ޤާނޫނީ އިމުގެ ތެރެއިން ސަރުކާރު ޖަވާބުދާރީ ކުރުވާނަން: ރައީސް ޞާލިޙް

ޤާނޫނީ އިމުގެ ތެރެއިން މިސަރުކާރު ޖަވާބުދާރީ ކުރުވުމުގެ މަސައްކަތް އެމްޑީޕީން ކުރާނެކަމަށް ކުރީގެ ރައީސް އިބްރާހިމް މުޙައްމަދު ޞާލިޙު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، މާލޭގައި އެމްޑީޕީން ކުރިއަށްގެންދިޔަ ސިޔާސީ ހަރަކާތެއްގައި ވާހަކަދައްކަވަމުންނެވެ.

ކުރީގެ ރައީސް އިބްރާހިމް މުޙައްމަދު ޞާލިޙު ވިދާޅުވީ، އެމްޑީޕީ މިހާރު އޮތީ އިދިކޮޅު ޕާޓީއެއްގެ ގޮތުގައިކަމަށެވެ. އެހެންކަމުން އިދިކޮޅު ޕާޓީއެއްގެ ޒިންމާ އެމްޑީޕީން އަދާކުރާނެކަމަށެވެ.

މިހާރުގެ ސަރުކާރުން ކުރާ ކަންކަން ބަލައި ޤާނޫނީ އިމުގެ ތެރެއިން ޖަވާބުދާރީ ކުރުވުމުގެ މަސައްކަތް އެމްޑީޕީން ކުރާނެކަމަށާއި މިއީ ކުރިންވެސް އެމްޑީޕީން ކޮށްފައިވާ މަސައްކަތެއްކަން ރައީސް އިބްރާހިމް މުޙައްމަދު ޞާލިޙު ފާހަގަކުރެއްވިއެވެ.

"އެމްޑީޕީއާއި އެކަން (ސަރުކާރު ޖަވާބުދާރީ ކުރުވުން)) ކުރަން އިނގޭ ބައެއް. ކޮށްފައި ހުރި ބައެއް. ކުރިއަށްއޮތް ތަނުގައިވެސް އެކަން އިރާދަކުރެއްވިއްޔާ އަޅުގަނޑުމެން ކުރާނަން." ރައީސް ޞާލިޙު ވިދާޅުވިއެވެ.

ރައީސް ޞާލިޙް ވިދާޅުވީ، މާލެއަށް މިހާރުން މިހާރަށް ހައްލު ގެންނަންޖެހޭ ގިނަ ކަންތައްތަކެއް އެބަހުރިކަމަށެވެ. އަދި މާލެއަށް މީހުން ޖަމާވުން ހުއްޓުވުމަށް ރަށްރަށުގައި ޚިދުމަތްތައް ޤާއިމްކުރަންޖެހޭކަން ރައީސް ޞާލިޙު ފާހަގަކުރެއްވިއެވެ.