ޤައުމީ ޔުނިވާސިޓީގައި މަސްވެރިކަމާއި ދަނޑުވެރިކަމުގެ ކޯސްތައް ފަށަން ތައްޔާރުވެއްޖެ

ދަނޑުވެރިކަމާއި މަސްވެރިކަމުގެ ދާއިރާގެ ކޯސްތައް ވަރަށް އަވަހަށް ފަށްޓަވާނެކަމަށް ދިވެހިރާއްޖޭގެ ޤައުމީ ޔުނިވަރސިޓީން ވިދާޅުވެއްޖެއެވެ. ރާއްޖޭގައި މަސްވެރިކަމާއި ދަނޑުވެރިކަމުގެ ދާއިރާގެމަތީ ތަޢުލީމުގެ މާގިނަ ފުރުޞަތުތަކެއް މިހާތަނަށް ފަހިވެފައި ނެތެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން ދިވެހިރާއްޖޭގެ ޤައުމީ ޔުނިވާސިޓީގެ ވައިސް ޗާންސެލަރ ޑރ. ޝެހެނާޒް އާދަމް ވިދާޅުވީ، މަސްވެރިކަމާއި ދަނޑުވެރިކަމުގެ ދާއިރާގެ ކޯސްތައް ފެށުމަށް ތައްޔާރުވަމުން އަންނަކަމަށެވެ. މިހާރު މި ކޯސްތައް ފަރުމާކުރެވެމުންދާކަމަށާއި އަންނަ އަހަރުގެ 2 ވަނަ ސެމެސްޓާގައި އެންމެ ލަސްވެގެންވެސް މި ކޯސްތައް ފަށްޓަވާނެކަމަށް ޑރ. ޗެހެނާޒް ވިދާޅުވިއެވެ.

"އޯޝަން ސައިންސްގެ ދާއިރާގެ ކޯސްތައް ވަރަށް އަވަހަށް ފަށާނަން. ދަނޑުވެރިކަމުގެ ސިނާއަތުގެ ވަރަށް ގިނަ ކޯސްތައް ސެޓްފިކެޓް ލެވެލްއިން ފެށިގެން ޑިޕްލޮމާއާއި ހަމައަށް މިހާރު ހުރީ ފަރުމާކުރެވިފައި. ދެން މިހާރު ޑިގްރީ ޕްރޮގްރާމްގެ މަސައްކަތް ކުރެވެމުން ދަނީ. އިރާދަކުރެއްވިއްޔާ މިއަންނަ އަހަރުގެ ތެރޭގައި މި ކޯސްތައްވެސް ފެށިގެންދާނެ." ޑރ. ޝެހެނާޒް އާދަމް ވިދާޅުވިއެވެ.

އެމްއެންޔޫގެ ޗާންސެލަރ ޑރ.މަޙްމޫދު ޝައުޤީ ވިދާޅުވީ، މަސްވެރިކަމަކީ ރާއްޖޭގެ އެންމެ ޒަމާންވީ ސިނާއަތްކަމަށެވެ. ނަމަވެސް ޤައުމީ ޔުނިވަރސިޓީގައި މަސްވެރިކަމާއިބެހޭ ފެކަލްޓީއެއް ނެތުމަކީ އުނިކަމެއްގެ ގޮތުގައި ޑރ. މަޙްމޫދު ޝަޢުޤީ ސިފަކުރެއްވިއެވެ. އެހެންކަމުން މިފަދަ ފެކަލްޓީއެއް ނުވަތަ ސްކޫލެއް އުފެއްދުމަށް އެމްއެންޔޫގެ ކައުންސިލަށް ހުށައެޅުމަށް ނިންމާފައިވާކަމަށް ޗާންސެލަރ ވިދާޅުވިއެވެ.

"މަސްވެރިކަމަކީ ރާއްޖޭގެ އެންމެ ޒަމާންވީ ސިނާއަތް. އަޅުގަނޑުމެންގެ ޝަހްސިއްޔަތާއި ގުޅުންހުރި ސިނާއަތް. އަޅުގަނޑުމެންގެ 99 އިންސައްތައަކީ ކަނޑު. އެހެންކަމަށްވެފައި އަޅުގަނޑުމެންގެ ޤައުމީ ޔުނިވަރސިޓީގައި މަސްވެރިކަމާއިބެހޭ ފެކަލްޓީއެއް ނެތުމަކީ އަޅުގަނޑުގެ ނަޒަރުގައި އުނިކަމެއް ކަމުގައި ދެކެންޖެހެނީ އިނގޭތޯ. އިރާދަކުރެއްވިއްޔާ އަޅުގަނޑުމެންގެ ކައުންސިލްއަށް އެބަ ހުށައަޅަން ކަރުދާހެއް. އެއީ ސީދާ މަސްވެރިކަމާއި ކަނޑުގެ އިލްމާއި ބެހޭ އެކަޑަމިކް ޑިވިޝަންއެއް. އެއީ ސްކޫލެއްތޯ، ފެކަލްޓީއެއްތޯ އެއެއް އަދި ނުނިންމޭ. އެފަދަ ޑިވިޝަނެއް، ފެކަލްޓީއެއް ނުވަތަ ސްކޫލެއް އުފެއްދުމުގެ މަސައްކަތް ފެށުމަށް އެކަމަށް ކުރަންޖެހޭ ދިރާސާކުރަން ފެށުން." ޑރ.މަޙްމޫދު ޝައުޤީ ވިދާޅުވިއެވެ.

ޑރ.މަޙްމޫދު ޝައުޤީ ވިދާޅުވީ، މެރިން ރިސާޗްގެ ދާއިރާގައި ރާއްޖޭގައި ވަރަށް ރަނގަޅު ދިރާސާތައް ކުރެވެމުންދާކަމަށެވެ. އެހެންނަމަވެސް ޤައުމީ ޔުނިވަރސިޓީއަކީ ޔުނިވަރސިޓީއަކަށްވުމާއިއެކު އެ ރޮނގުން ޑިގްރީ، މާސްޓަރ އަދި ޕީއެޗްޑީއާއި ހިސާބަށްވެސް ކިޔަވައިދެވެންޖެހޭކަމަށް ދެކެވަޑައިގަންނަވާކަމަށްވެސް ޑރ. މަޙްމޫދު ޝަޢުޤީ ވިދާޅުވިއެވެ.

ދަނޑުވެރިކަމަކީ ފުޑް ސެކިއުރިޓީއާއި ވަރަށް ބޮޑަށް ގުޅިފައި އޮތް ދާއިރާއަކަށް ވުމުގެ ސަބަބުން މި ދާއިރާއަކީވެސް ތަމްރީނާއި ދިރާސާ ކުރަންޖެހޭ ދާއިރާއެއްގެ ގޮތުގައި ޑރ.މަޙްމޫދު ޝައުޤީ ފާހަގަކުރެއްވިއެވެ. އެހެންކަމުން ރާއްޖޭގެ މާހައުލާއި ގުޅޭގޮތުން ރާއްޖޭގައި ދަނޑުވެރިކަން ކުރުމަށް ދިރާސާ ކުރަންޖެހޭކަމަށްވެސް ޤައުމީ ޔުނިވާސިޓީގެ ޗާންސެލަތ ޑރ. މަޙްމޫދު ޝައުޤީ ވިދާޅުވިއެވެ.