ޗައިނާ މާރކެޓުު 1 ނަންބަރަށް ހަދަން ސަރުކާރުުގެ ވަރުގަދަ މަސައްކަތްތަކެއް!

ރާއްޖޭގެ ފަތުރުވެރިކަމުގެ ސިނާޢަތުގެ އެއް ނަންބަރު މާކެޓަށް ޗައިނާ ހެދުމުގެ ޚާއްޞަ މަސައްކަތްތަކެއް ފަތުރުވެރިކަމާ ބެހޭ ވުޒާރާއާއި އެމްއެމްޕީޢާރުސީ ގުޅިގެން ކުރުމަށް ތައްޔާރުވެއްޖެއެވެ. ޗައިނާގައި ބޭއްވި "އިންވެސްޓް މޯލްޑިވްސް ފޯރަމް"ގައި ރައީސުލްޖުމްހޫރިއްޔާ ވަނީ ރާއްޖޭގެ ފަތުރުވެރިކަމުގެ އެއް ނަމްބަރު މާރކެޓަށް ޗައިނާ މާކެޓު ހަދައިދެއްވުމަށް އެދިވަޑައިގެންފައެވެ.

އެކަމަށް އިޝާރާތްކުރައްވާ ޕީއެސްއެމް ނިއުސްއަށް ދެއްވި އިންޓަރވިއުއެއްގައި ފަތުރުވެރިކަމާއި ބެހޭ ވަޒީރު އިބްރާހީމް ފައިޞަލް ވިދާޅުވީ، އެވޫޒާރާއާއި، އެމްއެމްޕީޢާރުސީ ގުޅިގެން ވަރަށް އަވަހަށް ޗައިނާގެ އެކި ޕްރޮވިންސްތަކުގައި "ޑެސްޓިނޭޝަން " މާކެޓީންގެ ގިނަ މަސައްކަތްތަކެއް ފެށޭނެކަމަށެވެ. އެ މާކެޓިންގެ މަސައްކަތް ކުރިއަށްދާއިރު، ރާއްޖޭގެ ޓުއަރއޮޕަރޭޓަރުންނާއި މި އިންޑަސްޓްރީގައި މަސައްކަތްކުރާ ފަރާތްތަކަށް ފުރުޞަތު ދެއްވާނެކަމަށް ވަޒީރު ވިދާޅުވިއެވެ.

"އިންޑަސްޓްރީގެ އެންމެން ބައިވެރިކޮށްގެން އަޅުގަނޑުމެން ވަރަށް ވަރުގަދަ މަސައްކަތްތަކެއް ޗައިނާއަށް ފޯކަސް ކޮށްގެން އަޅުގަނޑުމެން ކުރިއަށް ގެންދާނަން. ދެން ޑައިރެކްޓު ފްލައިޓުތަކާއި އިތުރު އެއަރލައިން ފެށޭނެ ގޮތާއި ގުޅޭގޮތުންވެސް އަޅުގަނޑުމެން މިދަނީ މިހާރު މަޝްވަރާކުރަމުން. އިރާދަކުރެއްވިއްޔާ އަޅުގަނޑަށް ޤަބޫލުކުރެވެނީ މިކުރާ މަސައްކަތުގެ ނަތީޖާ ވަރަށް ރަނގަޅުވާނެކަމަށް. އަދި ޗައިނާއަކީ ރާއްޖެއަށް އެންމެ ގިނައިން ފަތުރުވެރިން އަންނަ ޑެސްޓިނޭޝަނަށް ވެގެންދާނެކަމަށް." ފަތުރުވެރިކަމާއި ބެހޭ ވަޒީރު ފައިސަލް އިބްރާހީމް ވިދާޅުވިއެވެ.

ސަރުކާރުން މިއަހަރަށް އަމާޒުހިފާފައިވަނީ ދެ މިލިއަން ފަތުރުވެރިން ގެނައުމަށެވެ. އެކަމަށް އިޝާރާތްކުރައްވާ ވަޒީރު ވިދާޅުވީ، ޗައިނާއަށް ޓާކެޓުކޮށް ކުރެވޭ މަސައްކަތުން ދެ މިލިއަން ފަތުރުވެރިންގެ އަމާޒު ހާސިލްވާނެކަމުގެ އުންމީދު ބޮޑުކަމަށެވެ.

