300އަށްވުރެ ގިނަ އިންވެސްޓަރުންނާއެކު ރާއްޖޭގެ ދެވަނަ އިންވެސްޓް ފޯރަމް ދުބާއީގައި

"އިންވެސްޓް މޯލްޑިވްސް ފޯރަމް" އަކީ ރާއްޖޭގައި ހުރި އިންވެސްޓްމަންޓާ ވިޔަފާރީގެ ފުރުޞަތުތައް ބޭރުގެ އިންވެސްޓަރުންނާއި ހަމައަށް ގެންގޮސްދޭ އެންމެ މުހިންމު އެއް ޕްލެޓު ފޯމެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަސައްވުރުގައި ހިމެނޭ އެންމެ މުހިންމު އެއްކަމަކީ ރާއްޖޭގެ ފަތުރުވެރިކަމަށް ބަރޯސާވުން ނިމުމަކަށް ގެނެސް އެހެން ސިނާއަތްތަކުން ރާއްޖެ ކުރިއެރުވުމެވެ. އޭގެ ތެރޭގައި އެސްއީޒެޑު، މަސްވެރިކަމާއި، ބަންކަރިންފަދަ ދާއިރާތައް ހިމެނެއެވެ.

"އިންވެސްޓް މޯލްޑިވްސް"ގެ ފުރަތަމަ ފޯރަމް ވަނީ މިދިޔަ މަހު ޗައިނާގެ ފޫޖިއާން ޕްރޮވިންސްގައި ބާއްވާފައެވެ. އެ ފޯރަމުގައި ރާއްޖޭގައި އިންވެސްޓުކުރުމަށް އެޤައުމުގެ ބޮޑެތި އެތައް ކުންފުންޏަކުން ޝަޢުޤުވެރިކަން ފާޅުކުރިއެވެ. އެހެންކަމުން މިފަހަރު ޔޫއޭއީގެ ދުބާއީގައި ބާއްވާ ފޯރަމަށް ކުރެވޭ އުންމީދު މާ ބޮޑެވެ.

ސަބަބަކީ ދުބާއީ އަކީ ދުނިޔޭގެ މަލްޓިބިލިއަނަރުންގެ އެތައް އިންވެސްޓްމަންޓަކާ ވިޔަފާރިތަކުގެ މައި ހަބު ކަމަށްވާތީއެވެ. އަދި ސަރުކާރާ ޢަރަބި އިސްލާމީ ޤައުމުތަކާ އޮތް ގާތް ބަދަހި ގުޅުމަކީވެސް މިކަމުގެ ހެއްކެކެވެ.

ރައީސްގެ ދަތުރުފުޅުގެ ތެރެއިން މިމަހުގެ 13 ވަނަ ދުވަހު ޔޫއޭއީގެ އެންމެ މަޝްހޫރު އެއް ބިނާ "ބުރުޖް އަލް ޢަރަބް"ގައި ރާއްޖޭގެ ދެވަނަ އިންވެސްޓް ފޯރަމް ފެށޭނެއެވެ.

މި ފޯރަމުގައި ރާއްޖެއާއި ބައިނަލްއަޤްވާމީ އިންވެސްޓަރުން ހިމެނޭހެން 300އަށްވުރެ ގިނަ އިންވެސްޓަރުން ބައިވެރިވާނެއެވެ. އޭގެ ތެރޭގައި ޔޫއޭއީގެ ޝާހީ އާއިލާގެ ވިޔަފާރިތަކާ ގުޅުންހުރި އިންވެސްޓަރުންނާއި ވިޔަފާރިވެރިންވެސް ހިމެނެއެވެ.

އިންވެސްޓްމަންޓުގެ މުހިންމު ދާއިރާތަކުގެ ތެރޭގައި:

* މާލޭ ވިޔަފާރި ބަނދަރު ތިލަފުއްޓަށް ބަދަލުކުރުން
* ރަސްމާލެ ތަރައްގީ ކުރުން
* ކަނޑުއަޑީގެ ޓަނަލް ހެދުން
* އިހަވަންދިއްޕޮޅު އިންޓަގްރޭޓެޑް ޕްރޮޖެކްޓް
* ގދ. ތިނަދޫ-ކާޑެއްދޫ ލިންކް ޕްރޮޖެކްޓް
* އައްޑޫ ސިޓީ ހިތަދު އާއި ހުޅުމީދޫ ލިންކް ރޯޑް ޕްރޮޖެކްޓް
* އިޔާދަކުރަނިވި ހަކަތަ އަދި ކުނި މެނޭޖު ކުރުމުގެ ޕްރޮޖެކްޓް
* ވެލާނާ އިންޓަރނޭޝަނަލް އެއަރޕޯޓު ތަރައްޤީކުރުން
* 15 ޑޮމެސްޓިކް އެއަރޕޯޓު ތަރައްޤީކުރުން
* އެސްއީޒެޑު ފުޅާކުރުން
* އައު ރިސޯޓުތައް ތަރައްޤީކުރުން
* ހައްދުންމަތީ ބަންކަރިން ޕްރޮޖެކްޓް

އެސްއީޒެޑުތަކަށް އިންވެސްޓް ކުރަން ހުޅުވާލި ފުރުސަތުގައި ފުރަތަމަ ޕްރޮޕޯޒަލްގެ ގޮތުގައި ލިބުނީ އިޔާދަކުރަނިވި ހަކަތައިގެ ބިޔަ ޕްރޮޖެކްޓު ކަމަށް ރައީސް ވަނީ ވިދާޅުވެފައެވެ.

