ބެސްޓް ކަލިނަރީ ޓްރެއިނިން އިންސްޓިޓިއުޓްގެ އެވޯޑު މިފަހަރުވެސް ޤައުމީ ޔުނިވާސިޓީއަށް

ކެއްކުމުގެ ދާއިރާއިން ދުނިޔޭގައި ދެވޭ އެންމެ ޝަރަފްވެރި އެއް އެވޯޑުކަމަށްވާ "ބެސްޓް ކަލިނަރީ ޓްރެއިނިން އިންސްޓިޓިއުޓް"ގެ އެވޯޑު ދިވެހިރާއްޖޭގެ ޤައުމީ ޔުނިވާސިޓީގެ ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒް (އެފް.އެޗް.ޓީ.އެސް)އަށް ލިބިެއްޖެއެވެ. މި އެވޯޑު އެފް.އެޗް.ޓީ.އެސްއަށް ލިބުނީ 'ވޯރލްޑް ކަލިނަރީ އެވޯރޑްސް'ގެ "އިންޑިއަން އޯޝަން" ކެޓެގަރީންނެވެ.

މި އެވޯޑަކީ ކެއްކުމުގެ ދާއިރާގައި ހަރަކާތްތެރިވާ ފަރާތްތަކަށް ބައިނަލްއަޤްވާމީ ގޮތުން ދޭ އެންމެ ޝަރަފުވެރި އެއް އެވޯޑެވެ. މިފަހަރުގެ އެވޯޑު އެފް.އެޗް.ޓީ.އެސް އިން ހާސިލްކޮށްފައިވަނީ، ދުނިޔޭގެ މަޝްހޫރު އެހެނިހެން އިންސިޓިއުޓްތަކާއި ވާދަކޮށްގެންނެވެ. އެގޮތުން މި އެވޯޑަށް ޔުނައިޓެޑް ޢަރަބް އެމިރޭޓްސްއާއި، މޮރިޝަސް ހިމެނޭހެން ހަތް އިންސްޓިޓިއުޝަނަކުން ވާދަކުރިއެވެ.

މި އެވޯރޑު ރާއްޖެއަށް ލިބިފައިވަނީ، ކެއްކުމުގެ ދާއިރާއިން މީހުން ބިނާކުރުމުގައި ކުރާ މަސައްކަތާއި، އެދާއިރާއިން ހޯދާފައިވާ ކާމިޔާބީއާއި، ކުރިއެރުންތަކަށް ބަލާފައެވެ. އެގޮތުން ކެއްކުމުގެ ދާއިރާގެ ތަފާތު ކޯސްތައް ހިންގުމާއި، ދުނިޔޭގެ ފެންވަރުގަޔާއި، ޤައުމީ ފެންވަރުގައި ބޭއްވޭ ތަފާތު ކެއްކުމުގެ މުބާރާތްތަކުގައި ބައިވެރިވުންވެސް ހިމެނެއެވެ.

ޤައުމީ ޔުނިވާސިޓީގެ ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒް (އެފް.އެޗް.ޓީ.އެސް)އަށް މި އެވޯޑު ލިބުމާއި ގުޅިގެން، އެ ފެކަލްޓީގެ ޑީން ޒީނަތު ޞާލިޙް ވިދާޅުވީ، އެ ފެކަލްޓީއަކީ ދުނިޔޭގެ ކަލިނަރީ ދާއިރާއިން ފާހަގަކޮށްލެވޭ ބަޔަކަށް ހެދުމަށް ގިނަ މަސައްކަތްތަކެއް ކުރެވެމުންދާކަމަށެވެ. އެގޮތުން ކަލިނަރީ ކޯސްތައް އިތުރަށް ކުރިއަރުވައި، ވީހާވެސް ގިނަ ކުދިން މި ދާއިރާއަށް ނިކުންނަން ޖެހޭކަން ޒީނަތު ފާހަގަކުރެއްވިއެވެ. އަދި އުންމީދުކުރައްވަނީ ރާއްޖެއަށް މިދާއިރާއިން އިތުރު އެވޯޑުތައް ލިބުންކަމަށްވެސް ޒީނަތު ވިދާޅުވިއެވެ.

"މިކަހަލަ އެވޯޑެއް ތުރޫކޮށް ބަޔަކަށް މެސެޖެއް ދެވޭތީ އަސްލު ވަރަށް އުފާވޭ. އުންމީދަކީ އަސްލު ކަލިނަރީ ކޯސްތައް ވީހާވެސް ކުރިއަރުވާ ގިނަ ދިވެހީން ދާއިރާއަށް ނެރުން. އަދި ރާއްޖެއިން ކަލިނަރީ ޑިގްރީ ހަދައިގެން އިންޓާރނޭޝަނަލް އެވޯޑްތައް ރާއްޖެއަށް ހޯދައިދިނުން." ޒީނަތް ވިދާޅުވިއެވެ.

ވޯރލްޑް ކަލިނަރީ އެވޯރޑަކީ 1994 ވަނަ އަހަރުން ފެށިގެން ދެމުން އަންނަ ފަޚުރުވެރި ވޯރލްޑް ޓްރެވަލް އެވޯރޑްސް ސިލްސިލާގެ ބައެކެވެ. ވޯރލްޑް ކަލިނަރީ އެވޯރޑްސް ދޭން ފަށާފައިވަނީ 2020 އަހަރުން ފެށިގެންނެވެ. ވޯރލްޑް ކަލިނަރީ އެވޯރޑަކީ ކެއްކުމުގެ ދާއިރާގެ ކުރިއެރުންތަށް ދުނިޔޭގެ ފެންވަރުގައި ފާހަގަކުރުމުގެ ގޮތުން ދެވޭ އެވޯރޑެކެވެ. އެމްއެންޔޫގެ އެފްއެޗްޓީއެސްއިން ވަނީ 2021 ވަނަ އަހަރުގައިވެސް މި އެވޯޑް ހާސިލް ކޮއްފައެވެ.

ދިވެހިރާއްޖޭގެ ޤައުމީ ޔުނިވަރސިޓީގެ ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒްއަކީ 1987 ވަނަ އަހަރުން ފެށިގެން ފަތުރުވެރިކަމުގެ ދާއިރާއިން މީހުން ބިނާކުރަމުން އަންނަ، ރާއްޖޭގެ އެންމެ ދުވަސްވީ އެއް މުޢައްސަސާއެވެ. މިފެކަލްޓީގައި ގާތްގަނޑަކަށް 4800 އެއްހާ ދަރިވަރުން ދަނީ މިހާރުވެސް ތައުލީމު ހާސިލްކުރަމުންނެވެ.

މިފެކަލްޓީއިން ކިޔަވައިދޭ ދާއިރާތަކުގެ ތެރޭގައި ހައުސްކީޕިންގ، ފްރަންޓް އޮފީސް، ޕެޓިސެރީ، ކަލިނަރީ އާރޓްސް، ޓުއަރ ގައިޑިންގ، އަދި ޓޫރިޒަމް އާއި ހޮސްޕިޓާލިޓީ މެނޭޖްމަންޓް ހިމެނެއެވެ. އަދި މިދާއިރާތަކުން ސެޓްފިކެޓް ލެވެލް 3 އިން ފެށިގެން، އެޑްވާންސް ސެޓްފިކެޓް، ބެޗެލަރ ޑިގްރީ، އަދި މާސްޓަރ ޑިގްރީއާއި ހަމައަށް ޕްރޮގްރާމްތައް ކުރިއަށް ގެންދެއެވެ.