މަޖިލިސް އިންތިޚާބަށް ކުރިމަތިލުމުގެ ފުރުޞަތު ހުލުވާލައިފި

އަންނަ މާރިޗު މަހު އޮންނަ ރައްޔިތުންގެ މަޖިލީހުގެ އިންތިޚާބަށް ކުރިމަތިލުމަށް އިލެކްޝަންސް ކޮމިޝަނުން ހުޅުވާލައިފިއެވެ.

އެކޮމިޝަނުން ވިދާޅުވީ، އިންތިޚާބަށް ކުރިމަތިލުމުގެ ފުރުޞަތު މިއަދުން ފެށިގެން، ފެބުރުއަރީ މަހުގެ 14 ވަނަ ދުވަހާ ހަމައަށް ހުޅުވާލާފައިވާކަމަށެވެ. އަދި އެޕްލިކޭޝަން ފޯމު ދޫކުރުމާއި ބަލައިގަތުން ކުރިއަށްދާނީ ހެނދުނު 9:00 އިން މެންދުރުފަހު 2:00 އަށް ދަރުބާރުގޭގެ ރަންނަބަނޑޭރި މާލަމުގައިކަމަށްވެސް އިލެކްޝަންސް ކޮމިޝަނުން ވިދާޅުވިއެވެ. ފޯމު ބަލައިގަތުން ހުކުރު ދުވަހު ކުރިއަށްދާނީ އެދުވަހުގެ މެންދުރުފަހު 2:00 އިން ހަވީރު 4:00 އަށްކަމަށް އެކޮމިޝަނުން ވިދާޅުވިއެވެ.

މީގެ އިތުރުން އެޕްލިކޭޝަން ހުށައަޅާ ފަރާތްތަކުގެ ފައިސާ ބަލައިގަންނާނީ ހަމައެކަނި ޕީއޯއެސް މެޝިން ބޭނުންކޮށްގެން ކޭޝް ކާޑުންކަމަށްވެސް އިލެކްޝަންސް ކޮމިޝަނުން ވިދާޅުވިއެވެ. މިފަހަރު ނަގުދު ފައިސާ ބަލައި ނުގަންނަން އެކޮމިޝަނުން ވަނީ ނިންމާފައެވެ.

ޕީއެސްއެމް ނިއުސްއަށް މަޢުލޫމާތު ދެއްވަމުން އިލެކްޝަންސް ކޮމިޝަނުގެ ނައިބު ރައީސް އިސްމާޢީލް ޙަބީބު ވަނީ ފޯމު ހުށައަޅާއިރު ރަނގަޅު އަދި ޞައްޙަ މަޢުލޫމާތު ހިމެނުމަށް އެދިވަޑައިގެންފައެވެ. މިދިޔަ ޑިސެމްބަރު މަހުގެ 14 ވަނަ ދުވަހުން ފެށިގެން ސާފުކޮށްފައިވާ ކުށާއި ދަރަނީގެ ރެކޯޑު އެކޮމިޝަނުން ބަލައިގަންނަމުން ދާނެކަމަށް ޙަބީބު ވިދާޅުވިއެވެ. އަދި ބޭންކު އެކައުންޓު ހުޅުވާއިރު އެކަމަށް ޚާއްޞަ އެކައުންޓެއް ހުޅުވުމުގެ މުހިންމުކަން ހަބީބު ފާހަގަކުރެއްވިއެވެ.

"ބައެއް ބޭފުޅުންނަށް ދަތިފުޅު އެބަވޭ އިންތިޚާބަށް ޚާއްޞަ އެކައުންޓެކޭ ބުނާތީ. އައު ބޭންކު އެކައުންޓެއް އޮންނަންވީ. އެ އެކައުންޓު މި ޚާއްޞަކުރަނީ އިންތިޚާބުގެ މާލީ ކަންކަމަށް. އެހެންވީމަ ބޭންކު އެ ވިދާޅުވާގޮތަކުން ފަހަރުގަ އުނދަގޫވެދާނެ. ނަމަވެސް ބޭނުނަވަނީ އައު އެކައުންޓު ނަންބަރު. ރާއްޖޭގައި ހިންގާ ކޮންމެ ބޭންކެއްގަވެސް އެކައުންޓެއް ހުލުވިދާނެ." އިލެކްޝަންސް ކޮމިޝަނުގެ ނައިބު ރައީސް އިސްމާޢީލް ޙަބީބު ވިދާޅުވިއެވެ.

