ނިލަންދެއަތޮޅު ދެކުނުބުރީ މާއެނބޫދުއާއި ބަނޑިދޫގެ ބަނދަރު ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް މިއަދު ހުޅުއްވާދެއްވައިފިއެވެ. މި ދެރަށުގެ ބަނދަރު ރައީސުލްޖުމްހޫރިއްޔާ ހުޅުއްވާދެއްވީ ދ.އަތޮޅަށް ކުރެއްވި ދަތުރުފުޅުގެ ތެރެއިންނެވެ.
ދ. މާއެނބޫދޫގައި ސަރުކާރުން ތަރައްޤީކުރައްވާފައިވަނީ 800 ފޫޓު ދިގު 220 ފޫޓު ފުޅާ ބަނދަރެކެވެ. މި ބަނދަރު ހެދުމަށް ސަރުކާރުގެ ބަޖެޓުން 56 މިލިއަން ރުފިޔާ ޚަރަދު ކުރައްވާފައިވެއެވެ. އަދި ބަނޑިދޫފައި ސަރުކާރުން ތަރައްޤީ ކުރައްވާފަވަނީ 1000 ފޫޓު ދިގު 300 ފޫޓު ފުޅަ ބަނދަރެކެވެ. މި މަޝްރޫޢަށްވެސް 52 މިލއަނެއްހާ ރުފިޔާ ޚަރަދުކުރައްވާފައިވެއެވެ. މި ދެބަނދަރުވެސް ތަރައްޤީ ކުރައްވާފައިވަނީ ޒަމާނީ ފެންވަރަށް ބަނދަރު މަގުގައި ގާ އަތުރައިގެންނެވެ.
ދ.މާއެނބޫދޫގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވީ، އެރަށަށް ދިމާވެފައިވާ އެންމެ ބޮޑު ދަތިކަމަކީ ރަށްގިރުންކަމަށާއި، އެކަމަށް ދާއިމީ ޙައްލެއް ވަރަށް އަވަހަށް ގެނެސްދެއްވާނެ ކަމަށެވެ. މާއެނބޫދޫ ގިރާ ސަރަޙައްދު ޙިމާޔަތްކުރުމަށް ބޮޑުހިލަ މިހާރު ވަނީ އެރަށަށް ގެންގޮސްފައެވެ. އަދި އެރަށުގެ ބިން ފުރިފައިވާތީ، ނަރުދަމާ ނިޒާމެއް ޤާއިމްކުރުމުގެ މަޝްރޫޢުގެ ޑިޒައިން ނިމިފައިވާކަމަށާއި، ވަރަށް އަވަހަށް ޢަމަލީ މަސައްކަތް ފެށިގެންދާނެކަމަށް ރައީސް ވިދާޅުވިއެވެ.
ރައީސްގެ ވާހަކަފުޅުގައި 2008 ވަނަ އަހަރުން ފެށިގެން ރާއްޖޭގެ ގިނަ ސަރަޙައްދެއްގައި، ޚާއްޞަކޮށް ދ.އަތޮޅު ތަރައްޤީގެ މަޝްރޫޢުތަކުން މަޙްރޫމްވެފައިވާކަމަށް ވިދާޅުވިއެވެ. އެއިރު ރައްޔިތުންގެ މަޖިލީހުގައި އިދިކޮޅު ފިކުރުގައި ތިއްބެވި ނަމަވެސް ތަރައްޤީގެ މަޝްރޫޢުތަކަށް އެއްބާރުލުން ދެއްވައި ވޯޓުދެއްވާފައި ވާނެކަމަށް ވިދާޅުވިއެވެ. ނަމަވެސް މިހާރުގެ އިދިކޮޅު ފަރާތްތަކުން ސަރުކާރުން ކުރިއަށް ގެންދަވާ މަޝްރޫޢުތަކަށް އެއްބާލުން ނުދޭކަމަށާއި ވޯޓްވެސް ނުދޭކަމަށް ވިދާޅުވިއެވެ. ނަމަވެސް އެ މެމްބަރުންގެ ދާއިރާތަކުގައިވެސް އުމްރާނީ ތަރައްޤީގެ ގިނަ މަޝްރޫޢުތައް ސަރުކާރުން ކުރިއަށް ގެންދާވަކަމަށް ވިދާޅުވިއެވެ. ރައީސްގެ ވާހަކަފުޅުގައި ޕީޕީއެމް އިދިކޮޅު ޕާޓީއެއްގެ ގޮތުގައި އޮވެގެންވެސް މަސައްކަތްކުރީ ރައްޔިތުންނަށް އުނދަގޫ ނުވާ ގޮތަށްކަމަށް ވިދާޅުވިއެވެ.
