ރާއްޖޭގެ ފުރަތަމަ މޯލްޑިވިއަން އައިޑަލްއަކަށް ލައިޝާ ޖުނައިދު ހޮވިއްޖެއެވެ. ފްރެންޗައިޒް އުސޫލުން ރާއްޖޭގައި ބާއްވާ އެންމެ އަގުބޮޑު ރިއަލިޓީ ޝޯވ، މޯލްޑިވިއަން އައިޑަލްގެ ޓައިޓްލް ލައިޝާއާއި ހަވާލުކުރެއްވީ ރާއްޖޭގެ ރައީސުލްޖުމްހޫރިއްޔާގެ އަނބިކަނބަލުން ފާތުމަތު އިބްރާހީމްއެވެ. މިއީ ފްރެމެންޓަލް މީޑިއާގެ ހަޔާތުގައިވެސް އަންހެން ބައިވެރިއަކު އައިޑަލްއެއްގެ ފުރަތަމަ ސީޒަން ކާމިޔާބު ކުރި ފުރަތަމަ ފަހަރެވެ.
ފްރެންޗައިޒް އުސޫލުން ރާއްޖޭގައި މިހާތަނަށް ބޭއްވި އެންމެ އަގުބޮޑު ރިއަލިޓީ ޝޯވ، "މޯލްޑިވިއަން އައިޑަލް" ސީޒަން އެކެއްގެ ޓައިޓްލް ލައިޝާ ޖުނައިދު ހާސިލުކޮށްފައިވާއިރު، މި މުބާރާތުން ދެވަނަ ހާސިލުކޮށްފައިވަނީ ޝަލަބީ އިބްރާހީމްއެވެ. އަދި ތިން ވަނަ ހާސިލުކޮށްފައި ވަނީ މުހައްމަދު އިޝާންއެވެ.
މޯލްޑިވިއަން އައިޑްލްގެ ޓައިޓަލް ހޯދާފައިވާ ފަރާތައް ޕީ.އެސް.އެމްގެ ފަރާތުން ވަނީ އަގުހުރި އިނާމްތަކެއް ހުށައަޅާފައެވެ. މީގެ ތެރޭގައި، ދެ ލައްކަ ފަންސާސް ހާސް ރުފިޔާގެ ފައިސާގެ އިނާމާއި، މިއުޒިކް ސްކޮލަޝިޕަކާއި، އޭ.ބީ.ޔޫ މިއުޒިކް ފެސްޓިވަލްގައި ޕާފޯމްކުރުމުގެ ފުރުސަތު ހިމެނެއެވެ. ހަމައެހެންމެ މި މުބާރާތުގެ ސްޕޮންސަރުންގެ ފަރާތުންވެސް ވަނީ އަގުހުރި އިނާމްތަކެއް އެއްވަނަ ފަރާތަށް ހުށައަޅާފައެވެ. މީގެ އިތުރުން ދެވަނަ އަދި ތިން ވަނަ ހާސިލްކުރި ފަރާތަށްވެސް އަގުހުރި އިނާމްތަކެއް ޕީ.އެސް.އެމް އަދި ސްޕޮންސަރުންގެ ފަރާތުން ވަނީ ހުށައަޅާފައެވެ.
img:http://s1.psmnews.mv/images/660x400/14622499902197.jpg|ލައިޝާ މޯލްޑިވިއަން އައިޑަލްގެ ގްރޭންޑް ފިނާލޭގައި ލަވަ ހުށަހަޅައިދެނީ / ފޮޓޯ: ޕީއެސްއެމް
ފުރަތަމަ މޯލްޑިވިއަން އައިޑަލްއަކަށްވުމުން، އެކަން ލައިޝާ ސިފަކޮށްފައިވަނީ އޭނާއަށް ލިބުނު ވަރަށްވެސް ބޮޑު ޝަރަފެއްގެ ގޮތުގައެވެ. އަދި ހިތްވަރާއެކު މަސައްކަތް ކޮށްފިނަމަ، ކޮންމެކަމެއްވެސް ހާސިލުވެދާނެކަން މިކަމުންވެސް ދޭހަކޮށްދީފިކަމަށް އޭނާ ބުންޏެވެ.
މޯލްޑިވިއަން އައިޑަލްގެ އޮޑިޝަންތަކުން ފެށިގެންގޮސް، ގްރޭންޑް ފިނާލޭއާއި ހަމައަށްވެސް އުމުރުން 18 އަހަރުގެ ލައިޝާ ޖުނައިދު މި މުބާރާތުގެ ޖަޖުންނަށާއި، ބެލުންތެރިންނަށްވެސް މަޝްހޫރު ވެފައިވަނީ ޑރ. ލައިޝާގެ ނަމުގައެވެ. ސަބަބަކީ ހަމައެކަނި އޭނާގެ ހުނަރުގެ ސަބަބުން އެކަންޏެއްނޫނެވެ. ލައިޝާ، ޑރ. ލައިޝާގެ ގޮތުގައި މަޝްހޫރުވެފައިވަނީ އެންމެ ފުރަތަމަ އޮޑިޝަންގައިވެސް އޭނާ ބުނި ފަދައިން، އެންމެ ކުޑައިރުންސުރެއް ލައިޝާ ދެކެމުންއައި ހުވަފެނަކީ ޑޮކްޓަރަކަށްވުންކަމަށްވުމެވެ. މޯލްޑިވިއަން އައިޑަލްގެ ޓައިޓްލްއާއެކު ޕީ.އެސް.އެމްގެ ފަރާތުން މިވަނީ އޭނާ ދެކެމުންއައި ހުވަފެން ހަޤީޤަތަކަށް ހެދުމުގެ މަގު ތަނަވަސްކޮށްދީފައެވެ. އެގޮތުން ޕީ.އެސް.އެމްގެ ފަރާތުން ވަނީ ސިއްޚީ ދާއިރާއިން މަތީ ތަޢުލީމް ހާސިލުކުރުމުގެ ފުރުސަތު ފަހިކޮށްދިނުމަށްޓަކައި މެޑިސިން ސްކޮލަޝިޕެއް ހަދިޔާކޮށްފައެވެ.
ލައިޝާގެ އާއިލާގެ ފަރާތުން ވަނީ މިފަދަ ފުރުސަތެއް ޕީ.އެސް.އެމްގެ ފަރާތުން ފަހިކޮށްދިނީތީ، ވަރަށް ބޮޑަށް އުފާކުރާ ކަމަށާއި، އެކަމަށް ފަށްފަށުން ޝުކުރުއަދާކުރާކަމަށެވެ.
މި މުބާރާތުން ބެލުންތެރިންނާއި ސަޕޯޓަރުންގެ ފަރާތުން ލިބިގެންދިޔަ ހިތްވަރާއެކު، މިދާއިރާގައި ދެމިހުންނާނެކަމުގެ ޔަޤީންކަން ލައިޝާ ދިނެވެ.