މަކުނުދޫގައި ގޭސްފުޅިއެއް ގޮވައި 2 މީހަކު މަރުވެއްޖެ

ހދ. މަކުނުދޫގައި ގޭސް ސިލިންޑަރެއް ގޮވައި 2 މީހަކު މަރުވެއްޖެއެވެ.

މި ޙާދިސާ ހިނގާފައިވަނީ މިއަދު ހަވީރު 4:15 ހާއިރެވެ.

ފުލުހުން ވިދާޅުވީ، މި ޙާދިސާ ގޮވާފައިވަނީ އެރަށު ބަނދަރުގެ ދެކުނު ފަރާތުގައި ހުންނަ މަސް މާރުކޭޓު ކައިރީގައި އޮތް ގޭސް ސިލިންޑަރެއްކަމަށެވެ. މި ޙާދިސާގައި ނިޔާވެފައިވަނީ އެރަށު އެއަރޕޯޓު ބިން ހިއްކުމުގެ މަސައްކަތް ކުރަމުންދާ ބިގްފިޝް މޯލްޑިވްސްގެ ބިދޭސީ ދެ މުވައްޒަފުންނެވެ.

މި ހާދިސާގައި 2 މީހަކު ނިޔާވެފައިވާކަމުގެ މައުލޫމާތު ލިބިފައިވާކަމަށް ފުލުހުން ވިދާޅުވިނަމަވެސް އިތުރު ތަފްޞީލެއް ފުލުހުން ހާމައެއް ނުކުރެއެވެ.

ޕީއެސްއެމް ނިއުސްއަށް މައުލޫމާތުދެމުން މަކުނުދޫގައި ހުރި މީހަކު ބުނީ ގޭސް ސިލިންޑަރު ގޮވި ވަގުތު ވަރަށް ބާރު އަޑުފައްގަނޑެއް މުޅި ރަށައް އިވިފައިވާކަމަށެވެ. އަދި ސިލިންޑަރު ގޮވި ވަގުތު، ކައިރީގައި ހުރި ސައިކަލުތަކަކަށާއި، ފަޅުގައި އަޅާފައި ހުރި ބައެއް ދޯނިތަކަށްވެސް އެކިވަރުގެ ގެއްލުން ލިބިފައިވާކަމަށެވެ.

މި ޙާދިސާގައި ކާކުކަން ދެނެނުގަނެވޭ ވަރަށް ދެ މީހުންގެ ހަށިގަނޑުގެ ބައިތައް ވަކިވެފައިވާކަމުގެ މަޢުލޫމާތު ލިބެއެވެ.