އަރަމުން އަންނަ ފަންނުވެރިންނަށް ބޭރުގެ ފެސްޓިވަލްތަކުގައި ބައިވެރިވުމުގެ ފުރުޞަތު

ރައީސުލްޖުމްޙޫރިއްޔާ ޑރ. މުޙައްމަދު މުޢިއްޒުގެ ހަފްތާ 14 ގެ މަސައްކަތުގެ ތެރެއިން ފަންނުވެރިކަމުގެ ދާއިރާއިން އަރަމުން އަންނަ ޒުވާނުންނަށް ފުރުޞަތު ހޯދައިދިނުމަށް ވަނީ ހިމަނުއްވާފައެވެ. އަދި މި ދާއިރާއިން ގިނަ މަސައްކަތްތަކެއް ކުރެވެމުންދާކަމަށް ސަރުކާރުން ވަނީ ހާމަކުރައްވާފައެވެ.

އަރަމުން އަންނަ ފަންނުވެރިންނަށް ފަހި ފުރުޞަތުތަކެއް ހޯދައިދިނުމުގެ ގޮތުން ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވުޒާރާއިން މިހާރު ވަނީ ބައިނަލްއަޤްވާމީ 2 ފެސްޓިވަލެއްގައި ބައިވެރިވުމުގެ ފުރުޞަތު ޒުވާން ފަންނުވެރިންނަށް ހުޅުވާލާފައެވެ.

ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވުޒާރާއިން ފުރުޞަތު ހުޅުވާލާފައިވަނީ އިންޓަރނޭޝަނަލް ބްލެކް ސީ ތިއޭޓަރ ފެސްޓިވަލާއި، އިންޓަރނޭޝަނަލް ތިއޭޓަރ ފެސްޓިވަލްގައި ބައިވެރިވުމަށެވެ.

އިންޓަރނޭޝަނަލް ބްލެކް ސީ ތިއޭޓަރ ފެސްޓިވަލު އޮންނާނީ ތުރުކީގެ ތްރާބްޒޮން ސްޓޭޓް ތިއޭޓަރގައި އަންނަ މެއި މަހުގެ 2 އަކުން 15 އަށެވެ. އިންޓަރނޭޝަނަލް ތިއޭޓަރ ފެސްޓިވަލު އޮންނާނީ އަންތާލިޔާ ސްޓޭޓް ތިއޭޓަރގައި މެއި މަހުގެ 17 އިން 27 އަށްކަމަށް އެ ވުޒާރާއިން ވިދާޅުވެއެވެ.

މި 2 ފެސްޓިވަލްގައި ބައިވެރިވުމުގެ ފުރުޞަތު ރާއްޖެއަށް ލިބިފައިވާތީ ދިވެހި ފަންނުވެރިންގެ ތެރެއިން މި ފެސްޓިވަލުތަކުގައި ބައިވެރިވާން ބޭނުންވާ ފަރާތްތަކަށް މިހާރު އެ ފުރުޞަތު ހުޅުވާލާފައިވާކަމަށް ވަނީ ވިދާޅުވެފައެވެ. ބައިވެރިވުމަށް ފޯމު ހުށައަޅަންޖެހެނީ އޮންލައިންކޮށެވެ. ފޯމު ހުށައެޅުމުގެ ސުންގަޑިއަކީ 20 ޖަނަވަރީ 2024 އެވެ.