ކުރިޔަށް އޮތް 5 އަހަރުގެ އިލެކްޝަންސް ކޮމިޝަނުގެ ސްޓްރެޓެޖިކް ޕްލޭން އިފްތިޠާޙުކުރައްވައިފިއެވެ.
މިއަދު އިސްލާމީ މަރުކަޒުގައި ބޭއްވެވި ޙަފްލާއެއްގައި މި ޕްލޭން އިފްތިތާޙްކޮށްދެއްވީ، އިލެކްޝަންސް ކޮމިޝަނުގެ ރައީސް އަޙުމަދު ސުލައިމާނާއި ޔޫއެންޑީޕީގެ ރެސިޑެންޓް ރެޕްރެޒެމްޓޭޓިވް ސޯކޯ ނޯޑާއެވެ.
މި އަހަރުން ފެށިގެން ކުރިޔަށް އޮތް ފަސްއަހަރަށް އިލެކްޝަންސް ކޮމިޝަނުގެ މަސައްކަތްތައް ބައްޓަންކޮށް ކުރިޔަށްގެންދާނެ ގޮތުގެ މި ޕްލޭން ތައްޔާރުކުރުމުގެ އެންމެބޮޑު އަމާޒަކީ މިނިވަން އަދި ވަކިފަރާތަކަށްނުޖެހޭ، ހުރިހާ ފަރާތްތަކަށް ޤަބޫލުކުރެވޭފަދަ ގޮތަކަށް ހާމަކަންބޮޑު ގޮތެއްގައި އިންތިޚާބުގެ ކަންކަން ހިންގަވައި މިކަމުގައި ޝާމިލްވާ ހުރިހާ ފަރާތްތަކުގެ އިތުބާރައި ޔަޤީންކަން ލިބިފައިވާ ތަނަކަށް އިލެކްޝަން ކޮމިޝަންސް ހެއްދެވުންކަމަށް އެކޮމިޝަނުން ވިދާޅުވެއެވެ. އެގޮތުން މި ޕްލޭންގެ ދަށުން ކުރެވޭ އެންމެ މައިގަނޑު މަސައްކަތްތަކުގެ ތެރޭގައި ޤާނޫނީ އޮނިގަނޑު އިސްލާޙްކުރުމާއި، ކޮމިޝަނުގެ އިންސްޓިޓިއުޝަނަލް އޮނިގަނޑު ވަރުގަދަކުރެއްވުމަށް މަސައްކަތްކުރެއްވުމާއި، ކޮމިޝަނުގެ އިންފޮމޭޝަން ޓެކްނޮލޮޖީގެ މަސައްކަތްތައް ހަރުދަނާކުރެއްވުން ހިމެނޭކަމަށް އެކޮމިޝަނުން ވިދާޅުވެއެވެ.
މީގެ އިތުރުން ކަމާބެހޭ އެންމެހާ ފަރާތްތަކާ ގުޅުންބަދަހިކުރެއްވުމާއި، އިންތިޚާބުގެ އެކިމަރުޙަލާތަކުގައި ކޮމިޝަނުގެ މަސައްކަތުގެ އޮނިގަނޑުގެ ތެރޭގައި ދެޖިންސްގެ ބައިވެރިވުން ހަމަހަމަކުރެއްވުމަށް މި ޕްލޭންގައި އިސްކަންދެއްވާފައި ވާނެކަމަށް އިލެކްޝަންސް ކޮމިޝަނުން ވިދާޅުވެއެވެ. ސްޓްރެޓެޖިކް ޕްލޭން އިފްތިޠާޙްކުރެއްވުމުގެ ރަސްމިއްޔާތުގައި ވާހަކަފުޅުދައްކަވަމުން އިލެކްޝަންސް ކޮމިޝަނުގެ ނާއިބު ރައީސް ވިދާޅުވީ މި ޕްލޭންގައި ޚާއްޞަގޮތެއްގައި އިންތިޚާބީ ނިޒާމް ހަރުދަނާކުރެއްވުމާއި، އިންފޮމޭޝަން ކޮމިއުނިކޭޝަންގެ އެހީގައި ޚިދުމަތްތަކުގެ ފެންވަރު ރަނގަޅުކުރެއްވުމަށް އިސްކަންދެއްވާފައިވާނެކަމަށެވެ.
މިރަސްމިއްޔާތުގައި ޔޫއެންޑީޕީގެ ރެސިޑެންޓް ރެޕްރެޒެންޓޭޓިވް ސޯކޯ ނޯޑާ ދެއްކެވި ވާހަކައިގާވަނީ މުޖްތަމަޢުގެ އެކިކަންކަން ކުރުމުގައި އަންހެނުންގެ ބައިވެރިވުން އިތުރުކުރުމުގެ މުހިންމުކަމުގެ މައްޗަށް އަލިއަޅުވާލައްވާފައެވެ. މިގޮތުން މިހާރުވެސް ޕޮލިޓިކަލް ޕާޓީތަކުގައާއި އިންތިޚާބުތަކުގައި ކެނޑިޑޭޓުންގެ ގޮތުގައި އަންހެންކަބަލުން ވާދަކުރާ މިންވަރު މަދުކަން ސޯކޯ ނޯޑާ ފާހަގަކުރެއްވިއެވެ.
އިލެކްޝަންސް ކޮމިޝަނުގެ ކުރިޔަށް އޮތް 5 އަހަރުދުވަހުގެ ދުރުރާސްތާ މި ޕްލޭނަކީ އެކޮމިޝަނާއި ޔޫއެންޑީޕީގެ ޕާރޓްނާރޝިޕްގެ ދަށުން ތައްޔާރުކޮށްފައިވާ ޕްލޭނެކެވެ.