ދައުލަތުގެ ބެލުމުގެ ދަށުގައި ތިބޭ ކުދިންގެ ބެލެނިވެރިކަން ހަވާލުކުރުން ކޯޓު މެދުވެރިކޮށް

ދައުލަތުގެ ބެލުމުގެ ދަށުގައި ތިބޭ ކުދިންގެ ބެލެނެވެރިކަން ކޯޓު މެދުވެރިކޮށް ހަވާލުކުރާ ގޮތަށް ހަމަޖައްސައިފިއެވެ.

އިޖްތިމާޢީ އަދި އާއިލީ ތަރައްޤީއާ ބެހޭ ވުޒާރާގެ ދަށުން ހިންގާ ޗައިލްޑް އެންޑް ފެމިލީ ޕްރޮޓެކްޝަން ސަރވިސްއިން ދައުލަތުގެ ބެލުމުގެ ދަށަށް ގެނެވޭ ކުދިން ރީ-އިންޓަގްރޭޓް ކުރުމާއި ބެހޭ ގަވާއިދަށް އިސްލާހް ގެނެސް އެއަށް އަމަލުކުރަން މިހާރުވަނީ ފަށާފައެވެ. މިޤަވާއިދަށް އަމަލުކުރން ފެށުމުން ދައުލަތުގެ ބެލުމުގެ ދަށުގައި ތިބޭ ކުދިންގެ ބެލެނެވެރިކަން ހަވާލުކުރެވޭނީ ކޯޓު މެދުވެރިކޮށެވެ.

މިގެނެވުނު އިސްލާހާއެކު ކުޑަކުދިންގެ ހައްގުތައް ރައްކާތެރިކުރުމުގެ ގާނޫނަށް އަމަލުކުރަން ފެށުމުގެ ކުރިން ދައުލަތުގެ ބެލުމުގެ ދަށުން ފޮސްޓަރ ކުރުމަށް ހަވާލުކުރަމަށް ނިންމައި ފޮސްޓަރ ބެލެނިވެރިޔާއާ ހަވާލުކޮށްފައިވާ ކުދިންގެ ގާނޫނީ ބެލެނިވެރިކަން ފޮސްޓަރ ބެލެނިވެރިންނާ ހަވާލު ކުރުމަށް ޝަރުއީ ކޯޓަށް ހުށަހަޅަން ޖެހޭނެއެވެ.

ކޯޓު މެދުވެރިކޮށް ކުދިން ހަވާލުކުރަން ގަވާއިދަށް އިސްލާހް ގެނެވިފައިވާއިރު، ދައުލަތުން ބަލަހައްޓާ ކުދިންނަކީ ރައްކާތެރިކަން ކަށަވަރުވެފައިވާ ކުދިންނަށް ހެދުމަކީ މިހާރުގެ ސަރުކާރުގެ މުހިންމު އަމާޒެކެވެ.

ދައުލަތުގެ ބެލުމުގެ ދަށުގައި ތިބި ކުދިންގެ ތެރެއިން، 2020 ވަނަ އަހަރު އެއް ކުއްޖެއްގެ ގާނޫނީ ބެލެނިވެރިކަން ވަނީ ބަދަލުކޮށްފައެވެ. އަދި 2021 ވަނަ އަހަރު ތިން ކުއްޖެއްގެ ގާނޫނީ ބެލެނިވެރިކަން ބަދަލުކޮށްފައިވެއެވެ.

އިޖުތިމާއީ އަދި ތަރައްޤީއާއި ބެހޭ ވުޒާރާގެ ތަފާސްހިސާބުތަކުން ދައްކާގޮތުގައި އޮކްޓޫބަރ މަހު ދައުލަތަށް އަލަށް 4 ކުއްޖަކު ނަގާފައިވާއިރު، 3 ކުއްޖަކު އާއިލާއަށް ރީއިންޓަރގްރޭޓް ކުރެވި، 1 ކުއްޖަކު ފޮސްޓަރކުރެވިފައިވެއެވެ. މިއާއެކު އޮކްޓޫބަރ މަހުގެ ނިޔަލަށް ދައުލަތުގެ ބެލުމުގެ ދަށުގައި 164 ކުދިން ތިބި ކަމަށް ތަފާސްހިސާބުތަކުން ދައްކައެވެ.