ޙަބީބު ވަނީ އިންތިޚާބަށް ވާދަކުރަން ފޯމު ހުށައަޅާއިރު އެންމެ ފަހުވަގުތަށް މަޑުނުކޮށް އެޕްލިކޭޝަން ހުށައެޅުމަށް އެދިވަޑައިގެންފައެވެ.

"ފޯމު ހުށައަޅާއިރު ފޯމާ އެކީ ހުށައަޅާ މަޢުލޫމާތަކީ ވަރަށް ސައްޙަ މައުލޫމާތަށް ވާންޖެހޭނެ. އެންމެ ފަހުވަގުތަށް މަޑުކުރައްވައިފިއްޔާ އިލެކްޝަންސް ކޮމިޝަނަށް އެ މުއްދަތުގެ ތެރޭގައި ފަހު ދުވަހު ހުށައަޅައިގެން އޭގެ މައްސަލައެއް ދިމާވެގެން އެ ފޯމު ޞައްޙަކަން ކުރުމަށް ކުރަންޖެހޭ ކަންކަންކުރުމަށް ފުރުޞަތު ނުލިބިދާނެ." އިލެކްޝަންސް ކޮމިޝަނުގެ ނައިބު ރައީސް އިސްމާޢީލް ޙަބީބު ވިދާޅުވިއެވެ.


ޙަބީބު ވަނީ އަމިއްލަގޮތުން އިންތިޚާބުގައި ވާދަކުރާ ކެންޑިޑޭޓުން ފޯމާއެކު، ދާއިރާއެއްގެ 50 މީހުންގެ ސޮއި ހުށައަޅާއިރު ޞައްޙަ ސޮއި ހުށައެޅުމަށްވެސް އެދިވަޑައިގެންފައެވެ. އަދި ދުރާލާ އެޕްލިކޭޝަން ހުށައެޅުމަށް އިލްތިމާސްކުރެއްވިއެވެ. ޙަބީބު ވިދާޅުވީ، ޤާނޫނުގައި ބަޔާންކުރާ 48 ގަޑިއިރުގެ ތެރޭގައި ކެންޑިޑެންސީ ބަލައިގެންފިކަން ނުވަތަ ނޫންކަން އަންގާނެކަމަށެވެ.

ރައްޔިތުންގެ މަޖިލީހުގެ އިންތިޚާބު ބޭއްވުމަށް ކޮމިޝަނުން ކަނޑައަޅާފައިވަނީ މާރިޗް 17 ވާ އާދީއްތަ ދުވަހުއެވެ. އެހެންނަމަވެސް، އިންތިހާބުތަކާ ބެހޭ ޢާންމު ގާނޫނަށް ގެނެވޭ ބަދަލަކުން، އިންތިހާބުގެ ތާރީޚަށް ބަދަލެއް ގެނައުމަށް ލާޒިމްވެއްޖެ ހިނދެއްގައި، އެކަން އެގޮތަށް ވުމުގެ ފުރުސަތު އޮންނާނެކަމަށްވެސް އިލެކްޝަންސް ކޮމިޝަނުން ވިދާޅުވިއެވެ. އެކޮމިޝަނުން ޢަމަލުކުރަނީ ގާނޫނުގައިވާ ގޮތުގެމަތިންކަމުގެ ޔަޤީންކަން ވަނީ ދެއްވާފައެވެ.
ގާނޫނަށް ގެނެވޭ ބަދަލަކުން އިންތިހާބު ބާއްވާ ތާރީޚު ފަސްކުރަން ޖެހިއްޖެނަމަ، އީސީ އޮންނާނީ އެކަމަށް ތައްޔާރުވެގެންކަމަށްވެސް އެކޮމިޝަނުން ވަނީ ވިދާޅުވެފައެވެ.