އެސްޓީއޯ ގްރޫޕުން ފަލަސްޠީނަށް 1 މިލިއަން ރުފިޔާ

ފަލަސްތީނަށް އެހީވުމަށް ދިވެހިރާއްޖެއިން ހިންގާ ކެމްޕެއިނަށް އެސްޓީއޯ ގްރޫޕުން 1 މިލިއަން ރުފިޔާގެ އެހީއެއް ހަދިޔާކޮށްފިއެވެ.

މި އެހީ އެސްޓީއޯ ގްރޫޕްގެ ފަރާތުން ހަވާލުކޮށްފައިވަނީ އިންޓަނޭޝަނަލް އެއިޑް ކެންޕެއިނާއި ދިވެހި މީޑިއާ ގުޅިގެން ކުރިއަށްގެންދާ ޓެލެތޯންގެ ތެރެއިންނެވެ.

މި އެހީތެރިކަން ފޯރުކޮށްދީފައިވަނީ އެސްޓީއޯ ގްރޫޕްގައި ހިމެނޭ، އެސްޓީއޯ، މިފްކޯ، އެލައިޑް އިންޝުރަންސް، މޯލްޑިވްގޭސް، އެމްއެސްއެސް އަދި އެފްއެސްއެމްއިން ގުޅިގެންނެވެ.

މި އެހީ ހަވާލުކުރުމަށްފަހު ވާހަކަދައްކަވަމުން އެސްޓީއޯގެ މެނޭޖިންގ ޑިރެކްޓަރ އަބްދުﷲ ސައީދު ވިދާޅުވީ، މި އެހީއަކީ ފަލަސްތީނާއި މެދު އޮތް ލޯބި ހާމަކުރުމާއި އަދި އެސްޓީއޯ ގްރޫޕުން ފަލަސްތީނުގައި މި ހިނގަމުންދާ ލާއިންސާނީ އަމަލުތަކާއިމެދު ކަންބޮޑުވާކަން ހާމަކޮށް ފަލަސްތީނުގެ ރައްޔިތުންނަށް އެހީވުމަށް ފޯރުކޮށްދިން އެހީއެއްކަމަށެވެ.

"އެސްޓީއޯގެ ފަރާތުން މި ޑޮނޭޝަން ދެވިގެން މިދަނީ އެސްޓީއޯ މުޅި ގްރޫޕްގެ ހުރިހައި ސްޓާފުންނާއި، އެސްޓީއޯގެ ހިއްސާދާރުންނާއި އަދި އެސްޓީއޯގެ ހެޑް އޮފް ޑިޕާޓްމަންޓްސް އެގްޒެކެޓިވްއާއި، އެންމެހައި ބޭފުޅުންގެ ފަރާތުން." އެސްޓީއޯގެ އެމްޑީ އަބްދުﷲ ސައީދު ވިދާޅުވިއެވެ.

އެސްޓީއޯއަކީ އަބަދުވެސް މިފަދަ ކަންކަމުގައި އެހީތެރިކަން ފޯރުކޮށްދޭ ކުންފުންޏެކެވެ. އަދި ކުރިއަށްއޮތް ތަނުގައިވެސް މިފަދަ ކަންކަމުގައި އެ ކުންފުނިން އެހީތެރިކަން ފޯރުކޮށްދޭނެކަމުގެ ޔަޤީންކަން ވަނީ ދީފައެވެ.