އާރުޓީއެލް އެޕްލިކޭޝަނަށް ޑިޖިޓަލް ވޮލެޓެއް ތައާރަފްކޮށްފި

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމް.ޓީ.ސީ.ސީން ފޯރުކޮށްދެމުން އަންނަ އާރްޓީއެލް ފެރީ އާއި ބަހުގެ ޚިދުމަތް ފަސޭހަކަމާއެކު ހޯދުމަށް ޚާއްސަކޮށްފައިވާ އާރުޓީއެލް އެޕްލިކޭޝަނަށް ޑިޖިޓަލް ވޮލެޓެއް ތައާރަފުކޮށްފިއެވެ.

އެމްޓީސީސީން ބުނީ އެޕްލިކޭޝަނަށް އިތުރުކުރި މިވޮލެޓަށް ކުރީބައިގައި ފައިސާ ޖަމާކޮށްފައި ބެހެއްޓޭނެކަމަށެވެ. މިވޮލެޓަށް ފައިސާ ޖަމާކުރެވޭނީ އާރުޓީއެލް އެޕްލިކޭޝަނުގައި އީމެއިލް އާއި ފޯނު ނަންބަރު ވެރިފައިކޮށްފައިވާ ފަރާތްތަކަށް ކަމަށެވެ.

ވެރިފިކޭޝަން ޕްރޮސެސް ފުރިހަމަ ކުރުމުން އެޕްލިކޭޝަންގެ ޕްރޮފައިލްގައި އީމެއިލް އާއި ފޯން ނަންބަރާ ދިމާލުގައި ފެހި ކުލައިގެ ހެޔޮ ފާހަގައެއް ފެންނަން ހުންނާނެ ކަމަށް އެމްޓީސީސީން ބުނެއެވެ. އެމްޓީސީސީން ބުނީ އާރުޓީއެލް އެޕްލިކޭޝަނަށް އިތުރުކުރި މި ފީޗާގެ ސަބަބުން ޚިދުމަތް ހޯދާ ފަރާތްތަކަށް މިހާރަށް ވުރެ ލުއިފަސޭހަތައް ލިބިގެންދާނެ ކަމަށެވެ.

Introducing the latest feature for our RTL Application, The RTL Wallet! Now you can top-up effortlessly and enjoy swift rides on any RTL bus with our convenient scan and ride feature. Just ensure your account is fully verified for seamless access! pic.twitter.com/pQ7OUXCQNH

— MTCC Plc (@MTCCPlc) November 29, 2023

އެމްޓީސީސީން ވަނީ މިދިޔަ އޮކްޓޯބަރު މަހު ފެރީ އާއި ބަހަށް ކާޑުން ފައިސާ ދެއްކޭނެ އިންތިޒާމް ހަމަޖައްސާފައެވެ. އަދި ވިސާ ކާޑު އަދި މާސްޓާ ކާޑުގެ އިތުރުން އާރްޓީއެލް ޓްރެވަލް އެޕް މެދުވެރިކޮށް ވެސް ފެރީ ޓިކެޓް ނެގޭ ގޮތަށް ވަނީ ހަމަޖައްސާފައެވެ.

ރާއްޖެ ޓްރާންސްޕޯޓް ލިންކްގެ ޚިދުމަތަކީ ރާއްޖޭގެ އެއް ރަށުން އަނެއް ރަށަށް އަދި އެއްތަނުން އަނެއްތަނަށް ހެޔޮ އަގެއްގައި ފަސޭހަކަމާއެކު، ދަތުރުކުރެވޭނެ އިންތިޒާމް ހަމަޖެއްސުމުގެ ގޮތުން ފެށި ޚިދުމަތެކެވެ. މިޚިދުމަތަކީ ރައްޔިތުން ބަލައިގެންފައިވާ މުހިންމު ޚިދުމަތަކަށް ވެފައިވާ ކަމަށް އެމް.ޓީ.ސީ.ސީން ފާހަގަކުރެއެވެ.