މަންޓާ އެއަރއިން ޖަނަވަރީގައި އިންޑިއާއަށް ދަތުރު ފަށަނީ

މަންޓާ އެއަރއިން އިންޑިއާއަށް ސީދާ ދަތުރުތައް ފެށުމަށް ތައްޔާރުވެއްޖެއެވެ. މިއީ މަންޓާ އެއަރއިން ބައިނަލްއަޤްވާމީ ދަތުރުތައް ފަށާ ފުރަތަމަ ފަހަރެވެ.

މަންޓާ އެއަރއިން ބުނީ އަންނަ ޖަނަވަރީ މަހުން ފެށިގެން އިންޑިއާއަށް އެއެއަރލައިންގެ ދަތުރުތައް ފެށުމަށް ހަމަޖެހިފައިވާކަމަށެވެ. މި ދަތުރުތައް ބާއްވަނީ ދާލު އެއަރޕޯޓުން ބެންގަލޫރު ކެންޕެގޯޑާ އިންޓަނޭޝަނަލް އެއަރޕޯޓަށެވެ.

މިދަތުރުތަކުގައި ވެލާނާ އިންޓަނޭޝަނަލް އެއަރޕޯޓްގައި ޓްރާންސިޓް ކުރާނެއެވެ. ދާލު އެއަރޕޯޓަކީ މަންޓާގެ މައި ހަބްގެ ގޮތުގައި ބޭނުންކުރާ އެއަރޕޯޓެވެ. ދާލު އެއަރޕޯޓުން އިންޑިއާއަށް ސީދާ ދަތުރުތައް ފެށުމުން އެސަރަހައްދަށާއި އެސަރަހައްދުގެ ރިސޯޓްތަކަށް ގިނަ ފައިދާތަކެއް ލިބިގެންދާނެކަމަށް މަންޓާ އެއަރއިން ވަނީ ބުނެފައެވެ.

މަންޓާއިން މިހާރު ރާވާފައިވަނީ ހަފްތާއަކު 3 ދަތުރު ބޭއްވުމަށެވެ. މިފްލައިޓްތައް ރާއްޖެއިން ބެންގަލޫރަށް ފުރުމަށް ހަމަޖެހިފައިވަނީ ރޭގަނޑުއެވެ. އަދި ބެންގަލޫރުން ރާއްޖެއަށް ދަތުރު ކުރާނީ ހެނދުނު ކަމަށް މަންޓާއިން ވަނީ ބުނެފައެވެ.

މަންޓާ އެއަރލައިން ރަސްމީކޮށް ލޯންޗްކޮށްފައިވަނީ 2018 ވަނަ އަހަރުގެ ނޮވެންބަރ މަހުގެ 22 ވަނަ ދުވަހުއެވެ. އަދި މި އެއަރލައިންގެ ދަތުރުތައް ރަސްމީކޮށް ފަށާފައިވަނީ 2019 ވަނަ އަހަރުގެ ފެބްރުއަރީ މަހުގެ 24 ވަނަ ދުވަހުއެވެ.

މަންޓާ އެއަރލައިނަކީ ކުޑަ ދުވަސްކޮޅެއްގެ ތެރޭގައި ކުރިއެރުންތަކެއް ހޯދާފައިވާ ލޯކަލް އެއަރލައިނެކެވެ. މަންޓާއިން އަންނަނީ ސީޕްލޭންގެ ޚިދުމަތްވެސް ދެމުންނެވެ.

އިންޑިއާއަކީ މިއަހަރުގެ މިހާތަނަށް ރާއްޖެއަށް 2 ވަނައަށް އެންމެ ގިނަ ފަތުރުވެރިން އައިސްފައިވާ ޤައުމެވެ. ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން 28 ނޮވެމްބަރގެ ނިޔަލަށް 181860 ފަތުރުވެރިން ވަނީ ރާއްޖެ އައިސްފައެވެ.