ރާއްޖެއާއި ޗައިނާގެ ގުޅުމަށް އެހެން ޤައުމަކުން ހިތްހަމަނުޖެހުން އޮންނަން ޖެހޭނެކަމަށް ޤަބޫލުނުކުރަން: ޒަމީރު

ރާއްޖެއިން ޗައިނާއާއެކު އޮންނަ ގުޅުން ބަދަހިވުމުން، އެހެން ޤައުމަކުން ހިތްހަމަނުޖެހުން އޮވެގެންވާނެކަމަށް ޤަބޫލުފުޅު ނުކުރައްވާކަމަށް ޚާރިޖީ ވަޒީރު މޫސާ ޒަމީރު ވިދާޅުވެއްޖެއެވެ. ވަޒީރު މިހެން ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޗައިނާއަށް ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިން ޕީއެސްއެމް ނިއުސްއަށް ދެއްވި އިންޓަރވިއުއެއްގައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޗައިނާއަށް ކުރައްވާ ފުރަމާނަ ދަތުރުފުޅު މިވަނީ ނިމުމަކަށް އައިސްފައެވެ. މިއީ މި ދަތުރުފުޅުގެ އެންމެ ފަހު ދުވަހެވެ.

ރައީސް ޗައިނާއަށް ކުރައްވާ ދަތުރުފުޅާއި ގުޅިގެން ރާއްޖެ އަދި ބައިނަލްއަޤްވާމީ ބައެއް މީޑިއާތަކުގައި ވަނީ ރާއްޖެއާއި އެހެން ޤައުމުތަކާއެކު އޮންނަ ގުޅުމާމެދު ސުވާލު އުފައްދާފައެވެ.

އެވާހަކަތަކާ ގުޅޭގޮތުން ވާހަކަފުޅު ދައްކަވަމުން ޚާރިޖީ ވަޒީރު މޫސާ ޒަމީރު ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާރިޖީ ސިޔާސަތަކީ "ޕްރޯ މޯލްޑިވްސް" ނުވަތަ ދިވެހިންނަށް އެންމެ ފަހިވާނެ ސިޔާސަތުކަމަށެވެ. އެގޮތުން އެ ސިޔާސަތަކީ ދިވެހިންނާ ދޭތެރޭ ރަނގަޅަށް ކަންތައް ކުރާ ކޮންމެ ބަޔަކާ ގުޅުން ބަދަހިކުރުންކަމަށާއި، އަދި ދިވެހިންނާ ދޭތެރޭ އިހާނެތިކޮށް ކަންތައްކުރާ ބަޔަކާ ދޭތެރޭ ގުޅުން ބަދަހި ނުކުރުންކަމަށް ވަޒީރު ވިދާޅުވިއެވެ. މިއީ ރައީސް ވަރަށް ޞަރީހަކޮށް ވިދާޅުވާ ވާހަކަފުޅެއްކަން ފާހަގަކުރައްވާ ވަޒީރު ވިދާޅުވީ އެހެންކަމުން ރާއްޖެއާ ރަޙްމަތްތެރިކަން ޗައިނާއާއެއްކޮށް ބަދަހިވުމުން، އެކަމާ ހިތްހަމަ ނުޖެހުން އެހެން ޤައުމަކުން އޮވެގެންވާނެކަމަށް އެމަނިކުފާނު ޤަބޫލުފުޅު ނުކުރައްވާކަމަށެވެ. ރާއްޖެއިން ގުޅުން ބަދަހިކުރާނީ ދިވެހިންނަށް އެއިން ފައިދާއާއި، ފަސޭހަ އަދި ދިވެހިންގެ ދިރިއުޅުމަށް ކުރިއެރުން ލިބޭނެތީކަމަށްވެސް ވަޒީރު ވިދާޅުވިއެވެ.

