ދިވެހިރާއްޖޭގެ ހައިކޯޓުން 11 މީހުންގެ މައްޗަށް މޮނިކޮން އަމުރު ނެރުއްވުމާއި ގުޅިގެން އޭގެތެރެއިން 6 މީހެއްގެ ފައިގައި ޓެގް އަޅުއްވައި 3 މީހަކު ހޯއްދެވުމުގެ މަސައްކަތް ފުލުހުން ފަށްޓަވައިފިއެވެ.
ޓެރަރިޒަމް މަނާކުރުމުގެ ޤާނޫނުގައި ބަޔާންކުރައްވާފައިވާ ފަދައިން މޮނިކޮން އަމުރު ނެރުއްވުމަށް ހޯމް މިނިސްޓަރ ނިންމަވައި ދިވެހިރާއްޖޭގެ ހައިކޯޓުން އަމުރު ނެރުއްވާފައިވާ 11 މީހުންނަކީ ރާއްޖޭގައި ބޮޑެތި ކުށްތަކެއް ތަކުރާރުކޮށް އެމީހުންގެ އަމަލުތަކުގެ ސަބަބުން މުޖުތަމައުގެ ސަލާމަތަށް ނުރައްކާވެފައިވާ ބައެއް ކަމަށް ފުލުހުން ވިދާޅުވެއެވެ.
ހޯމް މިނިސްޓަރުގެ ނިންމެވުމާއެކު ހައިކޯޓުން ނެރުއްވި އަމުރު ތަންފީޒް ކުރެއްވުމުގެ ގޮތުން މޮނިކޮން އަމުރުގެދަށުން 6 މީހެއްގެ ފައިގައި ފުލުހުން ވަނީ ޓެގް އަޅުއްވާފައެވެ.
މިގޮތުން މިހާތަނަށް ޓެގް އަޅުވާފައިވާ 6 މީހުންނަކީ،
ގއ. ދާންދޫ ފަހުދާ ވާދީ، ފައްސާން ވަލީދް،
ގ. ޝާރާޒް މުޙައްމަދު މަފާޒް ޙުސައިން ސަލީމް،
ދަފްތަރު ނަމްބަރު 9634، މިދުހަތު އަބޫބަކުރު،
ހދ. ނޮޅިވަރަމް ހާވިލާ، އައްސަދު އިބްރާހީމް ރަޝީދް،
ގ. ކެރަފާގެ މުޙައްމަދު ޝާބިލް އިސްމާޢީލް،
ދަފްތަރު ނަމްބަރު އާރު އެސް. 1475، އަޙްމަދު ރިޒާމް.
މި މީހުންގެ އިތުރުން މޮނިކޮން އަމުރު ނެރުއްވާފައިވާ އަނެއް 5 މީހުންގެ ތެރެއިން 2 މީހުން މިވަގުތު ތިބީ ފުލުހުން ތަޙުޤީޤު ކުރައްވަމުންދާ އެހެން 2 މައްސަލައެއްގެ ތުހުމަތުގައި ފުލުހުންގެ ބެއްލެވުމުގެ ދަށުގައި ކަމަށް ފުލުހުން ވިދާޅުވެއެވެ. އަދި އަނެއް 3 މީހުންގެ މައްޗަށް ނެރުއްވާފައިވާ އަމުރު ތަންފީޒް ކުރައްވަން އެމީހުން ހޯއްދެވުމުގެ މަސައްކަތް ފުލުހުން ގެންދަނީ ކުރައްވަމުންނެވެ.