ފުލުހުންނާއި ސިފައިންގެ ތެރެއިން ޝަރުފުވެރިކަމާއެކު ވަޒީފާއިން ވަކިވާ ފަރާތްތަކުގެ ތެރެއިން ޤައުމުގެ ސަލާމަތާއި ރައްކާތެރިކަމާއި، އެ މުއައްސަސާތަކުގެ އިޙްތިރާމް ކުޑަވާގޮތަށް ޢަމަލުކުރައްވާ މީހަކަށް ލިބިދޭ ހުރިހާ އިމްތިޔާޒްތަކާއި، ޢިނާޔަތްތައް ކަނޑާލުމަށް ރައްޔިތުންގެ މަޖިލީހުގެ މެމްބަރުން ގޮވާލައްވައިފިއެވެ. ފުލުހުންނާއި ސިފައިންގެ ތެރެއިން ޝަރަފުވެރިކަމާއެކު ވަޒީފާއިން ވަކިވާ މީހުން، ސިޔާސީ މަޤާމަކަށް އިންތިޚާބުވުމުން، އެމީހަކަށް ލިބިދޭ އިމްތިޔާޒްތަކާއި، ޢިނާޔަތްތައް ނުދޭގޮތަށް ސިފައިންނާއި ފުލުހުންގެ ޤާނޫނަށް ހުށައެޅުއްވި އިޞްލާޙުވަނީ މަޖިލީހަށް ބަލައިގަނެ ދިރާސާ ކުރެއްވުމަށް ކޮމިޓީއަށް ފޮނުއްވަވާފައެވެ.
ފުލުހުންނާއި ސިފައިންގެ ޤާނޫނަށް އިޞްލާހު ހުށައެޅުއްވީ ދިއްދޫ ދާއިރާގެ މެމްބަރު ޢަބްދުއްލަޠީފް މުޙައްމަދެވެ. ސިފައިންގެ ޤާނޫނަށް ހުށައަޅުއްވާފައިވާ އިޞްލާޙުގައި ވަނީ، ޝަރަފުވެރިކަމާއެކު ސިފައިންގެ ވަޒީފާއިން ވަކިވާ މީހުންނަށް އެ ޤާނޫނުގެ ދަށުން ހަދާ ޤަވާއިދާ އެއްގޮތްވާ ގޮތުގެ މަތީން ޚާއްޞަ ޢިނާޔަތްތަކާއި އިމްތިޔާޒު ދިނުމުގެ އިޚްތިޔާރު ޑިފެންސް މިނިސްޓަރަށް ލިބިގެންވާކަމަށެވެ. ނަމަވެސް އެފަދަ މީހަކު، ރައްޔިތުން އިންތިޚާބުކުރާ ސިޔާސީ މަޤާމެއް އަދާކުރަން ފަށާ ހިސާބުން، އެ މުއްދަތުގައި އެ މީހަކަށް އެ ޢިނާޔަތްތަކާއި އިމްތިޔާޒުތައް ނުލިބޭނެކަމަށް ލަތީފް ހުށައެޅުއްވި އިޞްލާޙުގައިވެއެވެ.
ފުލުހުންގެ ޤާނޫނަށް ހުށައަޅުއްވާފައިވާ އިޞްލާޙުގައި ވަނީ، ޝަރަފުވެރިކަމާއެކު ފުލުހުންގެ ވަޒީފާއިން ވަކިވެފައިވާ މީހަކު، ރައްޔިތުން އިންތިޚާބުކުރާ ސިޔާސީ މަޤާމެއް އަދާކުރަން ފަށާ ހިސާބުން ފެށިގެން، އެ މުއްދަތުގައި އެ މީހަކަށް އެ ޢިނާޔަތްތަކާއި އިމްތިޔާޒުތައް ނުލިބޭނެކަމަށެވެ. މި އިޞްލާޙު ހުށައެޅުއްވީ ސިފައިންނާއި ފުލުހުންގެ ތެރެއިން ރިޓަޔަރކުރާ މީހުން، ސިޔާސީ މަޤާމަކަށް އިންތިޚާބު ވިޔަސް، އެ ދެ ޤާނޫނުގައިވާ އިނާޔަތްތަކާއި އިމްތިޔާޒްތައް ލިބެމުން ދިއުމުން އެ މީހަކަށް ދައުލަތުގެ ބަޖެޓުން ޑަބަލްކޮށް ފައިސާ ލިބެމުންދާތީ ކަމަށް ލަޠީފް ވިދާޅުވިއެވެ. މި ދެ ބިލަށް ވާހަކަ ދެއްކެވި މެމްބަރުން ވިދާޅުވީ، ސިފައިނާއި ފުލުހުންގެ ޤަދަރު ކުޑަވަގޮތަށް ވާހަކަދައްކާ ފަރާތްތަކަކީ ޢިނާޔްތަތައް ލިބިދޭ ބަޔަކަށް ވެގެން ނުވާނެކަމަށެވެ.
މި ދެ އިޞްލާޙު މަޖިލީހަށް ހުށައަޅުއްވާފައިވާއިރު ރައްޔިތުންގެ މަޖިލީހުގައި މި ޢިނާޔަތްތައް ލިބިވަޑައިގަންނަވާ ބައެއް މެމްބަރުން ތިއްބަވައެވެ. އެއީ ހިތަދޫ މެދު ދާއިރާގެ މެމްބަރު، ބްރިގޭޑިއަރ ޖެނެރަލް ރިޓަޔަރޑް އިބްރާހީމް ދީދީ އާއި، ކުޅުދުއްފުށީ އުތުރު ދާއިރާގެ މެމްބަރު ފަސްޓް ލެފްޓިނެންޓް ރިޓަޔަޑް ޢަބްދުލް ޣަފޫރު މޫސާ އަދި ކުރީގެ ޕޮލިސް ކޮމިޝަނަރު ކިނބިދޫ ދާއިރާގެ މެމްބަރ ޢަބްދުﷲ ރިޔާޒުއެވެ.