"ރައީސް މުޢިއްޒުގެ ވެރިކަމުގައި ފޮރިން ޕޮލިސީ ގެންގުޅޭނެކަމަށް ވަރަށް ޞަރީޙަ ބަހުން ވިދާޅުވީ، ދިވެހިންނަށް ހެޔޮގޮތްލިބޭ، ދިވެހިންނާ ދޭތެރޭ ހެޔޮކޮށް ކަންތައްކުރާ، ޕްރޯ މޯލްޑިވްސްއޭ ތިމަން މަނިކުފާނުގެ ޕޮލިސީއަކީ. އެހެންވީމަ ދިވެހިންނާދޭތެރޭ ހެޔޮކޮށް ހިތާ އެންމެންނާ ދޭތެރޭ ގުޅުން ބަދަހިކުރާނަމޭ. އެހެންވެ އެކަމާ އެއްވެސް ބަޔަކު ހިތްހަމަނުޖެހުން ނޫނީ ދެކޮޅު ހަދަން ޖެހޭނެކަމަށް އަޅުގަނޑު ޤަބޫލެއް ނުކުރަން." ޚާރިޖީ ވަޒީރު މޫސާ ޒަމީރު ވިދާޅުވިއެވެ.

ވަޒީރު ވިދާޅުވީ، މި ފަސް އަހަރަކީ ރައީސް މުޢިއްޒުގެ ސިޔާސަތާއެއްގޮތަށް ގުޅުންބަދަހިކުރަން ބޭނުންވާ ހުރިހާ ޤައުމުތަކާ ގުޅުންބަދަހިކޮށް، ދުނިޔޭގެ މަސްރަޙުގައި ދިވެހިންގެ ޝަޢުގުވެރިކަން ހުންނަ ކަންކަމަށް ބަސްބުނެ އެހީތެރިކަން ދޭ ޤައުމުތައް ބަލައިގަންނަމުންދާނެ ފަސް އަހަރުކަމަށެވެ. މިނިވަން ދައުލަތެއްގެ ގޮތުގައި ރާއްޖޭގެ މިނިވަންކަމާއި އިސްތިޤްލާލު ދަމަހައްޓާ ދިވެހިންގެ މައްޗަށް އަތްގަދަ ނުކުރެވޭނެގޮތަށް ރާއްޖޭގެ ހުރިހާ ޚާރިޖީ ސިޔާސަތެއް ބައްޓަންކުރައްވާނެކަމަށްވެސް ވަޒީރު ވިދާޅުވިއެވެ.

ރައީސުލްޖުމްހޫރިއްޔާ ޗައިނާއަށް ކުރައްވާ ދަތުރުފުޅުގެ ތެރެއިން ރައީސް ޝީ ޖިންގޕިންއާއެކު ބޭއްވެވި މަޝްވަރާތަކުގައި ވަނީ ރާއްޖޭގެ ސިޔާދަތާއި މިނިވަންކަމާއި އިސްތިޤްލާލު ދެމެހެއްޓުމަށް ކުރާ މަސައްކަތަށް ފުރިހަމައަށް ތާއީދުކުރައްވާކަމަށާއި، އެއްވެސް ބަޔަކު ރާއްޖޭގެ ދާޚިލީ ކަންކަމަށް ނުފޫޒު ފޯރުވުމާއި ދެކޮޅުކަން ހާމަކުރައްވާފައެވެ.

ޗައިނާގެ ރައީސް ވަނީ، ތަރައްޤީގެ މަގުގައި ރާއްޖެއާ އެންމެ އެކަށޭނެ މަގަކުން ކުރިއަށްދިއުމުގެ މިނިވަންކަން ރާއްޖެއަށް އޮންނާނެކަމަށާއި، ރާއްޖޭގެ ދާޚިލީ ކަންކަމަށް ބޭރުގެ އެއްވެސް ބަޔަކު ނުފޫޒު ފޯރުވުމަކީ ޗައިނާއިން ދެކޮޅު ހަދާކަމެއްކަމަށް ވިދާޅުވެފައެވެ.

ރާއްޖޭގެ ޚާރިޖީ ސިޔާސަތު ގެންގުޅުއްވާނީ ދިވެހި ގައުމުގެ މިނިވަންކަމާއި ސިޔާސަތު ދަމަހައްޓައި ދިވެހިންގެ މަސްލަޙަތު ޙިމާޔަތްކުރާނެ ސިޔާސަތެއްގެ ގޮތުގައިކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވިދާޅުވެފައެވެ.