ޖާދޫ ހަދަން ބޭނުންވާ ދިވެހިންނަށް މިއޮތީ އެފުރުޞަތު!

ދިވެހިންގެ ޖާދޫގެ ހުނަރުތައް ދައްކާލާ، އެހުނަރު ރާއްޖޭގައި ފުޅާކުރުމަށް މޯލްޑިވްސް މެޖީޝިއަން އެސޯސިއޭޝަންގެ ނަމުގައި ޖަމްޢިއްޔާއެއް އުފައްދައިފިއެވެ.

މޯލްޑިވްސް މެޖީޝިއަން އެސޯސިއޭޝަނުން ބުނީ މި ޖަމްޢިއްޔާ އުފެއްދުމުގެ އެންމެ މުހިންމު ބޭނުމަކީ ޖާދޫގެ ހުނަރުތައް ދައްކާލުމުގެ ފުރުޞަތު ދިވެހިންނަށް ހުޅުވާލުންކަމަށެވެ. ރާއްޖޭގައި ޖާދޫގެ ހުނަރުތައް ދައްކާލާ މީހުން ވަރަށް މަދުކަންވެސް އެ ޖަމްޢިއްޔާއިން ވަނީ ފާހަގަކޮށްފައެވެ.

މި ޖަމްޢިއްޔާއިން ބުނީ، ދިވެހިންގެ މެދުގައި ރާއްޖޭގައި ހުނަރު އިތުރަށް ތަރައްޤީކޮށް ރާއްޖެއާއި، ރާއްޖެއިން ބޭރުގައި އެމީހުންނަށް ޖާދޫގެ ހުނަރުތައް ދައްކާލުމުގެ ފުރުސަތު ހޯދަދޭނެކަމަށެވެ.

މި ޖަމިއްޔާ އުފެއްދުމާއި ގުޅިގެން ވަނީ ނޫސްވެރިންގެ ބައްދަލުވުމެއް ބާއްވާފައެވެ. މި ބައްދަލުވުމުގައި އެސޯސިއޭޝަންގެ ރައީސް އަދި ރާއްޖޭގައި ތިބި މަދު ޖާދޫގަރުންގެ ތެރޭގައި ހިމެނޭ މުޙައްމަދު ޝަރީފް ބުނީ އޭނާ 23 އަހަރު ޖާދޫ ހެދުމުގައި ހޭދަކޮށްފައިވާކަމަށެވެ.

ދުނިޔޭގެ އެކި ކަންކޮޅުތަކުގައި ގިނަ ޝޯތަކެއް ދީ އެވޯޑްތަކެއްވެސް ހޯދާފައިވާ ޝަރީފް ބުނީ ޖާދޫގެ ހުނަރުތައް ބަލާލުމަށް ރާއްޖޭގައި ކުޑަކުދިންނާއި ބޮޑެތި މީހުންވެސް ވަރަށް ބޮޑަށް ޝައުގުވެރިކަން ހުންނަ ކަމަށެވެ. ނަމަވެސް މިކަމުގައި އުޅެނީ މަދުބައެއް ކަމަށެވެ. މިއީ ރަނގަޅު އާމްދަނީއެއްވެސް ލިބޭ މަސައްކަތެއްކަން ފާހަގަކޮށް އޭނާ ބުނީ ޖަމްޢިއްޔާގެ އެންމެ ބޮޑު މަޤްސަދަކީ މިކަމަށް ޝައުގުވެރިވާ ދިވެހިންނަށް އިތުރު ފުރުސަތުތައް ހޯދާދިނުންކަމަށެވެ.

"މި ޖަމިއްޔާގެ މަޤްސަދަކީ ރާއްޖޭގައި ތިބި ޖާދޫގެ ހުނަރުތަކައް ޝައުގުވެރިވާ ފަރާތްތަކަށް ޖާދޫގެ ހުނަރު ދަސްކޮށްދިނުމާއި، އެފަރާތްތަކަށް ފުރުސަތު ހޯދާދިނުމާއި، ކުރިއެރުން ގެނެސްދިނުން." ޝަރީފް ބުންޏެވެ.

މޯލްޑިވްސް މެޖީޝިއަން އެސޯސިއޭޝަންގެ މެންބަރަކަށް ވުމަށް ކުޑަކުދިންނާއި އަދި ބޮޑެތި މީހުންނަށްވެސް ވަނީ ހުޅުވާލާފައެވެ. އެގޮތުން ނޯމަލް ކެޓަގަރީއަށް 1 އަހަރަށް ދައްކަންޖެހެނީ 100 ރުފިޔާއެވެ. އަދި ޕްރޮފެޝަނަލް ކެޓަގަރީއިން 1 އަހަރަށް ދައްކަންޖެހެނީ 500 ރުފިޔާއެވެ.

މި ޖަމިއްޔާއިން އަންނަ ޑިސެމްބަރ މަހުގެ ތެރޭގައި މޯލްޑިވްސް މެޖިކް ފެސްޓިވަލެއް ބޭއްވުމަށް ވެސް ވަނީ ހަމަޖެހިފައެވެ. މި ފެސްޓިވަލްގައި ދުނިޔޭގެ ތަފާތު 5 ޤައުމަކުން ޖާދޫގަރުން ބައިވެރިވެ އެމީހުންގެ ޖާދޫގެ ހުނަރު ދައްކާލާނެއެވެ.