ރައީސް ޔާމީން ބަނޑިދޫ ބަނދަރު ހުޅުއްވާދެއްވައި ދެއްކެވި ވާހަކަފުޅުގައި ވަނީ އެމަނިކުފާނުގެ ވެރިކަމުގެ ފާއިތުވި ދެއަހަރާއި ބައިގެ މުއްދަތުގައި ލިބިގަނެވުނު ފިލާވަޅުތަކުގެ މައްޗަށް އަލިއަޅުއްވާލައްވާފައިވެއެވެ. ރައީސް ވިދާޅުވީ، ކެތްތެރިކަމާއެކު އެމަނިކުފާނު ކުރައްވާ މަސައްކަތްތަކަށް ފުރުޞަތު ނުދިނުމަށް ބޭނުންވާ ބަޔަކު އުޅޭކަމަށާއި، ރާއްޖެފަދަ ކުދި ޤައުމުތަކުގެ ޚާރިޖީ ސިޔާސަތަށް ފުރުޞަތު ދޭން ބޭނުންނުވާ ބަޔަކުވެސް އުޅޭކަމަށެވެ. އެމަނިކުފާނުގެ ސަރުކާރުގެ ފުރަތަމަ އަހަރު ދިޔައީ އަމާން އޮމާންކޮށްކަމަށް ވިދާޅުވެ، ބޮޑެތި މަޝްރޫޢުތައް ކާމިޔާބުކަމާއެކު ނިންމާލެވޭނީ އެފުރުޞަތު ދެއްވައިގެންކަމަށް ވިދާޅުވިއެވެ. ސަރުކާރުން ކުރައްވާ މަސައްކަތަކީ މަޝްރޫޢުތަކާއިއެކު އާންމު ފަރުދުންފެ ފުދުންތެރިކަން އިތުރުކުރުންކަމަށް ރައީސް ވިދާޅުވިއެވެ.
މިރަސްމިއްޔާތުގައި ހައުސިންގ މިނިސްޓަރ ޑރ.މުޙައްމަދު މުޢިއްޒު ދެއްކެވި ވާހަކަފުޅުގައި، ބަނޑިދޫގައި ތަރައްޤީ ކުރެވިފައިވަނީ އެރަށު ރައްޔިތުން ބޭނުންވިފަދަ ބަނދަރެއްކަމަށް ވިދާޅުވިއެވެ. ބަނޑިދުއަކީ ރާއްޖޭގެ ނިސްބަތުން އެންމެ ގިނަ މަސްދޯނި އޮތް ރަށެވެ. އެހެންކަމުން މި ބަނދަރުގެ ސަބަބުން އެންމެ ބޮޑު ލުއިކަމެއް، ފަސޭހަކން މަސްވެރިންނަށް ލިބިގެން ގޮސްފިކަމަށް ވިދާޅުވިއެވެ. މިނިސްޓަރގެ ވާހަކަފުޅުގައި މިސަރުކާރުން ކުރިއަށް ގެންދަވާ މަޝްރޫޢުތަކަކީ ކުރިން ހިނގަމުންދިޔަ މަޝްރޫޢުތައް ނިންމުން ނޫންކަމަށާއި، މީ މުޅިން އަލަށް ރައީސް ޔާމީން ބޭނުންފުޅުވެގެން ކުރިއަށް ގެންގޮސް ނިންމަވާ މަޝްރޫޢުތައްކަމަށް ވިދާޅުވިއެވެ.
ރައީސް ޔާމީން ދާލު އަތޮޅަށް ކުރެއްވި ދަތުރުފުޅުގައި މި ދެރަށުންވެސް އެމަނިކުފާނަށް ހޫނު މަރުޙަބާއެއް ދަންނަވާފައިވެއެވެ. އެގޮތުން މި ދެރަށުންވެސް އެދެރަށުގެ ބަނދަރުގެ މަޝްރޫޢު ކާމިޔާބުކަމާއެކު ނިންމާލެއްވީތީ، އެކަން ފާހަގަކުރައްވާ ރައީސް ޔާމީނަށް ހަނދާނީ ފިލައެއް އަރުއްވާފައިވެއެވެ.