ކުރީގެ ރައީސުންނަށާއި އެބޭފުޅުންގެ އަނބިކަނބަލުންނަށް ލިބިވަޑައިގަންނަވާ ޢިނާޔަތްތައް، އެ ބޭފުޅަކު ރައީސްކަން ކުރެއްވި ދުވަސްވަރު ކުރައްވާފައިވާ ކުށެއްގެ ޖަލު ޙުކުމެއް ތަންފީޒުކުރެވޭ ޙާލަތުގައި އުނިކުރެވޭ ގޮތަށް ރައްޔިތުންގެ މަޖިލީހަށް ހުށަހެޅުއްވި އިޞްލާޙަށް މަޖިލީހުގެ ގިނަ މެންބަރުން ތާއީދު ކުރައްވައިފިއެވެ.
މިއަދު ރައްޔިތުންގެ މަޖިލީހުގައި ވަނީ މި ބިލްގެ އިބްތިދާއީ ބަޙުސް ނިންމަވައި، ކޮމެޓީއަށް ފޮނުއްވާފައެވެ. ރައީސުލްޖުމްހޫރިއްޔާކަން ކޮށްފައިވާ މީހަކަށް ދޭންޖެހޭ ރައްކާތެރިކަމާއި ޢިނާޔަތްތަކާބެހޭ ޤާނޫނަށް ދިއްދޫ ދާއިރާގެ މެމްބަރު ޢަބްދުއްލަޠީފް މުޙައްމަދު ހުށައެޅުއްވި އިޞްލާޙުގައި ވަނީ ރައީސުލްޖުމްހޫރިއްޔާގެ މަޤާމުގައި ހުންނެވިއިރު، އެބޭފުޅަކު ކުރެއްވި ކުށަކަށް ޖަލުޙުކުމެއް ތަންފީޒްކުރައްވަން ޖެހިވަޑައިގެންފިނަމަ، އެހިސާބުން ފެށިގެން އެބޭފުޅަކަށާއި، އެ ބޭފުޅެއްގެ އަނބިކަނބަލުންނަށް އެޤާނޫގެ ދަށުން ލިބިދޭ އެއްވެސް ރައްކާތެރިކަމަކާއި ޢިނާޔަތެއް ލިބިވަޑައިނުގަންނަވާނެކަމަށެވެ.
މި އިޞްލާޙަށް ތާއީދުކުރައްވައި، ވާހަކަ ދައްކަވަމުން މެމްބަރުން ވިދާޅުވީ، ރާއްޖޭގެ ޤާނޫނުތަކާއި ޤަވާޢިދުތަކަށް ހުރަސްއަޅައި، ޤައުމަށް ނިކަމެތިކަން ގެނައުމަށް މަސައްކަތްކުރާ ފަރާތްތަކުގެ މަސައްކަތް ހުއްޓުވުމަށް މި އިޞްލާޙު ވަރަށް މުހިންމުކަމަށެވެ.
މި އިޞްލާޙު ހުށައެޅުއްވި މަޤްޞަދުގައި ވަނީ ރައީސުލްޖުމްހޫރިއްޔާކަން ކުރައްވާފައިވާ ބޭފުޅުންނަކީ އަބަދުމެ ޤައުމާއި ރައްޔިތުންގެ ލާބައާއި މަންފާއަށްޓަކައި މަސައްކަތްކުރައްވާ ބޭފުޅުންނަށް ވެވަޑައިގަންނަވަން ޖެހިވަޑައިގަންނަވާތީ، މަޤާމު އަދާކުރެއްވި ދުވަސްވަރާއި، މަޤާމުން އިސްތިޢުފާ ދެއްވުމަށްފަހުވެސް ރާއްޖޭގެ ޤާނޫނުއަސާސީއާއި ޤާނޫނުތަކުގައި ކުށެއްކަމަށް ކަނޑައަޅާފައިވާ ކަންކަމުން ބަރީއަވެގެންވާ އަދި ރައްޔިތުންނަށް ނަމޫނާ ބޭފުޅުންނަޑް ވެވަޑައިގަންނަވަންޖެހޭތީ، އެކަން ކަށަވަރުކުރެއްވުމަށް ކަމަށެވެ. އަދި އެފަދަ ފަރާތްތަކަށް ޙިމާޔަތް ދިނުމުގައި ޙަރަކާތްތެރިވާ ފަރާތްތަކަށް ޖިނާޢީ ކުށެއް ކުރައްވަން ނުޖެހޭނެފަދަ ގޮތަކަށް ހަމަޖެއްސެވުމަށް ހުށައެޅުއްވި އިޞްލާޙެއް ކަމަށްވެސް، މި އިޞްލާޙު މަޖިލީހަށް ހުށައެޅުއްވި މަޤުޞަދެއް ކަމުގައި ވިދާޅުވެފައިވެއެވެ.