ޖިނާޢީ ކުށްތައް ތަޙުޤީޤު ކުރުމާއި، އެފަދަ ކުށްތަކުގައި ދަޢުވާ އުފުލުމާއި، ޝަރީއަތް ހިންގުމުގައި ޢަމަލުކުރާނެ ގޮތުގެ އުޞޫލުތައް ބަޔާންކޮށްފައިވާ ޖިނާއީ ޢިޖްރާތުގެ ބިލް ރައްޔިތުންގެ މަޖިލީހުން މިއަދު ފާސްކުރައްވައިފިއެވެ.
ޖިނާޢީ އިޖްރާތުގެ ބިލަކީ، ޖިނާއީ ތަޙްޤީޤުތައް އެކަށީގެންވާ ހަލުވިމިނެއްގައި ކުރިއަށް ގެންދެވުމަށް ބޭނުންވާ އުޞޫލުތައް ބަޔާންކުރައްވާފައިވާ ބިލެކެވެ. މިބިލް ފާސްވީ 68 މެމްބަރުންގެ އިއްތިފާޤުންނެވެ. ކުށުގެ ތުހުމަތުގައިވާ މީހުންގެ ޙައްޤުތަކަށް އުނިކަން ނާންނަ ގޮތުގެ މަތިން ޖިނާއީ ދަޢުވާ އުފުލުމަށް ބާރުއެޅުމާއި، ވީހާވެސް އިންޞާފުވެރިކޮށް ކުރިއަށް ގެންދިއުމުގެ އުޞޫލުތަކުގެ އިތުރުން ތަޙުޤީޤުގެ މަރުޙަލާގައި ޢަމަލުކުރާނެ އުޞޫލުތައްވެސް މި ބިލުގައިވެއެވެ. ކޯޓު އަމުރު ބޭނުންވާނެ ޙާލަތުތަކާއި ކޯޓު އަމުރަކާ ނުލައި މީހުން ހައްޔަރުކުރާނެ އިޖުރާޢަތްތަކާއި، ހައްޔަރުކުރާ މީހުން ފަނޑިޔާރެއްގެ ކުރިމައްޗަށް ޙާޟިރުކޮށް، ބަންދާމެދު ގޮތެއް ނިންމުމާއި ކަފާލާތުގެ ދަށުން ދޫކޮށްލުމުގެ އުޞޫލުތައްވެސް މި ބިލްގައި ބަޔާންކުރައްވާފައިވެއެވެ. މިބިލު ތަޞްދީޤު ކުރެއްވުމަށްފަހު ޢަމަލުކުރާނީ 8 މަސް ދުވަސް ފަހުންނެވެ. މި ބިލް ދިރާސަކުރެއްވި ކޮމިޓީގެ ރިޕޯޓަށް ވާހަކަ ދެއްކެވި މެމްބަރުން ވަނީ، މިއީ އައު ޤާނޫނުއަސާސީ ވުޖޫދަށް އައިފަހުން ވަރަށް ގިނަދުވަސް ވަންދެން މަޖިލީހުގައި އޮތުމަށްފަހު، ފާސްކުރެވޭތީ އުފާކުރައްވާކަމަށް ވިދާޅުވެ، މިފަދަ ޤާނޫނަކަށް ރާއްޖެ އިންތިޒާރުކުރާތާ ވަރަށް ގިނަ ދުވަސްވެއްޖެކަމަށް ވިދާޅުވިއެވެ.
ކައިވެނި ރޫޅުމުން ދެމަފިރިންގެ މަސައްކަތުން ހޯދާފައިވާ މުދަލުން ބައެއް، އަންހެން މީހާއަށް ލިބޭގޮތަށް ޢާއިލާއާބެހޭ ޤާނޫނަށް ހުށައެޅުއްވި އިޞްލާޙުވެސް މި ޖަލްސާގައި ފާސްކުރެއްވިއެވެ. ސަރުކާރުގެ ފަރާތުން ދިއްދޫ ދާއިރާގެ މެމްބަރު ޢަބްދުއްލަޠީފް މުޙައްމަދު ހުށައަޅުއްވާފައިވާ އެއިޞްލާޙުގެ މަޤްޞަދުގައި ވަނީ މީ ކައިވެނި ރޫޅުމުން ޢާއިލާ ނިކަމެތިވުމުގެ ފުރުޞަތު ކުޑަކުރެއްވުމަށްކަމަށް ހުށައެޅުއްވި އިޞްލާހެއްކަމަށެވެ.
މިޖަލްސަގައި ކައުންސިލްތަކަށް ކައުންސިލަރުން އިންތިޚާބުކުރެވޭ ގޮތާއި، ކައުންސިލްތަކުގެ ޢުމުރު ޤާނޫނު އަސާސީގައި ކަނޑައަޅުއްވާފައި އޮތްއޮތުން ލާމަރުކަޒީ ޤާނުނުގައި ހިމެނުއްވުމަށް ހުށައަޅުއްވާފައިވާ ފާސްވެފައެއްނުވެއެވެ. މި ބިލް ފާސްކުރެއްވުމަށް ފެނިވަޑައިގަންނަވާ ކަމަށް 44 މެންބަރުން ވަނީ ވޯޓްދެއްވާފައެވެ. އަދި ފެނިވަޑައިނުގަންނަވާ ކަމަށް 22 މެންބަރުން ވޯޓްދެއްވާފައެވެ. ރައްޔިތުންގެ މަޖިލީހުގެ އަޢުލަބިއްޔަތު ނުލިބުމުގެ ސަބަބުން މި ބިލްވަނީ ބާތިލްވެފައެވެ.
މިޖަލްސާގައި ދެން ފާސްކުރައްވާފައި ވަނީ ސްވިސް ކޮންފެޑެރޭޝަނަށް ދިވެހިރާއްޖެއިން ކަނޑައަޅާ ނޮން-ރެޒިޑެންޓް ސަފީރުކަމަށް ޑރ. ހާލާ ޙަމީދު އައްޔަން ކުރެއްވުމަށެވެ. އަދި "އެގްރީމެންޓް އޮން އެސްޓެބްލިޝިންގ ދަ ސާރކް ސީޑް ބޭންކް" އަށް ދިވެހިރާއްޖެއިން ޢަމަލުކުރުމަށްވެސް ފާސްކުރައްވާފައިވެއެވެ.