ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ސިފައިންގެ މަރުކަޒަށް ޒިޔާރަތްކުރައްވައިފި

ރައީސުލްޖުމްހޫރިއްޔާ އަދި ސިފައިގެންގެ އެންމެ މަތީ ވެރިޔާ ޑރ. މުޙައްމަދު މުއިއްޒު ދިވެހި ސިފައިގެ މަރުކަޒަށް ވަޑައިގެންފިއެވެ. އެމަނިކުފާނު ސިފައިންގެ މަރުކަޒަށް ވަޑައިގަތީ ހުވާކުރެއްވި ދުވަހުއެވެ.

ރައީސުލްޖުމްހޫރިއްޔަ އަދި ސިފައިންގެ އެންމެ މަތީ ވެރިޔާ ވަނީ ސިފައިންގެ މަރުކަޒަށް ވަޑައިގެން ސިފައިންނާއި މުޚާތަބުކުރައްވާ ވާހަކަފުޅުވެސް ދައްކަވާފައެވެ. އަދި ސިފައިންގެ މަރުކަޒުން ވަނީ އެމަނިކުފާނަށް ހޫނު މަރުޙަބާއެއް ދަންނަވާފައެވެ.

މިމަހުގެ 17 ވަނަ ދުވަހު ހުވާކުރެއްވުމަށްފަހު ރައީސް ވަނީ ސިފައިންގެ ޤާނޫނުގެ 11 ވަނަ މާއްދާގެ (ނ) އިން ލިބިދޭ ބާރުގެ ދަށުން، ޗީފް އޮފް ޑިފެންސް ފޯސްގެ މަޤާމަށް، މޭޖަރ ޖެނެރަލް ޢަބްދުއްރަޙީމް ޢަބްދުއްލަޠީފް ޢައްޔަންކުރައްވާފައެވެ. މޭޖަރ ޖެނެރަލް ޢަބްދުއްރަޙީމް ޢަބްދުއްލަޠީފް ޗީފް އޮފް ޑިފެންސް ފޯސްގެ މަޤާމަށް ޢައްޔަނު ކުރައްވާފައިވަނީ ސްޓޭޓް މިނިސްޓަރ ފެންވަރުގައެވެ.

ހުވާކުރެއްވުމަށްފަހު އެންމެ ފުރަތަމަ ޤައުމާއި މުޚާތަބުކުރައްވައި ވާހަކަފުޅުދައްކަވަމުން ރައީސް ވަނީ ދިވެހި ޤައުމުގެ ސަލާމަތާއި އިސްތިޤުލާލު ދަމަހައްޓަވާނެކަމަށް ވިދާޅުވެފައެވެ. ދިވެހިރާއްޖެއަކީ ބޭރުގެ އެހެން އެއްވެސް ޤައުމެއްގެ ސިފައިން ނެތް ރާއްޖެއަކަށް ހައްދަވާނެކަމަށްވެސް ރައީސް ވަނީ ވިދާޅުވެފައެވެ. ޤައުމީ ހައިސިއްޔަތުން ބަލާއިރު، ދިވެހި ޤައުމަށް ވަފާތެރިވުމަށްވުރެ ބޮޑު އުފަލެއް ނެތްކަމަށްވެސް ރައީސް ވަނީ ވިދާޅުވެފައެވެ.