ސްޕެޝަލް އިކޮނޮމިކް ޒޯން، (އެސްއީޒެޑް) އޮފީސް އިކޮނޮމިކް މިނިސްޓްރީ ދަށަށް ބަދަލުކޮށް، ޑިޕާޓްމަންޓް އޮފް އިމިގްރޭޝަން އެންޑް އެމިގްރޭޝަންގެ ނަން ބަދަލުކުރަން ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން ފާސްކުރައްވައިފިއެވެ. މިގޮތަށް ފާސްކުރެއްވީ ކޮމެޓީއަށް ހާޒިރުވި މެންބަރުންގެ އިއްތިފާގުންނެވެ.
ރައްޔތިުންގެ މަޖިލީހަށް ރައީސް ޢަބްދުﷲ ޔާމީން ޢަބްދުލްޤައްޔޫމް ފޮނުއްވި ސިޓީގައި ވިދާޅުވެފައި ވަނީ ސްޕެޝަލް އިކޮނޮމިކް ޒޯން (އެސްއީޒެޑް)ގެ އޮފީސް އިކޮނޮމިކް މިނިސްޓްރީގެ ދަށުން ހިންގާ ގޮތަށް ހަމޖެއްސުމަށާއި، ޑިޕާޓްމަންޓް އޮފް އިމިގްރޭޝަންގެ ނަން "މޯލްޑިވްސް އިމިގްރޭޝަން" އަށް ބަދަލު ކުރުމަށެވެ.
މިދިޔަ އަހަރުގެ ޑިސެމްބަރު މަހު ރައީސް ވަނީ ސްޕެޝަލް އިކޮނޮމިކް ޒޯންގެ ނަމުގައި އިދާރާއެއް އުފައްދަވާފައެވެ. އެ އިދާރާއަކީ ސްޕެޝަލް އިކޮނޮމިކް ޒޯނުގެ ޤާނޫނުގެ ދަށުން އުފައްދަވާފައިވާ ބޯޑް އޮފް އިންވެސްޓްމަންޓާ ހަވާލުކޮށްފައިވާ މަސްއޫލިއްޔަތު އަދާކުރުމަށް އެހީތެރިވުމަށް އުފައްދަވާފައިވާ އިދާރާއެކެވެ.