ރައީސްގެ ތަސައްވުރުގައި ހިމެނޭ ވެލާނާ އިންޓަރނޭޝަނަލް އެއަރޕޯޓު މަޝްރޫޢަށް ހަމައެކަނި ބަލާއިރުވެސް، މިއީ އެއެއަރޕޯޓުން އަހަރަކު 25 މިލިއަން ފަސިންޖަރުންނަށް ޚިދުމަތްދެވޭ ފެންވަރަށް ތަރައްޤީކުރާ މަޝްރޫޢެކެވެ. އެބިޔަ މަޝްރޫއު ސަރުކާރުން އިއުލާންކޮށްފައިވާއިރު، ބޭރުގެ އިންވެސްޓަރުންގެ ޝަޢުޤުވެރިކަން އެމަޝްރޫޢަށް އެހާމެ ބޮޑެވެ. މިއީ ދިވެހިރާއްޖޭގެ އިޤްތިޞާދު މުޅިން އެހެން ހަރުފަތަކަށް ގެންގޮސްދޭނެ މަޝްރޫއަކަށްވާނެއެވެ. މިއާއެކު ވެލާނާ އިންޓަރނޭޝަނަލް އެއަރޕޯޓަކީ ހަމައެކަނި ފަތުރުވެރިން ރާއްޖެއަށް ވަދެގެން އަންނަ އަދި ނުކުމެގެންދާ ދޮރާށީގެ ގޮތުގައި އޮތް އޮތުން ބަދަލުވެގެންދާނެއެވެ. އެއަރޕޯޓްގައި ތަރައްޤީވެގެންދާނީ ހަމައެކަނި ޓަރމިނަލެއްނޫނެވެ. ތެޔޮ ރައްކާ ކުރާ ކެޕޭސިޓީވެސް އިތުރުވާނެއެވެ.

އިންވެސްޓް ފޯރަމް ބޭއްވުމުގައި އެންމެ އިސްކޮށް އުޅުއްވާ އެއް ބޭފުޅަކީ އިޤްތިޞާދީ ތަރައްޤީއާ ވިޔަފާރިއާ ބެހޭ ވަޒީރު މުޙައްމަދު ސަޢީދެވެ. އެމަނިކުފާނުގެ ވަޒީރުކަމުގައި މީގެ ކުރިންވެސް މިފަދަ އެތައް ފޯރަމެއް ބާއްވާ ރާއްޖެއަށް އިންވެސްޓަރުންގެ ޝަޢުޤުވެރިކަން ހޯދާފައިވެއެވެ.

ޗައިނާގާއި ބޭއްވި ފޯރަމްގައި ވަޒީރު ވިދާޅުވެފައިވަނީ އައު ސަރުކާރުން މިފަދަ ފޯރަމްތައް ބާއްވަނީ، އަމިއްލަ ވިޔަފާރިތަކަށް ފަހި ފުރުސަތުތަކެއް ހޯދާދިނުމަށްކަމަށެވެ. ސަޢީދު ވިދާޅުވީ، ފޯރަމެއްގެ ނަތީޖާ ފެންނާނީ، ވިޔަފާރިތައް ފެށި، އަމަލީގޮތުން އެކަންކަން ފެންނަން ފެށުމުން ކަމަށެވެ.

އިންވެސްޓް ފޯރަމްގައި ހުޅުވާލާނެ އެހެން ފުރުޞަތުތަކާއެކު ރާއްޖޭގެ އިޤްތިޞާދު އައު ހަރުފަތަކަށް ގެންގޮސްދޭނެ ކަމުގެ އެއް ހެއްކަކީ ރާއްޖޭގެ އިޤްތިޞާދީ ޙާލަތު ރަނގަޅުކުރުމަށް ރައީސް ޑރ. މުޢިއްޒު އަޅުއްވާފައިވާ ފިޔަވަޅުތައް ބައިނަލްއަޤްވާމީ މާލީ އިދާރާތަކުން އެންޑޯޒްކޮށް ތަޢުރީފްކޮށްފައިވުމެވެ. ވެލާނާ އިންޓަރނޭޝަނަލް އެއަރޕޯޓު ތަރައްޤީކުރުމުގެ މަޝްރޫއާއެކު ރާއްޖޭގައި ފަތުރުވެރިންނަށް ޚިދުމަތްދޭ ފެސިލިޓީތައް އިތުރުވެ، އިޤްތިސާދީގޮތުން މަންފާކުރާނެ ކަމަށް އައިއެމްއެފުންވަނީ ލަފާކޮށްފައެވެ.

ކޮންމެއަކަސް ރައީސްގެ މި ދަތުރުފުޅުވެގެންދާނީ އެމަނިކުފާނުގެ އިޤްތިޞާދީ ސިޔާސަތު ކުރިއެރުވުމަށް މުހިންމު ދަތުރުފުޅަކަށެވެ. އެކަން އެމަނިކުފާނު މިހާތަނަށް ކުރެއްވި ބޭރުގެ ދަތުރުފުޅުތަކުން ސާބިތުކޮށްދެއްވައިފިއެވެ. ތުރުކީވިލާތާއި، ޔޫއޭއީ އަދި ޗައިނާ ދަތުރުފުޅުން ރާއްޖޭގެ އިޤްތިޞާދު ކުރިއެރުވުމާއި ތަރައްޤީއަށް ފުޅާ އެތައް މަގުތަކެއް ވަނީ ކޮށާދީފައެވެ.

އެހެންކަމުން ރައީސްގެ ޔޫއޭއީ، ދުބާއީ ދަތުރުފުޅާއި އިންވެސްޓް ފޯރަމަށް ކުރެވޭ އުންމީދު ބޮޑެވެ.