ހުޅުމާލޭގެ މަގުތަކަކީ ހިނގާބިނގައިވާ މީހުންނަށާއި، ދުއްވާ މީހުންނަށް ރައްކާތެރި މަގުތަކަކަށް ހަދައި، ހުޅުމާލޭގައި ހިނގާ އެކްސިޑެންޓްތައް މަދު ކުރުމުގެގޮތުން ހޭލުންތެރިކުރުމުގެ ޚާއްޞަ ޕްރޮގްރާމެއް ހުޅުމާލޭ ޕޮލިސް ސްޓޭޝަނުން ފަށައިފިއެވެ.
ހުޅުމާލޭގައި ދިރިއުޅޭ ރައްޔިތުންނަށް އަމާޒުކޮށްގެން ކުރިއަށްގެންދާ ހޭލުންތެރިކުރުމުގެ މި ޕްރޮގްރާމް ކުރިއަށް ގެންދިއުމަށް ހަމަޖެހިފައިވަނީ އެކި ދުވަސްތަކަށް ބަހާލައިގެން ކަމަށާއި، މި ޕްރޮގްރާމްގެ ދަށުން ހުޅުމާލޭގައި ޤާއިމުކުރެވިފައިވާ އެކި މުއައްސަސާތަކަށް މައުލޫމާތު ހިއްސާކުރުމަށް ހަމަޖެހިފައިވާކަމަށް ފުލުހުން ހާމަކުރައްވައެވެ.
އެގޮތުން މި ޕްރޮގްރާމުގައި އެންމެ ފުރަތަމަ މަޢުލޫމާތު ދީފައިވަނީ ހައުސިންޑ ޑިވެލޮޕްމެންޓް ކޯޕަރޭޝަން، އެޗް.ޑީ.ސީގެ މުވައްޒަފުންނަށެވެ. ހުޅުމާލެ ޕޮލިސް ސްޓޭޝަނާއި، ޓްރެފިކް މެނޭޖްމަންޓް ޑިޕާޓްމަންޓް ގުޅިގެން ކުރިޔަށް ގެންދާ މި ޕްރޮގްރާމުގައި، މަގުމަތީގެ ސަލާމަތާއި ރައްކާތެރިކަމަށް އިސްކަންދޭން ޖެހޭ މުހިއްމު ކަންކަމާއި، ހުޅުމާލޭގައި ޓްރެފިކް މެނޭޖްކުރުމަށް ފުލުހުން ހަމަޖައްސާފައިވާ އިންތިޒާމުތަކުގެ މަޢުލޫމާތު ދެވިގެންދާނެއެވެ. އަދި ރައްކާތެރިކަމާއެކު އުޅަނދު ދުއްވުމާއި ހިނގާ ބިނގާވެ އުޅުމުގައި ރައްކާތެރިކަން އިސްކޮށްގެން ހުރިހާ ފަރާތްތަކެއްގެ ޢަމަލުތައް ބެހެއްޓުމަށް ކުރެވިދާނެ ކަންކަމުގެ މަޢުލޫމާތުވެސް ދެވިގެންދާނެކަމަށް ފުލުހުން ވިދާޅުވެއެވެ.
މީގެ އިތުރުން މި ޕްރޮގްރާމުގައި އެއްގަމު ދަތުރުފަތުރުގެ ޤާނޫނަށް ގެނެވިފައިވާ އިޞްލާޙްތަކުގެ މަޢުލޫމާތާއި، ޤާނޫނުން ރައްޔިތުންނަށް ލިބިދޭ ރައްކާތެރިކަމުގެ މުހިއްމު މަޢުލޫމާތުތަކާއި، އެއްގަމު ދަތުރުފަތުރުގެ ޤާނޫނާއި ޚިލާފުވުމުން އަޅާނެ ފިޔަވަޅުތަކުގެ މަޢުލޫމާތުވެސް މި ޕްރޮގްރާމުގައި ދިނުމަށް ވަނީ ހަމަޖެހިފައެވެ. މި ޕްރޮގްރާމުގެ ދަށުން ކުރިޔަށް އޮތް ދުވަސްތަކުގައި ހުޅުމާލޭގައި ހުރި އެހެނިހެން މުއައްސަސާތަކަށާއި، މަދަނީ ޖަމްޢިއްޔާތަކުގެ އިތުރުން ސްކޫލުތަކުގެ ދަރިވަރުންނަށާއި ބެލެނިވެރިންނާއި މުދައްރިސުންނަށް އަދި މުވައްޒަފުންނަށްވެސް މަޢުލޫމާތު ދިނުމަށްވެސް ވަނީ ހަމަޖެހިފައިއެވެ.