ދެކުނު އޭޝިއާ ސަރަޙައްދުގެ ލީޑިންގ އިސްލާމީ ޔުނިވަރސިޓިއަކަށް ދިވެހިރާއްޖޭގެ އިސްލާމިކް ޔުނިވަރސިޓީ ހެއްދުވުމަށް މަސައްކަތްތަކެއް ކުރައްވަމުން ގެންދަވާކަމަށް އެ ޔުނިވަރސިޓީގެ ވައިސް ޗާންސެލަރ ވިދާޅުވެއްޖެއެވެ.
އިސްލާމިކް ޔުނިވަރސިޓީގެ ވައިސް ޗާންސެލަރ ޑޮކްޓަރ މުޙައްމަދު ޝަހީމް ޢަލީ ސަޢީދު ވިދާޅުވީ އިސްލާމިކް ޔުނިވަރސިޓީ މިސަރަޙައްދުގެ ލީޑިންގ ޔުނިވަރސިޓީއަކަށް އަދާކުރެވޭނެ ގޮތްތައް ފަހިވެފައިވާކަމަށެވެ. ޝަހީމް ވިދާޅުވީ މިސަރަޙައްދުގެ ސައްތައިން ސައްތަ އިސްލާމީ ޤައުމެއްގައި ސަރުކާރުގެ އެއްބާރުލުމާއެކު ޤާނޫނެއްގެ ދަށުން އުފެދިފައިވާ ޔުނިވަރސިޓީއަކަށް ލީޑިންގ ރޯލް އަދާކުރެވޭނެ ގޮތްތައް ފަހިވެފައިވާކަމަށެވެ.
ޝަހީމް ވިދާޅުވީ ލީޑިންގ ޔުނިވަރސިޓީއަކަށް އިސްލާމިކް ޔުނިވަރސިޓީ ހެދުމުގެ ގޮތުން މިސަރަޙައްދުގެ ޤައުމުތަކުގެ ޔުނިވަރސިޓީތަކުގެ އެކަޑަމިކް ސަޕޯޓް އިސްލާމިކް ޔުނިވަރސިޓީއަށް ހޯދުމަށް މިއަހަރުގެ އޮގަސްޓްމަހުގެ 18 ވަނަ ދުވަހު މިސަރަޙައްދުގެ ޤައުމުތަކުގެ ޔުނިވަރސިޓީތަކުގެ ޕްރޮފެސަރުންނާއެކު ކޮންފަރެންސެއް ރާއްޖެގައި ބޭއްވުމަށް ހަމަޖެހިފައިވާ ކަމަށެވެ. މިކޮންފަރެންސްގައި މިސަރަޙައްދުގެ ޤައުމުތަކުގެ މަތީ ފެންވަރުގެ 50 ޕްރޮފެސަރުން ބައިވެރިވާނެކަމަށް ޝަހީމް ވިދާޅުވިއެވެ.
މި ކޮންފަރެންސް ބާއްވަނީ އިންޓަރނޭޝަނަލް އިންސްޓިޓިއުޓް އޮފް އިސްލާމިކް ތޯޓް އާއި ގުޅިގެންނެވެ. މި އިންސްޓިޓިއުޓަކީ އިންޓަރނޭޝަނަލް އިސްލާމިކް ޔުނިވަރސިޓީ އޮފް މެލޭޝިއާ އުފެއްދުމުގައި މެލޭޝިއާ ސަރުކާރަށް އެހީވެދީފައިވާ އިންސްޓިޓިއުޓެކެވެ.