ޚަބަރާއި މައުލޫމާތު ފެތުރުމުގައި 24 ގަޑިއިރު، މުވައްޒަފުންގެ ބުރަ މަސައްކަތް

ދައުލަތުގެ މީޑިއާ ޕަބްލިސް ސަރވިސް މީޑިއާގެ ދަށުން ޚަބަރާއި ކަރަންޓް އެފެއަރސްއަށް ޚާއްސަކޮށްގެން ވަކި ޗެނަލްއެއްގެ ގޮތުގައި "ޕީއެސްއެމް ނިއުސް" އުފެދިގެން އައީ މީގެ 7 އަހަރު ކުރިން 2017 ވަނަ އަހަރުގެ މޭމަހު 3ވަނަ ދުވަހުއެވެ. ޕީއެސްއެމް ނިއުސްއަކީ މިހާތަނަށް ރާއްޖޭގައިވެސް ހިންގަމުން އަންނަ 24 ގަޑިއިރު ޚަބަރާއި މައުލޫމާތައް ޚާއްސަ ފުރަތަމަ ޗެނަލްއެވެ.

ޕީއެސްއެމްގެ ކުޑައިގެ ދަށުން ޙަބަރާއި މައުލޫމާތައް ޚާއްސަ ޗެނަލްއެއް އުފެއްދުމުގެ އެންމެ މުހިންމު އެއް ބޭނުމަކީ ވަގުތުން ވަގުތަށް އެންމެ އަވަހަށް އެންމެ ސައްޙަ ތެދު މަޢުލޫމާތު ރައްޔިތުންނާ ހަމައަށް ފޯރުކޮށްދިނުމެވެ. ވޭތުވެދިޔަ 7 އަހަރުގެ ތެރޭގައި މެދުކެނޑުމެއްނެތި 24 ގަޑިއިރު ޕީއެސްއެމްއިން ވަނީ ޚަބަރާއި މައުލޫމާތު ފޯރުކޮށްދީފައެވެ.

ކޮންމެ ދުވަހަކު 11 ގަޑިއަކު ޕީއެސްއެމް ނިއުސްއިން އާންމުންނަށް ދަނީ ޚަބަރު ގެނެސްދެމުންނެވެ. މީގެއިތުރުން ކޮންމެ ދުވަހަކު އަދި ކޮންމެ ހަފްތާއަކު އާންމުންނާއި ހަމައަށް އެތަކެއް ޕްރޮގްރާމްތަކެއް ދަނީ ގެނެސްދެމުންނެވެ.

ބޮޑެތި ލައިވް ކަވަރޭޖްތަކާއި، ބްރޭކިން ނިއުސްތައް އެންމެ އަވަހަށް އެންމެ ތާޒާކަމާއެކު ގެނެސްދިނުމުގައި ޕީއެސްއެމް ނިއުސްގެ މުޅި ޓީމް އެކުގައިދަނީ ބުރަ މަސައްކަތްތަކެއް ކުރަމުންނެވެ.

ޚަބަރާއި ޕްރޮގްރާމްތައް އަދި ބޮޑެތި ކަވަރޭޖްތައް ގެނެސްދޭއިރު އެ ޚަބަރެއް ނުވަތަ ޕްރޮގްރާމެއް ހުށައަޅާދޭ ޕްރެޒެންޓަރަކު ސްކްރީންގެ ކުރިމަތިން ފެނުނު ނަމަވެސް މިއީ ވަރަށް ބޮޑު ޓީމެއްގެ ބުރަ މަސައްކަތެކެވެ.

އިދާރީ މުވައްޒަފުންއިން ފެށިގެން، އިވެންޓް ކަވަރ ކުރަންދާ ކެމެރާމަނުންނާއި، އެ ޚަބަރެއް ލިޔާ ނޫސްވެރިން ހިމެނެއެވެ. އަދި އެޑިޓަރުންނާއި ޓެކްނިކަލް މުވައްޒަފުންނާއި އޮންއެއަރ އޮޕަރޭޓަރުންގެ ބުރަ މަސައްކަތަކީ ކެމެރާގެ ކުރިމަތިން ނުފެންނަ އެހެންނަމަވެސް ކޮންމެ ދުވަހެއްގެ ޕީއެސްއެމް ނިއުސްގެ ކޮންޓެންޓް އުފެއްދައި ބެލުންތެރިންނާއި ހަމައަށް އެ މަންޒަރުތައް ގެނެސްދިނުމުގެ ބުރަ މަސައްކަތްތައް ކުރާ ފަރާތްތަކެކެވެ.

މިއިން ކޮންމެ ފަރާތަކީ ޕީއެސްއެމް ނިއުސްއިން ކޮންމެ ދުވަހަކު ގެނެސްދޭ ކޮންޓެންޓް އުފައްދައި އެ ރައްޔިތުންނާއި ހަމައަށް ފޯރުކޮށްދިނުމުގައި މުހިންމު ދައުރެއް އަދާކުރާ މީހެކެވެ. މި ޓީމުން ރައްޔިތުންނަށް ދޭންބޭނުންވާ ޔަޤީންކަމަކީ ޕީއެސްއެމް ނިއުސްއިން ރައްޔިތުންނަށް އެންމެ އަވަސްކަމާއި އިތުބާރާއިއެކު ޚަބަރު އަދި ޕްރޮގްރާމްތައް ގެނެސްދިނުމުގައި ދެމިތިބޭނެކަމުގެ ޔަޤީންކަމެވެ.

ޕީއެސްއެމް ނިއުސް ޓީމުގެ އޮތީ އެންމެ ޢަޒުމެކެވެ. އެތައް ގޮންޖެހުމަކާއެކުވެސް ބެލުންތެރިންނާހަމައަށް ތާޒާކަންމަތީ ވަގުތުން ވަގުތަށް، ތެދު ޚަބަރާ މަޢުލޫމާތު ފޯރުކޮށްދިނުމުގައި ކުރިއަށްދިއުމެވެ. ބެލުންތެރިންނަށް މަޢުލޫމާތު ލިބެނިވި ޝައުގުވެރި ޕްރޮގްރާމްތަކެއް ކުރިއަށް އޮތް އަހަރުވެސް ގެނެސްދިނުމެވެ.