ލޯންޗަކާއި ޑިންގީއެއް ޖެހި ދެ މީހަކަށް އަނިޔާވެއްޖެ

ހުޅުމާލެ ކައިރިން ލޯންޗަކާއި ޑިންގީއެއް ޖެހި ހިނގި އެކްސިޑެންޓެއްގައި ދެ މީހަކަށް އަނިޔާވެއްޖެއެވެ.

ފުލުހުން ވިދާޅުވީ މި ހާދިސާ ހިނގާފައިވަނީ މިރޭ 8:10 ހާއިރު ހުޅުމާލެ ބޭރުން އޮންނަ ބަނާނާ ރީފް ކައިރިން ކަމަށެވެ. އަދި ލޯންޗު ދަތުރު ކުރަމުންދިޔައީ ކ. ހިންމަފުށިން ޝެރަޓަން ރިސޯޓަށް ކަމަށްވެސް ފުލުހުން ވިދާޅުވެއެވެ.

ފުލުހުން ވިދާޅުވީ މި ހާދިސާގައި އަނިޔާވީ ޑިންގީގައި ތިބި ދިވެއްސަކާއި ބިދޭސީއަކަށެވެ. އެ މީހުންނަށް ލިބުނު އަނިޔާގެ ތަފްސީލު ހާމަނުކުރިނަމަވެސް ދެމީހުންނަށް ލިބުނު އަނިޔާތައް ސީރިއަސް ނޫންކަމަށް ފުލުހުން ވިދާޅުވެއެވެ.

ފުލުހުން ވިދާޅުވީ އެކްސިޑެންޓުވި ލޯންޗުގައި 22 މީހުން ތިބި ކަމަށެވެ. ނަމަވެސް އޭގެއިން އެއްވެސް މީހަކަށް އަނިޔާއެއް ލިބިފައިވާނުވާކަމަށެވެ.