕްރެޒެންޓަރ ޑރ. އައިޝަތު ސިޔާދާ ސައީދު (ސިޔާދައްތަ) އެވެ. ބޮޑު ބްރޭކަކަށްފަހު ޑރ. ސިޔާދާ ބެލުންތެރިންނާއި ހަމައަށް ޓީވީ ސްކްރީނުން ފެނިގެންދިއުމުން ގިނަ ބަޔަކު ވަނީ އުފަލާއެކު އެކަން ފާހަގަކޮށްފައެވެ.

މެންދުރުގެ ކުޅިވަރު ޚަބަރު ހުށަހަޅައިދިނީ މުޅި ކުޅިވަރު އާއިލާއާވެސް ގާތްގުޅުމެއް ބާއްވާ ކުޅަދާނަ ކުޅިވަރު ނޫސްވެރިޔާ ޢަބްދުﷲ އަޒްމީނެވެ.

މެންދުރު 14:00 ގެ ޚަބަރާއި ރޭގަނޑު 7 އިނގިރޭސި ޚަބަރު ހުށަހަޅައިދިނީ ޓީވީއެމްގެ ކުރީގެ ޕްރެޒެންޓަރ އަދި މޯލްޑިވްސް ބްރޯޑްކާސްޓިންގ ކޮމިޝަންގެ ރައީސް މަރިޔަމް ވަހީދާ (މަރީ) އެވެ.

މަރީއަކީ ދިވެހި ބަހާއި އިނގިރޭސިބަހުންވެސް ޕްރޮގްރާމްތަކާއި ޚަބަރު ހުށަހެޅުމަށް ފަރިތަ ބޭފުޅެކެވެ. އެކި ދުވަސްވަރުމަތިން މަރީ ގެނެސްދިން ޕްރޮގްރާމްތަކަކީ މިއަދުވެސް ގިނަ ބަޔަކު ޝަޢުގުވެރިވާ މަޤުބޫލު އުފެއްދުންތަކެކެވެ. މިއަދު ޓީވީ ޚަބަރު މަރީ މި ހުށަހަޅައިދިނީ 13 ވަރަކަށް އަހަރަށްފަހުއެވެ.

މިއަދު ހަވީރު 16:00 ގެ ޚަބަރު ހުށައަޅައިދިނީ ދައުލަތުގެ މީޑިއާގެ ނިއުސްރޫމުގެ އިސް މަޤާމްތަކެއް ކުރިން އަދާކުރެއްވި އަދި ރައްޔިތުންގެ މަޖިލީހުގެ މިހާރުގެ ކޮމިއުނިކޭޝަން ޑިރެކްޓަރު ޙަސަން ޒިޔާޢުއެވެ. ޒިޔާޢު ބޮޑަށް މަޤުބޫލުވެގެންދިޔައީ ސިޔާސީ ޕްރޮގްރާމްތައް ފަރިތަކަމާއި އެއްވެސް ޖެހިލުމެއްނެތި ގެނެސްދޭ މޮޅު ޕްރެޒެންޓަރެއްގެ ގޮތުގައެވެ.

މިރޭގެ 20:00 ގެ ޚަބަރާއެކު ބައްދަލުކުރީ މަޤުބޫލު އެތައް ޕްރޮގްރާމްތަކެއް އާންމުންނާއި ހަމައަށް ގެނެސްދިން، އަދި ޓީވީއެމް ޕްރެޒެންޓިންގެ ދާއިރާގައި ރާއްޖޭގެ އެންމެ ފުންނާބު އުސް އެއް ޕްރެޒެންޓަރކަމަށްވާ އަޙްމަދު ޝަކީބް (ޝަކީއްބެ) އެވެ. ޓީވީ ޚަބަރަކުން ޝަކީއްބެ ފެނިގެން މިދިޔައީ ގާތްގަނޑަކަށް 15 ވަރަކަށް އަހަރަށްފަހުއެވެ.

އެކި ދުވަސްވަރު މަތިން ޝަކީއްބެ ގެނެސްދީފައިވާ ތަފާތު ޕްރޮގްރާމްތަކަކީ އެ ޕްރޮގްރާމްތަކެއްގެ ވާހަކަ މިއަދުވެސް ގިނަ ބަޔަކު ދައްކާ ޕްރޮގްރާމްތަކެކެވެ. "ހޭޔަމްބޯ" އަދި "ތިޔަބޭފުޅުންގެ ފުރުޞަތު" މިއީ މިފަދަ ބައެއް ޕްރޮގްރާމްތަކެވެ. ހަމައެހެންމެ ޚަބަރު ހުށަހެޅުމުގައިވެސް ޝަކީއްބެއަކީ ގިނަ ބައެއްގެ ފޭވަރިޓެވެ.

ޙިދުމަތުން ވަކިވެ އެތަކެއް ދުވަހު ދުރުގައި ތިބުމަށްފަހުވެސް ޚަބަރާއެކު ޓީވީ ސްކްރީނުން މި ފަރާތްތައް ފެނިގެންދިޔުމަކީ އެތައް ބައެއްގެ މޫނުމައްޗައް އުފާވެރިކަން ގެނުވި ކަމެކެވެ.

ގިނަ ދުވަސްތަކަކަށްފަހުވެސް ޓީވީ ޚަބަރުން މި ފަރާތްތައް ފެނިގެންދިޔައިރު، ސްކްރީނާއި ކެމެރާއާއި އޮތް ގާތްގުޅުން މިހާރުވެސް ތާޒާކަމާއިއެކު އޮތްކަން މިވަނީ ދައްކުވައިދީފައެވެ. ޚަބަރު ކިޔުމުގައި އޭރުވެސް ގެންގުޅުނު ސްޓައިލާއި އެ ފަރިތަކަން މިއަދުވެސް ހަމަ ތަފާތެއް ނެތިވަނީ ދައްކުވައިދީފައެވެ.

އަހަރީ ދުވަހަށް ޚާއްސަކޮށް މިއަދު ނިއުސް ޗެނަލްއިން ކުރީގެ ޕްރެޒެންޓަރުން ތަކެއް ފެނިގެންދިޔަ ދިއުން އާންމުންވެސް ބަލައިގަތީ ނުހަނު ލޯތްބާއި ހިތްހަމަޖެހުމާއެކުގައިކަން ސޯޝަލް މީޑިއާގައި އާންމުން ފާޅުކުރި ޝުޢޫރުތަކުން ހަމަ ޤައިމުވެސް ހާމަވެގެންދިޔައެވެ. އާއްމުން ތިބީ މިއަޑުތައް، މި މޫނުތައް އަދިވެސް ފޫހިކަމެއްނެތި ޓީވީއިން ބަލާލުމަށް ކެތްމަދުވެފައެވެ.