ރައީސްގެ ދެކަނބަލުން، ބޭރުގެ ޢިއްޒަތްތެރިންގެ ޝަރަފުގައި، ރަސްމީ ބައްދަލުކުރުއްވުމެއް ބާއްވަވައިފި

ހުވައިކުރެއްވުމުގެ ރަސްމިއްޔާތަށް ވަޑައިގެންނެވި، ބޭރުގެ ޢިއްޒަތްތެރިންގެ ޝަރަފްގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން، ސާޖިދާ މުޙައްމަދު ރަސްމީ ބައްދަލުކުރެއްވުމެއް ބާއްވަވައިފިއެވެ. މިބައްދަލުކުރެއްވުން ބާއްވަވާފައި ވަނީ، މިރޭ ކުރުނބާ މޯލްޑިވްސްގައެވެ.

މިބައްދަލުކުރެއްވުމުގައި ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފާއި އެމަނިކުފާނުގެ އަނބިކަނބަލުން ޢާއިޝަތު އަފްރީން މުޙައްމަދާއި، ދިވެހިރާއްޖޭގެ ރައީސުލްޖުމްހޫރިއްޔާކަމުގެ މަޤާމު ކުރިން ފުރުއްވާފައިވާ ބޭފުޅުންނާއި، ރައްޔިތުންގެ މަޖިލީހުގެ ރައީސާއި، ދިވެހިރާއްޖޭގެ އުއްތަމަ ފަނޑިޔާރާއި، ވަޒީރުންގެ މަޖިލީހުގެ މެމްބަރުންނާއި، ރައްޔިތުންގެ މަޖިލީހުގެ ބައެއް މެމްބަރުންނާއި، ބޭރު ޤައުމުތަކުގެ ބައެއް ޢިއްޒަތްތެރިން ބައިވެރިވެވަޑައިގެންނެވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުވާކުރެއްވުމުގެ ރަސްމިއްޔާތައް 49 ޤައުމަކުން ވަނީ ބައިވެރިވެވަޑައިގެންފައެވެ. މީގެތެރޭގައި އެމެރިކާ، ޔޫރަޕް، އެފްރިކާ، އޭޝިއާ، ސައުތު އޭޝިއާ އަދި ސާރކް ސަރަހައްދުގެ ޤައުމުތައް ހިމެނެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ހުވާކުރައްވާފައިވަނީ ޖުމްހޫރީ މައިދާނުގައި ބޭއްވި ކުލަގަދަ ދަރުބާރެއްގައެވެ. މި ދަރުބާރުގައި 4000 އަށްވުރެ ގިނަ ބޭފުޅުން ވަނީ ބައިވެރިވެވަޑައިގެންފައެވެ.