"ރައީސް ޑރ. މުޢިއްޒުގެ ސަރުކާރާ ޗައިނާއާއި އޮތް ގާތް ގުޅުމާ ދެ ސަރުކާރުން ރާވާފައިވާ ކަންކަމަށް ބަލާއިރު އަޅުގަނޑަށް ޤަބޫލުކުރެވެނީ ދެ މިލިއަނަށްވުރެ މައްޗަށް މިއަހަރު ރާއްޖެ އަންނަ ފަތުރުވެރިންގެ ޢަދަދު އިތުރުކުރެވިގެންދާނެކަމަށް." ވަޒީރު ވިދާޅުވިއެވެ.

ރާއްޖޭގެ ފަތުރުވެރިކަމަށް މިވަގުތު ހުރި ގޮންޖެހުންތައް ސަރުކާރުން ނަގަނީ ރަނގަޅު "ޕޮޒިޓިވް" ކަމެއްގެ ގޮތުގައެވެ. ވަޒީރު ވިދާޅުވީ ގޮންޖެހުންތަކުން އަރައިގަތުމަށްވެސް ވަރުގަދަ މަސައްކަތްތަކެއްކޮށް ކާމިޔާބު ކުރެވޭނެކަމަށެވެ.

"އަޅުގަނޑު މިކަން ނަގަން ބޭޏުންވަނީ ވަރަށް ޕޮޒިޓިވްކޮށް. މުޅި އިންޑަސްޓްރީ ގުޅިގެން ޓޫރިޒަމް މިނިސްޓްރީ އަދި އެމްއެމްޕީޢާރުސީއާ އެކީގައި ވަރަށް ޚާއްޞާ ވަރުގަދަ މަސައްކަތްތަކެއް ކުރާނަން. އިންޑަސްޓްރީގެ ހުރިހާ ބޭފުޅުންނަށް އަޅުގަނޑު ދަންނަވާލަން ބޭނުންވަނީ އަޅުގަނޑުމެންނާ އެކީ، ސަރުކާރާ އެކީ ތިއްބަވާށޭ. އަޅުގަނޑުމެންގެ ފަރާޓުން ކުރަންޖެހޭ ހުރިހާ ކަމެއް ކުރާނަމޭ. އިރާދަކުރެއްވިއްޔާ މި އަހަރު ވެގެންދާނީ ރާއްޖޭގަ އިތުރު ހަރުފަތަކަށް ގެންދެވޭނެ އަހަރަކަށޭ. އެހެންކަމުން އެކުވެރިކަމާ އެއްބާރުލުމާއެކީ އިންޑަސްޓްރީގެ އެންމެހާ ބޭފުޅުން ތިއްބެވުމަށް އަޅުގަނޑޫ އެދެން." ފައިސަލް ވިދާޅުވިއެވެ.

ޗައިނާއަކީ ރާއްޖެއަށް އެންމެ ގިނައިން ފަތުރުވެރިން އަންނަ ޤައުމަށް ހެދުމަށް މަސައްކަތް ކުރުމަށް ރައީސް އެދިވަޑައިގެންފައިވާއިރު އެ ޤައުމުން ރާއްޖެއަށް އަންނަ ފަތުރުވެރިންގެ އަދަދު ދަށްވީ ކޯވިޑާ ގުޅިގެން 2020 ވަނަ އަހަރު އެ ޤައުމުގެ ބޯޑަރު ބަންދު ކުރުމާ ގުޅިގެންނެވެ. ގާތްގަނޑަކަށް ތިން އަހަރު ފަހުން އަލުން އެ ޤައުމުން ރާއްޖެއަށް ފަތުރުވެރިން އަންނަ ފެށީ މިދިޔަ އަހަރުއެވެ.

މިދިޔަ އަހަރު ޗައިނާއިން 187،118 ފަތުރުވެރިން ޒިޔާރަތް ކުރިއެވެ. މިއީ ރާއްޖެއަށް އައި ޖުމްލަ ފަތުރުވެރިންގެ 10 އިންސައްތައެވެ.