އެސްޑީއެފްސީން ލޯނު ދޫކުރުން ހުއްޓާލާފައެއް ނުވޭ

އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަން، އެސްޑީއެފްސީން ލޯނު ދޫކުރުން ހުއްޓާލާފައި ނުވާކަމަށް އެ ބޭންކުން ބުނެފިއެވެ.

އެސްޑީއެފްސީން މިކަން ހާމަކުރީ އެ ބޭނުންކުން ލޯނު ދޫކުރުން ހުއްޓާލާފައިވާކަމަށް ބުނެ ފަތުރަމުންދާ ހަގީގަތާއި ހިލާފު ވާހަކަތަކާއި ގުޅިގެނެވެ.

އެސްޑީއެފްސީއިން ނެރުނު ބަޔާނުގައި ބުނީ އެ ބޭންކުން ލޯނު ދޫކުރުން ވަގުތީ ގޮތުން ހުއްޓާލައިފައިވާކަމަށް ބުނެ ފަތުރަމުންދަނީ ހަގީގަތާއި ޚިލާފު ވާހަކަތަކެއްކަމަށެވެ.

އެސްޑީއެފްސީން ބުނީ އެ ބޭންކުން ދޫކުރަމުން ގެންދާ ލޯނުތައް އިތުރުވެސް ކޮށްފައިވާކަމަށެވެ. އެގޮތުން "ކަނޑުފަޅު ނަފާ" ލޯނުގެ ދަށުން ފަރުމަހުގެ މަސްވެރިކަމަށް ހާއްސަ ލޯނެއް ތައާރަފްކޮށްފައިވާކަމަށްވެސް ބެންކުން ބުނެއެވެ. މީގެއިތުރުން "ދަނޑުވެރި ނަފާ" ލޯނާއި އަންހެނުން ޝާމިލްވާ ވިޔަފާރިތަކަށް "ފަށާ މަދަދު" ލޯނަށް މިހާރުވެސް ހުށަހެޅޭނެކަމަށް އެ ބެންކުން ބުނެއެވެ. އަދި މި ލޯނުތަކަށް އެ ބޭންކުގެ ކަސްޓަމަރ ޕޯޓަލް މެދުވެރިކޮށް ހުށަހެޅޭނެކަމަށްވެސް ބެންކުން ބުނެއެވެ. މީގެއިތުރުން މި އަހަރުގެ މިހާތަނަށް ކަސްޓަމަރުންގެ ފަރާތުން ލޯނު ހޯދުމަށް އެދި ގިނަ ހުށައެޅުންތަކެއް ލިބެމުންދާކަމަށްވެސް ބެންކުން ބުނެއެވެ.

އެސްޑީއެފްސީއަކީ މާލީ އެހީ ލުއި އިންޓްރެސްޓު ރޭޓެއްގައި ފަސޭހަކަމާއެކު ފޯރުކޮށްދިނުމަށް ސަރުކާރުން އުފައްދާފައިވާ ބެންކެކެވެ. މި ކުންފުނީގެ މައިގަނޑު މަޤްޞަދަކީ ދިވެހިރާއްޖޭގައި އަލަށް އުފައްދާ އަދި ކުރިއަރަމުން އަންނަ ކުދި އަދި މެދު ފަންތީގެ ވިޔަފާރިތަކަށް ބޭނުންވާނެ މާލީ އެހިތެރިކަން ފޯރުކޮށްދިނުމުގެ ގޮތުން ތަފާތު އިޤްތިޞާދީ ދާއިރާތަކަށް އަމާޒުކޮށް ލުއިގޮތަކަށް ލިބޭނޭ ލޯނު ތައާރަފްކޮށް އެމަސައްކަތް ދެމެހެއްޓެނިވި ގޮތެއްގައި ކުރިޔަށް ގެންދިޔުމެވެ.